MATTHIEU 11

O ŋgaiwi ko Jean Zui-bíí

(Zɔk Lk 7.18-35)

1Ɗoŋ nɛ̀ Jesu tɔ̧ɔ̧ wen'i ha̧ o ŋgaiwi kɔ‘i kaɗi, ɓɛɛ a̧ yak mɛ usi mɔ tɔ̧ nɛ̀ wen ko Sɔ̧ nɛnɛ tɛ o gasa ye fara'i.

2Jean duka kɔ̧́ zɔɓɔ zii nɛ̀ nyɛrɛ tom ko Krist, ɓɛɛ a̧ tom o ŋma ŋgaiwi kɔ̧-a̧ mɛ ak Jesu'e: 3«Wi nɛ̀ tɛ tɛ‘i nɛ́ ɛ́nɛ́ náà, kóó ɛɛ tɛ zɛm nɛ́ ŋma mbe bíí nde?» 4Jesu kifa nú ha̧ wa: «Ɛ̀nɛ̀ sí ɗoŋ, ɓɛɛ ɛ̀nɛ̀ tɔ̧́ mɔ n’ɛnɛ zia in mɔ n’ɛnɛ zɔka ha̧ Jean. 5O wi-boma-yí zɔk nɛ́ mɔ, o wi-kum nɛ nɔ̀ nɛ̀ de-a, tɛ o wi-doko sa̧a̧, o wi-mgbee-zer zii nɛ́ mɔ, o fio kpasa, ɓɛɛ o bíí tɔ̧ nɛ́ De Mbe Wen ko Sɔ̧ nɛnɛ ha̧ o wisan.#Es 35.5-6; 61.1 6Ɓɛɛ wi nɛ̀ tík wen zu'm na duk kɔ‘i nɛ̀ desee.»

7Nɛ́ mɔ'ɔ nɛ̀ o ŋgaiwi ko Jean sia, ɓɛɛ Jesu ku̧ naŋ tɔ̧ɔ̧ wen zu Jean ha̧ o giiwi. A̧ aka wa: «Ɛ́nɛ́ nɛ̀ɛ̀ mɛ zɔk nɛ́ ge ŋga-gbárà mɛ̧‘i ge, nɛ́ tòrò nɛ́ buk fo’ɛ nde? 8Ɛ́nɛ́ nɛ̀ɛ̀ mɛ zɔk nɛ́ ge, ŋma wi-pi̧-de-laa nde? O wi-pi̧-de-laa ya kɔ‘i kɔ̧́ garo ko wannu ɛ̧. 9Ɛ́nɛ́ nɛ̀ɛ́ bɔɔ mɛ zɔk nɛ́ ge, ŋma wi-tɔ̧-wen oi nú Sɔ̧ nde? Nɛ́ kpasawen a̧‘m tɔ̧ h’ɛ́nɛ́, wi n’ɛnɛ zɔka'i gana wi-tɔ̧-wen oi nú Sɔ̧. 10Mɛ̀ nɛ́ wi nɛ̀ wa baa yɔr so mɔ wen-aa'e: ‹Mi tom nɛ́ betom kɔ‘m mɛ yak ti ha̧ mɛ, ha̧ a̧ mɛ ɗafi war ha̧ mɛ.›#Mal 3.1 11Nɛ́ kpasawen a̧‘m tɔ̧ h’ɛ́nɛ́, zu nù'ɛ, mgbara o bíí nɛ̀ okoo kòò lɛŋ, ŋma bíí nɛ̀ gana Jean Zui-bíí bo na; ɓɛɛ zu-a'i, geɗek-wi tɛ Wan mɛ yiwese gana a̧. 12Tɛ́ ŋgimbi ko Jean Zui-bíí hɔ kinii, bíí de nɛ́ ŋgamɔ zu Wan mɛ yiwese, ɓɛɛ o wi-de-ŋgamɔ ba kɔ‘i wan'i zu ŋgai-tɛ.#Lk 16.16 13O wi-tɔ̧-wen oi nú Sɔ̧ lɛŋ ká bá nɛ̀ heembea ko Moisɛ tɔ̧ɔ̧ so kànà wen Wan'i hɔ nɛnɛ tɛ ŋgimbi ko Jean. 14K’ɛ̀nɛ̀ nɛ́ kɔ̧ɔ̧ mɛ zii mgbara wen kɔ-wa, ɓɛɛ Jean nɛ́ Elii nɛ̀ wa tɔ̧ɔ̧ so'e tɛ́ pii ɗoŋ'ɛ.#Mal 3.23; Mt 17.10-13; Mk 9.11-13 15Wi nɛ̀ a̧a̧ nɛ̀ zer a̧ zíí wen’ɛ.

16«A̧‘m wé bɔɔ tugun bíí'ɛ nɛ̀ o? Wa hɔɔ ŋmaa in o geɗek bem nɛ̀ mɔi̧ ŋmaa ya bee-gara sa nɛ̀ mɔ sitɛ o ŋmaa'e: 17‹Ɛ́ɛ́ dɔma fol h’ɛ́nɛ́, ɓɛɛ ɛnɛ yɔ yɔyɛ na; ɛ́ɛ́ bia gima-fio, ɓɛɛ ɛnɛ mbɛr yí-see'nɛ́ na.› 18Wen Jean tɛa, nyɔŋ mɔ na, nɔ mɔ na, ɓɛɛ o bíí‘e, zu-a bo na. 19Nɛ́ mɔ'ɔ nɛ̀ Bem ko bíí tɛ̀ɛ̀ kɔ‘i, nyɔŋ nɛ̀ mɔ, nɔ nɛ̀ mɔ mbɛt, ɓɛɛ ɛ́nɛ́‘e, a̧ nɛ́ gba-gur-mɔ in wi-gbɛ-dɔ̧ɔ̧; ɛ́nɛ́ tɔ̧ɔ̧ mbɛt'e, a̧ nɛ́ gbama-yari ko o wi-ba-garama in o ɗaŋwi. Mɔ kpɔk, mɛ̀ nɛ́ zu tom ko Iŋa-mgbara-mɔ a'i iŋa nɛnɛ‘e deemɔ kɔ̧-a̧ duk nɛ̀ yuwar-a.»

Ŋga wen ko Jesu

(Zɔk Lk 10.13-15)

20O ŋma ye a̧a̧ so sɛnɛ nɛ̀ Jesu dee mɔɔ-kifi sɛnɛ nɛ̀ dɔka-a, ɓɛɛ o bíí saaye nɔ‘i kpa mbe ta na. Ɓɛɛ Jesu tɔ̧ ŋga wen zu wa'e: 21«Bɔnɛ a̧a̧ zu'nɛ́ o bíí Korazin! Bɔnɛ a̧a̧ zu'nɛ́, o bíí Bɛtsaida! Wen o mɔɔ-kifi nɛ̀ dee mgbara'nɛ́, a̧ dé so sɛn Tir in Sidɔŋ, o bíí ye nɔ‘i tɛ̀ɛ́ gaɓi so tɛ nɛ̀ bufu in wa tɛ̀ɛ́ a so bùk zu-wa mbɛt nɛ̀ haya-a mɛ usi'e wa kpaia duka-a kɔ-wa.#Es 23.1-18; Ez 26.1—28.26; Jɔɛl 4.4-8; Amɔs 1.9-10; Zak 9.2-4 22Nɛ́ mɔ‘i s'am tɔ̧ h’ɛ́nɛ́, wese kita, kita tɛ ŋgai zu'nɛ́ gan ko o bíí Tir in Sidɔŋ. 23K’ɛ́nɛ́ o bíí Kafarnaum, ɛ́nɛ́ ta k’ɛ́nɛ́‘e ɛ́nɛ́ tɛ daŋ hɔ yiwese mɛ nde? Ɛ́nɛ́ tɛ zir zir si fara ko o fio mɛ, wen mɔɔ-kifi nɛ̀ dee mgbara'nɛ́ a̧ dé so sɛn Sɔdɔm gáà, Sɔdɔm tɛ̀ɛ́ duk hɔ kinii.#Es 14.13-15; Ku̧u̧ 19.24-28 24Nɛ́ mɔ‘i s'am tɔ̧ h’ɛ́nɛ́‘e, wese kita, kita tɛ ŋgai zu'nɛ́ gan ko Sɔdɔm.»#Mt 10.15; Lk 10.12

Ɛ̀nɛ̀ tɛ́ tɛ‘m

(Zɔk Lk 10.21-22)

25Tɛ̀ kpɔk ŋgimbi'i Jesu bàá wen ɓɛɛ tɔ̧: «Mi de osoko h’ɛ́nɛ́ Dáà, Gasa Wan nɛ̀ ɔ wan zu yiwese in nù, wen ɛ́nɛ́ hu̧sa̧ mɔ'ɔ nɛ̀ o wi-iŋ-mgbara-mɔ in owi-iŋ-mɔ, ɓɛɛ ɛ́nɛ́ usi usa-a ha̧ o geɗek-wi. 26Íì Dáà, nɛ́ hegɔ ɛ́nɛ́ ɗafa so nɛ̀ mɔ‘i zaŋ dee demɔ k’ɛ́nɛ́.

27«Dáà kɔ‘m ee mɔ lɛŋ er-am, ɓɛɛ ŋma bíí iŋ Bem na, kànà nɛ́ Dáà a̧ iŋa a̧ ɓɛɛ. Ɓɛɛ ŋma bíí iŋ Dáà na mbɛt, kànà nɛ́ Bem a̧ iŋa Dáà, in o wi nɛ̀ Bem kɔ̧a̧ mɛ usi Dáà ha̧ wa.#Jn 3.35; 1.18; 10.15

28«Ɛ́nɛ́ o bíí lɛŋ nɛ̀ zɔk bɔnɛ dita tui, ɛ̀nɛ̀ tɛ́ tɛ‘m, ɓɛɛ mi tɛ ha̧ ɔma-tɛ h’ɛ́nɛ́. 29Ɛ̀nɛ̀ bá kpáŋá kɔ‘m pi̧ ger'nɛ́, ɓɛɛ ɛ̀nɛ̀ yámbí mɔ n'am tɛ usi h’ɛ́nɛ́, wen mi nɛ ga̧a̧-wi in wi-mɔka-see, ɓɛɛ ɛ́nɛ́ tɛ kpa kpasa ɔma-tɛ,#11.29 kpàsá ɔ́má-tɛ̀: texte tɔ̧a ɔ́má-tɛ̀ wen sɔ̧-tɛ́‘nɛ̀.#Jer 6.16 30wen kpáŋá kɔ‘m ɔ káŋfányáŋ in tui n'am tɛ ha̧‘nɛ́ diti na.»

Currently Selected:

MATTHIEU 11: GB11DC

Highlight

Copy

Compare