ROMANEN 6

Na wuk wo faɓe', amma na yea ne cee mor Kristu

1Na ga faa ɗǝne? Na ga joŋ faɓe' pǝlli ka Masǝŋ mo joŋ gboŋgboŋ pǝlli ta ne? 2Ka nai ya! Na wuk ɓo wo faɓe' o, a so joŋ ɗii ka na syee ne joŋ faɓe' kpǝ ne? 3We tǝ sõone ana za mai daŋ na nyiŋ baptisma ɓo ka yea vaŋno ne Yesu Kristu, na nyiŋ baptisma ɓo ne ki ne wul ah ta, we tǝ ya ne? 4Ne baptisma man ciira na ge ɓo pǝ pal ne Kristu ka na yea na wul ne ki. Mor tǝgbana Kristu mo ur gin pǝ wul kǝsyil za ma wul ne swah ne yǝk Pamme, ana laŋ kal man ga fer yea pǝfuu ta.#Kol 2:12

5Amma na tai ɓo ne ki vaŋno ne wul ah ɓe, na ga ur gin pǝ wul ne ki cok vaŋno ta. 6Na tǝ ɓǝ mai ɓe: zahzyil mai na yea ne ko kǝpelle, wǝ ne Yesu Kristu tǝ kpuucee ɓe, mor ka suu man ma joŋ faɓe' mo muŋ, mor ka na so yea byak faɓe' kao. 7Mor dǝɓ mo wǝ ɓe, ka ǝ̃ǝ gin jol swah faɓe' ɓe. 8Amma na wuk ɓo ne Kristu ɓe, na nyiŋ ɓo na ga yea ne cee ne ki ta. 9Mor na tǝ ɓe, ne cok Kristu mo ur gin pǝ wulli, ka so wǝ faɗa yao, wul ka ne swah tǝl ah ya. 10Mor ne wul ah mo wuu, wǝ ɓo mor faɓe' ɓal vaŋno sǝ ga lii, amma cee mai ako mo ne zǝzǝ̃ǝko, a ne mor Masǝŋ o. 11Awe laŋ we kwo suu ɓii na wul wo faɓe', amma we kwo suu ɓii na za ma ne cee pel Masǝŋ tǝki vaŋno ne Yesu Kristu.

12Mor ahe, we soɓ faɓe' kaa swah tǝ suu ɓii ma wul mai ka joŋ we syee mor cwaa fan ah ka. 13We soɓ fan suu ɓii ka joŋ faɓe' tǝgbana fan yeɓ ma joŋ faɓe' yo ka. Amma we nyi suu ɓii nyi Masǝŋ tǝgbana za mai mo yea wuk ɓo mo so syemra ɓo, we nyi suu ɓii nyi Masǝŋ mor yeɓ ah tǝɗe' tǝgbana fan yeɓ mai mo mor ka joŋ fan masãhe. 14Faɓe' ka ga yea ne swah tǝ ɓii ya, mor we ka mor ɓǝ lai ya, amma we mor gboŋgboŋ mai Masǝŋ mo joŋ ɓo.

Byak joŋ fan matǝ njaŋ

15Ɗǝne? Na so ga joŋ faɓe' mor na ka mor ɓǝ lai yao na mor gboŋgboŋ Masǝŋ mo joŋ ɓo ne? Ka nai ya! 16We tǝ ɓe, ne cok we soɓ suu ɓii nyi dǝɓ ki mor ka laa zah ah ɓe, ka awe ciŋ byak dǝɓ mai we soɓ suu ɓii ɓo nyi ka laa zah ah ɓe, koo mo mor ɓǝɓe' ma ga pǝ wul ne dǝɓ yo, wala mo mor laa zah ma joŋ fan matǝ njaŋ pel Masǝŋ yo daŋ. 17Amma osoko wo Masǝŋ, mor daga ɓaaɓe we yea tǝ joŋ byak nyi faɓe', zǝzǝ̃ǝko we tǝ laa zah goŋga mai mo cuura ɓo we ne zahzyil ɓii daŋ. 18Masǝŋ wǝǝ we gin jol faɓe' ɓe, we so ciŋ byak joŋ fan matǝ njaŋ ɓo. 19Me tǝ faa ɓǝ nyee na dǝfuu, mor ɓǝ tǝtǝ̃ǝ suu ɓiiri. Kǝpel we yea soɓ fan suu ɓii daŋ tǝgbana byak joŋ fan ma ne 'nahm ah ne joŋ faɓe', nai ta, zǝzǝ̃ǝ laŋ we soɓ suu ɓii daŋ tǝgbana byak joŋ fan matǝ njaŋ, mor ka we syee tǝgbana Masǝŋ mo 'yahe.

20Ne cok we yea tǝ joŋ faɓe', we ɓaŋ syiŋ ɓǝ joŋ fan tǝ njaŋ ya. 21We lwaa reba fẽe ɓo ne yeɓ mai we joŋ, so swãa mo tǝ ren we tǝl ah tǝ'nah ne? Yeɓ ah ra a zaŋ dǝɓ ga pǝ wul ne ko! 22Amma zǝzǝ̃ǝko, Masǝŋ wǝǝ we gin pǝ faɓe' ɓe, we so ciŋ za yeɓ Masǝŋ ɓo, fan mai we ga lwaa gŋ, we syee tǝgbana Masǝŋ mo 'yahe, in zah ah we ga lwaa cee ma ga lii. 23Mor soo faɓe' moo soo dǝɓ ne ko wul o, amma gboŋgboŋ mai Masǝŋ mo joŋ ɓo, nyi cee ma ga lii nyi na, mor na tai ki ɓo ne Yesu Kristu Dǝɓlii mana.

Currently Selected:

ROMANEN 6: MUAR

Highlight

Copy

Compare