ƁƏ TƏƁOROO 10
10
Marai ɓǝ tǝɓoroo Salomo yo
1We ma ne tǝtǝl a joŋ pam laa pǝ'nyahre, amma we ma bai tǝtǝl a joŋ mam swaa ɓǝ. 2Joŋ mai mo lwaa ɓo ne fahlii maɓea ah daŋ ka ga pel ne mo ya. Amma fan joŋ ma joŋ ne fahlii goŋga daŋ a ga ǝ̃ǝ mo zah wulli.
3Dǝɓlii ka ga soɓ dǝɓ sãh yea ne koŋn a, amma a ga cak dǝɓ ɓe' ka mo lwaako fan mai mo tǝ 'yahko ka. 4Bai joŋ yeɓ a ga joŋ mo yea pǝsyakke, amma mo tǝ joŋ yeɓ pǝlli ɓe, a ga joŋ mo yea ne fanne. 5Fakpãhpǝǝ dǝɓ ma ne yella mo swaa ɓe, a hǝǝ joŋ sǝ, amma ne cok ah dǝɓ ma tǝgwĩi ah a swan sǝŋ nanǝmmi.
6Eẽ Masǝŋ a yea ma tǝtǝl dǝɓ matǝ njaŋ, amma dǝɓ maɓe' ah ɓǝ faa ma ɓeɓ fan yea ma tǝkpuuzah ahe. 7Za ga foora ɓǝ dǝɓ sãh cẽecẽe, amma a ga yaŋra ɓǝ dǝɓ ɓe' gwari. 8Dǝɓ mai mo ne tǝtǝl mo cuura ɓǝ nyi ko ɓe, a syee mor ɓǝ ahe, amma dǝɓ mai moo faa zah tǝgwĩi a ga ciŋ ɓeɓ ahe. 9Dǝɓ mai moo syee ne goŋga, a ga syee jam, amma dǝɓ mai mo zyak fahlii ɓo, za ga tǝra ɓǝ ahe.
10Dǝɓ mai moo muŋ ɓǝ muŋ, a gin ne gaɓ tǝ zana. Amma dǝɓ mai moo lai dǝɓɓi, a gin ne jam. 11Ɓǝ faa zah dǝɓ matǝ njaŋ a gin ne jam, amma dǝɓ maɓe' ah ɓǝ faa ma ɓeɓ fan yea ma tǝkpuuzah ahe. 12Syiŋ a ur bal kǝsyil zana, amma 'yah a joŋ dǝɓ yaŋ ɓǝɓe' daŋ.#Yak 5:20; 1 Pe 4:8
13Dǝɓ mai mo ne tǝtǝlli, ɓǝ faa ah a yea ne fahlii, amma ɓǝ faa zah dǝɓ ma bai tǝtǝl a 'nam ɓǝ gin tǝl ah ne ko. 14Za ma ne fatan a taira fatan pǝlli, amma dǝɓ ma tǝgwĩi ah mo tǝ faa ɓǝ ɓe, gaɓ ka woŋ tǝtǝl ne ki pǝɗǝk ya. 15Dǝɓ ma ne joŋne, swah ah ye joŋ ahe, za masyak ɓǝ magaɓ ɓǝǝ ye syak ɓǝǝ mo ne ko. 16Dǝɓ matǝ njaŋ ah fan soo ah ye nǝn wo sǝr ahe, amma faɓe' a zaŋ dǝɓ maɓe' ka mo joŋko faɓe' ge pelle. 17Dǝɓ mai moo ɓaŋ syiŋ lai, a ga nǝn wo sǝrri, amma dǝɓ mai mo ka zyii kwan ɓǝɓe' ah ya, ka dan ɓo pǝ cok gaɓɓe.
18Dǝɓ mai moo muŋ syiŋ pǝ zahzyilli, ka dǝɓ tǝ vǝrvǝr o, moo cen fasyim kǝsyil zana, tǝgwĩi yo. 19Dǝɓ mo tǝ faa ɓǝ pǝlli ɓe, ɓǝɓe' ga yea gŋ pǝlli ta. Amma dǝɓ mai moo cak zah suu ah ka a ne tǝtǝlli. 20Ɓǝ faa zah dǝɓ matǝ njaŋ a tǝgbana vãm solai masãhe, amma ɓǝ foo zahzyil dǝɓ maɓe' ah ka ne yeɓ ya. 21Ɓǝ faa zah dǝɓ matǝ njaŋ a ga gbah jol za pǝlli, amma tǝgwĩi a ga wǝwul tǝ tǝgwĩi suu ahe.
22Dǝɓlii mo ẽe dǝɓ ɓe, ẽe ah gak joŋ dǝɓ ciŋ pa joŋne, joŋ yeɓ lii dǝɓ ka gak joŋko ciŋ pa joŋn a. 23Dǝɓ ma tǝgwĩi a laa pǝ'nyah ne joŋ ɓǝɓe', amma dǝɓ ma ne tǝtǝl a laa pǝ'nyah ne fatanne. 24Dǝɓ matǝ njaŋ a lwaa fan mai ako mo ne 'yah ahe, amma dǝɓ ɓe' a lwaa mǝ ah fan mai mo tǝ ɗuuko gal ah pǝlli. 25Ne cok gaɓ mo ge ɓe, a zyak dǝɓ ɓe', amma cẽecẽe za matǝ njaŋ a yeara jam.
26Mo pee dǝɓ vǝǝkoi joŋ yeɓ nyi mo ɓe, a ga yea wo ɓo tǝgbana fan mbǝ̃ǝ mai mo ruŋ syel ɓo nyi mo, wala tǝgbana suŋwii mai mo ge ɓo mo nahnǝnni.
27Mo ɗuu Dǝɓlii ka mo nǝn wo sǝrri. Za faɓe' a hǝǝ wukra ma kǝpel mai cok wul ɓǝǝ mo ge. 28Byak fan mai dǝɓ matǝ njaŋ mo ne ko, in zah ah ye laa pǝ'nyahre, amma mǝ za faɓe' ka lwaara fan ki ya. 29Dǝɓlii a byak za ma bai ɓǝɓe', amma a muŋ za mai moo joŋra faɓe'. 30Cẽecẽe za matǝ njaŋ a ga yeara jam, amma za faɓe' ka ga nǝnra wo sǝr a. 31Za matǝ njaŋ mo tǝ faara ɓǝ ɓe, a faara ne fatanne. Amma za faɓe' mo tǝ faara ɓǝ ɓe, Masǝŋ a ga yee ga nyi ra zahe. 32Za matǝ njaŋ ah tǝra ɓǝ mai moo gak gbah jol za ɓe, amma cẽecẽe za faɓe' a faara ɓǝ mai moo ɓeɓ zahzyilli.
Bible Moundang © Alliance Biblique du Tchad, 1996.