ƁƏ TƏƁOROO 29
29
1Dǝɓ mai moo joŋ ɓǝɓe' cẽecẽe so za moo laira ko ne ɓǝ ah moo yer zahzyilli, comki a ga ɓeɓ tǝɗe', syiŋ ah ka ga yea ya. 2Ne cok dǝɓ matǝ njaŋ ye mo kaa goŋ ɓo ɓe, za laara pǝ'nyahre. Amma ne cok dǝɓ maɓe' ah ye mo ne swah mor jol ɓe, za yera yee.#ƁǝT 11:10; 28:12,28
3Mo tǝ 'yah fatan ɓe, pa ɓo ga yii suu ah ne ɓǝ ɓo. Amma dǝɓ mo tǝ ɓeɓ lak ah tǝ ɓǝ matǝkoi ɓe, ka tǝgwĩi yo. 4Ne cok goŋ mo gbǝ sǝr ah ɓo pǝsãh ɓe, za sǝr ah ga yea pǝswahe, amma goŋ mo tǝ foo ɓǝ lak to ɓe, a ga ɓeɓ sǝr ahe.
5Dǝɓ mo faa zah 'nyah ma ne vǝrvǝr gŋ nyi bai ah ra ɓe, ka saa mǝmmǝǝ ɓo ka gban suu ah ne ko. 6Faɓe' za faɓe' a so jin gbah ra soo sǝŋ, amma za matǝ njaŋ a laara pǝ'nyah cẽecẽe, mor ara ne tǝtǝl suu ɓǝǝra. 7Dǝɓ matǝ njaŋ tǝ mor ɓǝ pa syak ɓe, amma za faɓe' ka tanra mor ɓǝ mai ya. 8Za mai mo ka ɓaŋra syiŋ ɓǝ za ki ya, a ga kǝǝra yaŋ ne lii ah daŋ ur ɓǝ, amma za matǝ njaŋ a byakra fan daŋ pǝsãhe.
9Ne cok dǝɓ ma ne tǝtǝl ah mo tǝ faa ɓǝ ne tǝgwĩi ɓe, tǝgwĩi a ɓaŋ kpãhe, wala a syesyakke, amma ne daŋ laŋ jam ka yea pǝ zahzyil a. 10Za mai mo ne koŋ ɗuu syim pǝ zahzyilli, a syiŋra dǝɓ matǝ goŋga ah syiŋ, amma za matǝ njaŋ a byakra dǝɓ ahe. 11Tǝgwĩi a soɓ kpãh ah pǝ̃ǝ gin lal taŋraŋ, amma dǝɓ ma ne tǝtǝl a rõmme, a cak zah ahe.
12Ne cok dǝɓlii sǝr moo nyiŋ ɓǝ ber ɓe, za yeɓ ah ra daŋ a ga ciŋra za berre. 13Pa joŋ ne pa syak ara zahki mor Dǝɓlii ye tǝ sǝǝ cokfãi tǝ ɓǝǝ gwa daŋ. 14Goŋ mo tǝ cam tǝtǝl za syak ɓe, a ga nǝn tǝ goŋ ahe.
15Lai wee nyee tǝkine loɓ ra a pǝsãhe. We mo ɓaŋ fahlii ma syak ah ɓo ɓe, a ga joŋ swãa ga re mamme. 16Ne cok za faɓe' mo kaara goŋ ɓo ɓe, faɓe' laŋ a ga pelle, amma za matǝ njaŋ a ga kaara ka ẽe tǝjok ɓǝǝ mo ga jokra. 17Mo lai we ɓo, mo ga yii suu ne ɓǝ ah pelle, ka ga joŋ fan ma ren swãa ɓo ya.
18Sǝr mai Masǝŋ ye mo ka tǝ syee ne ya, ɓǝ ah ka yea ne fahlii ya. A pǝ'nyah wo dǝɓ mai moo syee mor ɓǝ lai Masǝŋ. 19Dǝɓ ka lai byak ne ɓǝ faa zah to ya, maki mo tǝ mor ah ɓe, ka ga zyii ɓaŋ syiŋ ɓǝ ah ya. 20Dǝɓ mai moo faa ɓǝ gwari mo ka foo ɗǝ ya, pǝram tǝgwĩi gin tǝl ahe. 21Mo cii dǝɓ yeɓ ɓo ne nyi fan nyi ko daga laŋ sǝ ɓe, comki fan ɓo daŋ a ga ciŋ mǝ ahe.
22Za mai moo ɓaŋra kpãh gwari a kǝǝra bal ur tǝkine ɓǝ gaɓɓe. 23Dǝɓ mai moo yii suu ahe, a ga leere, amma dǝɓ mai moo wonsuu ahe, a ga yiira ko. 24Dǝɓ mai moo gban zah ne nyinni, ka syiŋ cee suu ah ɓo. Mo ge faa goŋga ɓǝ ah cok kiita laŋ, a ga ŋgoŋra kiita tǝl ahe. Mo so zyii ka faa goŋga ɓǝ ah ya, tǝkẽawãk Masǝŋ ga ge tǝl ahe.
25Mo tǝ ɗuu nahnǝn dǝfuu ɓe, ka gaɓ yo, amma mo soɓ suu ɓo wo Dǝɓlii ɓe, mo ga yea jam. 26Koo zune daŋ a 'yah dǝɓ malii ah mo faa ɓǝ sãh tǝ 'minni, amma Dǝɓlii ye pa ma joŋ syedowal goŋga tǝ dǝɓɓi. 27Za matǝ njaŋ a syiŋra ɓǝɓe' za faɓe' syiŋ, za faɓe' laŋ a syiŋra yeɓ sãh za matǝ njaŋ syiŋ ta.
Bible Moundang © Alliance Biblique du Tchad, 1996.