ƁƏ TƏƁOROO 9
9
Fatan ne tǝgwĩi
1Fatan vuu yaŋ ahe, so pea kpuu sǝŋ gŋ rǝŋ, 2fatan ŋgom faɓal ah ra ka joŋ fĩi, zyeɓ fazwanne, so ɓaŋ taabǝl kanne. 3So pea za yeɓ ah maŋwǝǝ kal ge uura pǝ cok mai mo tǝgee sǝŋ tǝgǝǝ yaŋ ɗiira ɗii faa: 4Koo zune mo tǝ fan ki ya daŋ mo geko nyeeno. So ɗii za ma tǝgwĩi ah ra faa: 5We ge, we ge re farel tǝkine fazwan mai me zyeɓ ɓo. 6We woŋ ki ne za mai mo tǝra fan ki ya, ka we yea ne cee, we syee tǝbǝlam fatanne.
7Mo faa ɓǝ nyi dǝɓ ma yii suu tǝ ɓǝ yii suu ah ɓe, mo ga lwaa swãare. Mo kal lai dǝɓ ɓe' tǝ ɓǝ fan joŋ ɓe' ah ɓe, a ga kyeɓ wul ɓo tǝ ɓǝ ahe. 8Mo lai dǝɓ ma yii suu tǝ ɓǝ yii suu ah ka, a ga syiŋ mo tǝ ɓǝ ahe. Amma mo lai dǝɓ ma ne fatan ɓe, a ga gbǝ yǝk ɓǝ ɓo. 9Mo faa ɓǝ fẽene daŋ nyi dǝɓ ma ne fatan ɓe, ɓǝ ah ga joŋ ko tǝ fan ga pelle. Mo faa ɓǝ fẽene nyi dǝɓ matǝ njaŋ daŋ, a ga cuu yella ga nyi pelle.
10Tǝtǝŋ fatan daŋ ako ye ɗul Dǝɓlii, mo tǝ Dǝɓ Matǝdaŋdaŋ ɓe, ka mo tǝ fan ɓe.#Joɓ 28:28; Lǝŋ 111:10; ƁǝT 1:7 11Fatan ga joŋ mo ka mo nǝn wo sǝrri. 12Mo tǝ fan ɓo ɓe, ka mo tǝ ɓo mor gbah jol suu ɓo. Mo so kal ɓoo fatan ge lal ɓe, ka mo ye pa ma ga laa bone ɓǝ ah ne suu ɓo sǝǝ ta.
13Tǝgwĩi sye a tǝgbana kyaŋ mawin ma bai swãa mai mo ka ne tǝtǝl a. 14Mawin ah a kaa zahfah yaŋ ahe, wala pǝ cok mai mo tǝgee sǝŋ tǝgǝǝ yaŋ. 15A ɗii za mai mo tǝ pǝ̃ǝra kah ah mo tǝ foora ɓǝ yeɓ ɓǝǝ ga ne ko: 16Awe za ma bai tan fanne, we ge nyeeno. So faa nyi dǝɓ ma tǝgwĩi ahe: 17Bii ma lal kiŋ zwan ne nyin a yea pǝ'nyahre, farel mai dǝɓ moo ren pǝ muŋ a pǝ'nyah no cam. 18Amma dǝɓ ah tǝ sõone wul gŋ ya. Za mai mo danra ge yaŋ mawin ah ɓe daŋ, ara pǝ pal o.
Bible Moundang © Alliance Biblique du Tchad, 1996.