ƁƏ TƏƁOROO 27
27
1Mo yii suu ɓo ne ɓǝ fan mai mo ga joŋ tǝ'nan ka, mor mo tǝ fan ma ga joŋ kǝsyil tǝ'nah ne tǝ'nan a.#Yak 4:13-16 2Mo soɓ za ki ye mo yiira mo, mo yii suu ɓo ne suu ɓo ka.
3Tǝsal a yea pǝyǝkki, tǝkuu laŋ a yea pǝyǝkki, amma gaɓ mai tǝgwĩi moo gin ne ko, yǝk ah kal fan marai ɓe. 4Kpãh sye a pǝgaɓɓe, a gak muŋ dǝɓɓi, amma fan ma ɓaŋ lii zahki ne tǝwon ɓe' kǝka.
5Pǝram lai dǝɓ tǝ ɓǝ fan joŋ ah lal taŋraŋ kal mai moo fooko mo ka tǝ ɓaŋ syiŋ 'min a ɓe. 6Bai 'yah ɓo mo kan syim wo ɓo laŋ, a pǝsãhe, amma pa syiŋ ɓo mo haozah wo ɓo ne vǝrvǝr pǝ zahzyil ɓe, a pǝɓe'. 7Ne cok dǝɓ mo re farel kǝ̃ǝ ɓo ɓe, koo tǝnjwǝǝ laŋ ka zyii 'yah yao, amma mo ne koŋ ɓe, koo farel maɓea ah laŋ a yea zah ah pǝ'nyahre.
8Dǝɓ mo ka yaŋ ah ya ɓe, a tǝgbana juu mo ka pǝ kol ah ya moo yea ma lalle. 9Nǝm tǝkine ɓǝrdi a joŋ dǝɓ laa pǝ'nyahre. Nai ta, bai masãh ah a joŋ moo laa suu ɓo pǝswahe. 10Mo yaŋ ɓǝ bai ɓo ra wala bai pa ɓo ra ka. Ne cok mo dan gaɓ ɓe, mo fii naa pa ɓo ka gbah jol ɓo to ka, mor jǝk ɓo matǝ gwari a gak gbah jol ɓo kal naa pa ɓo mai mo ka wo ɓo gwari ya.
11We ɓe, mo yea ne fatanne, me ga laa pǝ'nyahre, me ga lwaa ɓǝ ka zyii zah za mai mo tǝ faara ɓǝɓe' tǝ ɓe mor ɓǝ ɓo. 12Dǝɓ ma ne tǝtǝl a kwan gaɓ mo tǝ gin pel ah a ɗuu muŋni, amma dǝɓ ma bai tǝtǝl ah a syee ga haihai, a ga dan pǝ gaɓ ahe. 13Dǝɓ ma tǝgwĩi ah a nyiŋ ɓǝ val dǝɓ ki kan ga tǝ suu ah ka sooni, a soɓ ɓǝ kyeɓ ma ka syak ah ka sooni. 14Dǝɓ mo haozah wo bai ah ne kyaŋ lii ne zah'nan pim ɓe, a ga yea tǝgbana tǝǝ ko ɓo tǝǝre.
15Mawin mai mo yea ma ne kyãh ɓǝ nyee mgbǝrẽe mgbǝrẽe a tǝgbana bam pyak mai moo zyer zah zãa yaŋ. 16Mo ka gak cak zah ah ka mo kaako 'wa ya. Mo cak zah ah ɓe, ka mo yee zah zyakke, wala mo gak gbǝ nǝm ne jol ta.
17Dǝfuu feera fan gin wo ki tǝgbana vãm moo yee syel vãm ki. 18Dǝɓ mai mo zyeɓ mor kpuu maŋgo ah pǝsãh ɓe, a ga lwaa lee ah re. Dǝɓ yeɓ mai moo joŋ yeɓ nyi pah yaŋ ah pǝsãhe, a ga lwaa yǝkki. 19Tǝgbana moo kwan cee zahpel ɓo ga mor bii mo jur mo ɓo, mo kwan suu ɓo pǝ zahzyil suu ɓo nai ta.
20Fan 'yah zahzyil dǝfuu a tǝgbana palle, ka kǝ̃ǝ kpee ya. 21Wii a lii vãm kaŋnyeeri ne vãm solai, fan ma lii zahzyil dǝfuu laŋ a no ta. 22Koo mo i tǝgwĩi kan zah wul taa laŋ, a ga yea pǝ tǝgwĩi katãako.
23Mo byak faɓal ɓo ra pǝsãhe. 24Mor joŋ ka nǝn ga lii ya, koo goŋ sǝr laŋ ma nen ga lii kǝka. 25Amo saŋ wom ne hah goo pǝ̃ǝ ma tǝgee ah laŋ gin yaŋ ne ko, zah ah a so zyeeni. 26Amo gak cuŋ mbǝro ne syiŋ pǝsǝ̃ǝ ɓo, mo gak lee 'wah ne lak tǝ mǝ sǝgwii ɓo mo lea fan ɓo ne ko. 27Tǝcoŋ ah mo coŋ ɓo mo ga ŋhǝǝ won ah zwǝ ne za yaŋ ɓo tǝkine za yeɓ ɓo maŋwǝǝ daŋ.
Bible Moundang © Alliance Biblique du Tchad, 1996.