ƁƏ TƏƁOROO 8
8
Na yii fatanne
1We syii sok laa ɗǝ, fatan tǝ ɗiɗii, goŋga tǝ cuu suu ah ka dǝɓ mo laa.#ƁǝT 1:20-21 2Uu ɓo tǝgee kah fahlii ne tǝwoŋ fahlii. 3Uu ɓo tǝ fahlii ma dan ga tǝgǝǝ yaŋ nǝfah kǝlalle, tǝ ɗiɗii gŋ. 4Faa: Me tǝ ɗii we, za ma kaa wo sǝr daŋ. 5Awe za mai we pǝ tǝgwĩi, we fee fanne, ka we yea ne tǝtǝlli. 6We syii sok we laa ɓǝ faa sãh ɓe, ɓǝ mai mee faa nyi we daŋ a njaŋ. 7Ɓǝ faa ɓe daŋ goŋga yo, mor me syiŋ ber ɓo syiŋ. 8Ɓǝ faa zah ɓe daŋ goŋga yo, ɓǝ maɓe' ah wala matǝ vǝrvǝr ka gŋ ya. 9Dǝɓ mai mo ne tǝtǝlli, ɓǝ ah a wol ah wat, za mai mo tǝra fan ɓo daŋ, ɓǝ ah a wo ɓǝǝ njaŋ sǝ. 10Mo nǝǝ ɓǝ cuu ɓe soɓ lak solai, mo nǝǝ fatan soɓ vãm kaŋnyeeri masãh ahe.
11Ame fatanne, me kal fãi masãh ah ɓe, fan mai mo ne 'yah ah daŋ mai moo ɓaŋ lii zahki ne me kǝka. 12Ame fatanne, me pǝ yella, me ne tǝtǝlli, me gak woŋ tǝgǝǝ fanne. 13Ɗul Dǝɓlii ako ye mai ka dǝɓ mo syiŋ ɓǝɓe', ame syiŋ yii suu ne syẽa suu ne fahlii ɓǝ syel maɓea ah tǝkine ɓǝ faa matǝ vǝrvǝr ɓo. 14Ame zyeɓ ɓǝ rǝkki, me so joŋ ɓǝ ahe, ame ne tǝtǝlli, me pǝswahe. 15Ame yee gbah jol za goŋ kaa goŋe, ame yee gbah jol ɓǝǝ ka mo zyeɓra ɓǝ lai masãh ah tǝ sǝrri. 16Za camcam mai moo kaara goŋ wo sǝrri, ame yee gbah jol ɓǝǝra, zaluu ne za lakaali daŋ. 17Ame 'yah za mai mo tǝ 'yahra me, koo zune mo tǝ kyeɓ me, a lwaa me. 18Ame no ne joŋ ne yǝk ka nyi nyi mo tǝkine fan sãh mai moo nǝn ga lii ka mo laa pǝ'nyahre. 19Fan mai mo ɗǝǝ jol ɓe a pǝsãh kal vãm kaŋnyeeri masãh ah ɓe, kal vãm solai ne yǝk ɓe ta. 20Ame tǝ syee tǝ fahlii masãhe, me ɓaŋ tǝbǝlam matǝ goŋga ah ɓo, 21ka me nyi joŋ nyi za mai mo tǝ 'yahra me, ka me baa yaŋ ɓǝǝ ne fan kǝrkǝr.
22Dǝɓlii joŋ me kǝpel fan daŋ, joŋ me kǝpel yeɓ ah ra mo joŋ ɓo daga ɓaaɓe daŋ.#Caŋ 3:14 23Masǝŋ joŋ me ɓo ɓaaɓe, joŋ me kǝpel ka sǝr ɓah joŋ ya ba. 24Ame joŋ kǝpel ka mabii malii kǝka ba, ka cok mai bii moo pǝ̃ǝ gin gŋ kǝka. 25Ame joŋ kǝpel ka waa tǝkine gee daŋ ka pǝ cok ɓǝǝr a ba, 26ka Masǝŋ ɓah joŋ sǝr tǝkine cok pǝǝ fan mo gŋ wala ka sǝr ma nik ah laŋ ɓah joŋ ya ba. 27Ne cok Masǝŋ mo kan coksǝŋ, pǝ cok ah ame no gŋ, ne cok mo ɗee zah cok nyi mabii malii daŋ, ka me no. 28Ne cok mo joŋko swãh coksǝŋ, so ne cok mo gbǝr zahtǝwoo nyi mabii malii ahe, 29so ne cok mo cuuko cok nyi mabii ka mo ɓooko gŋ ka mo laako zah ahe, tǝkine mai mo kpii mor dunia daŋ, ka me no gŋ. 30Ame yea ma kah ah tǝgbana pa gbah jolle, ne cok ah ame na we 'yah ahe, zah'nan Masǝŋ daŋ a laa pǝ'nyah ne me, me joŋ kyẽm kah ah cẽecẽe. 31Ame joŋ kyẽm wo dunia ne lii ah daŋ, ame laa pǝ'nyah ne dǝfuu.
32Zǝzǝ̃ǝko wee ɓe, we laa ɓǝ faa ɓe, we joŋ tǝgbana mai me faa, we ga laa pǝ'nyahre. 33We syii sok mor ɓǝ cuu ɓe, ka we tǝ fanne, we syẽa ɓǝ ah ka. 34Dǝɓ mo laa ɓǝ faa ɓe ɓe, mo so uu zahfah yaŋ ɓe zah'nan daŋ mo tǝ byak ka dan ɓe, a ga laa pǝ'nyahre. 35Mor dǝɓ mo lwaa me ɓe, ka lwaa cee ɓe ta, Dǝɓlii ga laa pǝ'nyah ne ki. 36Dǝɓ mo ka ne me ya ɓe, ka dǝɓ ah ɓeɓ ɓe ta, dǝɓ mo syiŋ me ɓe, ka pah ah tǝ 'yah wulli.
Bible Moundang © Alliance Biblique du Tchad, 1996.