ROMANEN 7

Ɓǝ kikiŋ tǝ ɓǝ kan ŋwǝǝre

1Wee pa ɓe, we tǝ ɓǝ mai me tǝ ga faa nyi we ɓe, mor we tǝ ɓǝ lai ɓe. Ɓǝ lai no ne swah tǝ dǝɓ mo no sǝŋ ba to. 2Tǝgbana mawin mai mo kan wor ɓe, ɓǝ lai saa ko ɓo nyi wor ah ne cok tǝtǝl wor ah mo no sǝŋ ba. Amma ne cok wor ah mo wǝ ɓe, ka ɓǝ lai mai mo saa mawin ɓo nyi wor ah wǝǝ gin tǝl ah ɓe. 3Amma ne cok wor ah mo sǝŋ ba, mawin ah mo ɓaŋ wor ki ɓe, a ga ɗiira ko ne matǝkoi. Amma wor ah mo wǝ ɓe, ka ɓǝ lai wǝǝ gin tǝl ah ɓe, so mo ɓaŋ wor ki kan laŋ, ka ɗiira ko ne matǝkoi yao. 4A nai ne we wee pa ɓe, awe ye wul wo ɓǝ lai ne suu Kristu! Zǝzǝ̃ǝko awe ye mǝ Dǝɓ mai mo ur gin pǝ wul kǝsyil za wulli, mor ka na lee syẽm masãh ah mor Masǝŋ. 5Mor ne cok na yea tǝ syee tǝgbana kpak dǝfuu mana, fan cwaa maɓe' a ur ne ɓǝ lai a joŋ yeɓ pǝ suu man ne lii ah daŋ, ka na lee syẽm yeɓ wulli. 6Amma zǝzǝ̃ǝko na wǝǝ gin jol ɓǝ lai ɓe, mor ana ye wul wo fan mai mo yea gbah na ɓo na daŋgai. Na gak joŋ yeɓ mor Masǝŋ ne fahlii mafuu ah mor swah Tǝ'yakke, na ka joŋ yeɓ mor swah ɓǝ lai mai mo ŋwǝǝ ɓo yao.

Ɓǝ lai ne faɓe'

7Na ga faa ɗǝne? Wala na ga faa ɓǝ lai ne suu ah faɓe' ye ne? Ka nai ya! Amma ɓǝ lai ye cuu faɓe' nyi me, mor ɓǝ lai mo faa mo cwaa fan ka ya ɓe, kǝnah me yea tǝ ɓǝ cwaa fan a.#Pǝ̃ǝ 20:17; CuuƁ 5:21 8Mor faɓe' lwaa fahlii ne ɓǝ lai mo faa ɓo, ka ur ɓǝ cwaa fan camcam pǝzyil ɓe ne ko. Mor ɓǝ lai mo kǝka ɓe, faɓe' a tǝgbana fan ma wul ahe. 9Ne cok ka ɓǝ lai ge ya ba, me yea ne cee, amma ne cok ɓǝ lai mo ge dai o, faɓe' nyiŋ cee kaa ne ko, 10ma ɓe me so wuu. Ɓǝ lai a zaŋ dǝɓ ka ga wo cee, ma ɓe me so lwaa zaŋ me ga pǝ wul ne ko. 11Mor faɓe' lwaa fahlii jol ɓǝ lai ka zyak me ne ko, so jin ɓaŋ ɓǝ lai i me ne pǝ wulli.#Tǝŋ 3:13

12Ɓǝ lai ne suu ah a daŋdaŋ, a njaŋ, a pǝsãhe. 13Fan mai mo pǝsãh ako ye i me pǝ wul ne? Ka nai ya! Amma faɓe' ye ge ne ɓǝ ahe, ako ye cuu goŋga kpak faɓe' suu ah ge lalle, ɓaŋ fan mai mo pǝsãh kŋ so i me ne pǝ wulli. Mor ne fahlii ɓǝ lai faɓe' so ciŋ fan maɓe' lii ahe.

Dǝɓ man mai faɓe' mo kaa swah ɓo tǝl ahe

14Mor na tǝ ɓe, ɓǝ lai gee wo Masǝŋ ge, amma ame, me ye dǝɓ matǝtǝ̃ǝre, faɓe' lee me ɓo na byakke. 15Fan mai me tǝ joŋni, me ka tan mor ah ya, mor me ka joŋ fan mai me tǝ 'yah joŋ ah ya, amma fan mai me syiŋ ɓo me so joŋni.#Gal 5:17 16Amma fan mai me 'yah ya me so joŋni, ne mai me tǝ ɓe, ɓǝ lai a pǝsãhe. 17Mo goŋga ah ye ɓe, ame ye ka tǝ joŋ ya, amma faɓe' mai mo pǝzyil ɓe ye tǝ joŋ ne me. 18Mor me tǝ ɓe, fan masãh ah kǝka pǝzyil ɓe pǝ kpak dǝfuu mai me ne ya, mor 'yah ka joŋ fan masãh a ur pǝ zahzyil ɓe ɗao, so swah joŋ ah ka wo ɓe ya. 19Me ka gak joŋ fan sãh mai me tǝ 'yah joŋ ah ya, amma me so jin joŋ faɓe' mai me 'yah joŋ ah ya. 20Me tǝ joŋ fan mai me 'yah ya ɓe, mai cuu ame ye ka tǝ joŋ ya, amma faɓe' mai mo no pǝzyil ɓe ye tǝ joŋ ne me.

21Me lwaa ɓǝ lai mai pǝ suu ɓe: ne cok me tǝ 'yah ka joŋ fan sãhe, me ka so gak joŋ ya, sai me so jin joŋ faɓe'. 22Pǝ zahzyil ɓe maɗǝk ah ma ŋhaa me laa pǝ'nyah ne ɓǝ lai Masǝŋ. 23Amma me so kwo ɓǝ lai maki ah ɓo no a joŋ yeɓ pǝ suu ɓe, a ruu sal ne ɓǝ lai ma pǝ ɓǝ foo ɓe. So tǝ joŋ me na byak ɓǝ lai faɓe' mai mo no pǝ suu ɓe. 24Kai, ame pǝsyakke! Azu ye ga wǝǝ me jol suu ma wul mai ne? 25Osoko Masǝŋ, mor Masǝŋ ne suu ah ako ye ga wǝǝ me ne Yesu Kristu Dǝɓlii mana! Mor ne ɓǝ foo ɓe me tǝ joŋ mor ɓǝ lai Masǝŋ, amma ne kpak dǝfuu ɓe me tǝ joŋ mor ɓǝ lai faɓe'.

Currently Selected:

ROMANEN 7: MUAR

Highlight

Copy

Compare