ƁƏ TƏƁOROO 28
28
1Za faɓe' sye, za mo ka tǝ nĩi mor ɓǝǝ gan a laŋ, a rǝkra ɗul ga nooko. Amma dǝɓ matǝ njaŋ ah a pǝswah tǝgbana ɓolle.#Lew 26:36; CuuƁ 28:28; Esa 57:21 2Sǝr mo ne zaluu masãh ma ne tǝtǝl ɓe, a yea pǝswahe, a nǝn ta, amma sǝr ah moo joŋ faɓe' ɓe, a yea ma ne fer zaluu zǝ̃ǝzǝ̃ǝ. 3Dǝɓ mai mo ne swah jolle, so moo cuu syak nyi za syakke, a tǝgbana bam tan lii mai moo ɓeɓ fakpãhpǝǝ. 4Mo ka tǝ zyii ɓaŋ syiŋ ɓǝ lai ya ɓe, ka amo ne za maɓea ahe, amma mo tǝ syee mor ɓǝ lai ɓe, ka mo ka ne ra ya.
5Za faɓe' tǝra goŋga sye a naino ya, amma za mai moo ɗuura Dǝɓlii tǝra mor ah ɓe. 6Pǝram yea pa syak tǝkine joŋ fan tǝ goŋga kal ma yea pa joŋ so fahlii ɓo moo yea vǝrvǝr ɓe. 7We tǝbanna mai moo syee mor ɓǝ lai ka a ne tǝtǝlli, amma mai moo gbah bai ne za ma kaa karelle, ka tǝ kyeɓ swãa lwaa pam ne ko. 8Mo ɓoo joŋ ɓo ge pel ne fahlii reba maɓea ah tǝkine nyiŋ fan jol za mai mo ɓaŋra val jol ɓo ne ɓǝ nyiŋ bii ah gai mo gŋ ɓe, joŋ ɓo ga pii soo ga jol za mai moo kwanra syak tǝ za syakke.
9Mo ka tǝ syee mor ɓǝ lai ya ɓe, Masǝŋ ka ga laa juupel ɓo pǝ'nyahr a. 10Dǝɓ mo kǝǝ za matǝ njaŋ ah zyak fahlii ɓe, ɓǝɓe' ah ga pii soo ga tǝ suu ahe. Amma dǝɓ ma bai faɓe' a ga lwaa faren ahe. 11Cẽecẽe za joŋ a lǝŋra rǝ tǝ fan ɓo, amma pa syak ma ne tǝtǝl a ga tǝ ɓǝ ɓǝǝra. 12Ne cok za matǝ njaŋ ah ra mo lwaara swah ɓe, za daŋ a joŋra fĩi ne ɓǝ ahe, amma ne cok za maɓea ah ye mo lwaa swah ge mor jol ɓe, za daŋ a ɗuura galle.
13Mo muŋ faɓe' ɓo ɓe, mo ka yea ne pejii pǝ fan joŋ ɓo ya. Mo kee faɓe' ɓo mo ɗii marvǝǝ tǝ ɓǝ ah ɓe, Masǝŋ ga kwo syak tǝ ɓo. 14Mo ɗuu Dǝɓlii cẽecẽe, mo ga laa pǝ'nyahre, amma mo yer zahzyil ɓo ɓe, mo ga muŋ. 15Za masyak ara ka pǝswah ka faa ɓǝ ka wǝǝ suu ɓǝǝ gin jol goŋ maɓe' ne ya. Mor dǝɓ ah a tǝgbana ɓol mai moo ɓyaŋ ɓǝ, a tǝgbana kpiŋ mai koŋ mo i ɓo. 16Dǝɓ mai mo kaa goŋ ɓo mo ka ne tǝtǝl a ɓe, a ga ge ne gaɓ tǝ za pǝlli, amma goŋ mai mo syiŋ fahlii maɓe' ah ɓo, goŋ ah ga nǝnni. 17Dǝɓ mai mo joŋ ɓǝɓe' mo i wul ɓo a cii pal suu ah ne suu ahe, mo yee zah ah ka.
18Dǝɓ mai moo syee ne goŋga a ga yea jam, amma dǝɓ mai moo syee ne vǝrvǝr a ga leere. 19Pa pǝpǝǝ mai moo joŋ yeɓ pǝlli, a ga re farel kǝ̃ǝre. Amma za mai moo muŋra cok tǝkolle, a ga yeara pǝsyakke. 20Dǝɓ matǝ goŋga a ga laa pǝ'nyah pǝ zah'nan cee ahe, amma dǝɓ mo tǝ hǝǝ ka ciŋ pa joŋ ɓe, dǝɓ ah ga lwaa kiita.
21Joŋ za pǝ cok kiita camcam ka pǝsãh ya, za lakaali manyeeki ah a joŋra faɓe' mor ka lwaa farel maa ga zah ne biŋ nai to. 22Dǝɓ ma cwaa fan a hǝǝ ka zye lwaa joŋ gwari, ka tan sõone syak tǝ yah gin zyaŋ ne ki ya.
23Mo lai dǝɓɓi, fahfal ah a ga laa pǝ'nyah ne ɓǝ ah kal ɓǝ faa zah 'nyahre. 24Dǝɓ mo kiŋ fan jol pah ah wala mah ahe, mo so faa zye joŋ faɓe' ya ɓe, ka a tǝki vaŋno ne za kaafuu. 25Dǝɓ ma cwaa fan lii a kyeɓ balle. Amma dǝɓ mai mo soɓ suu ah ɓo wo Dǝɓlii a ga yea jam.
26Tǝgwĩi ye dǝɓ mai moo syee mor ɓǝ foo zahzyil ah to. Sãh ah ye ka dǝɓ mo syee mor ɓǝ fatan za fatanne. 27Mo nyi fan nyi pa syakke, fan ki ka ga pee mo ya. Amma mo jiŋ fahfal ɓoo nyi ra ɓe, za ga tǝǝra mo. 28Ne cok za maɓea ah mo kaa goŋ ɓe, za ga ɗuura galle. Amma ne cok mo leera ɓe, za matǝ njaŋ ah a ga kaara goŋ faɗa.
Bible Moundang © Alliance Biblique du Tchad, 1996.