ƁƏ TƏƁOROO 26
26
ɓǝ kikiŋ
1Tǝgbana syaŋ moo gin tan ne cok kalle, wala bam mai moo gin tan ne cok mai za mo ka tǝ pǝpǝǝ yao, yǝk laŋ a wo tǝgwĩi bai yeɓ nai ta. 2Zahyee mai dǝɓ moo ɓoo nyi dǝɓ mo ka yea ne mor a, a tǝgbana juu ma ɗii ne bǝbala moo yea sǝŋ, ɓǝ zahyee ma morãi a nai ta.
3Bǝrǝǝ a mor loɓ korro, sǝgǝǝ a mor maa nyi pǝrri, kǝndaŋ laŋ a mor in tǝgwĩi.#Lǝŋ 32:9-10; ƁǝT 10:13 4Mo zyii ɓǝ zah tǝgwĩi na ɓǝ faa tǝgwĩi ah ta ka, mor ka mo yea na ko ka. 5Mo zyii ɓǝ zah tǝgwĩi tǝgbana ɓǝ faa tǝgwĩi ah mo faako ɓo, ka mo kwoko suu ah na dǝɓ ma ne tǝtǝl ka.
6Dǝɓ mai moo pǝǝ tǝgwĩi ne ɓǝ faa ahe, ka a tǝgbana ŋgom tǝwee ɓal suu ah ɓo, ko ka kyeɓ gaɓ lwaa suu ah ne ɓe. 7Tǝgbana ɓal mai mo lelem ɓo, mo ka pǝswah ya, Ɓǝ tǝɓoroo zah dǝɓ ma tǝgwĩi ah laŋ ka ne yeɓ ya nai ta. 8Dǝɓ mo yii ma tǝgwĩi ɓe, ɓǝ ah ka ne yeɓ ya, a tǝgbana dǝɓ moo baŋ tǝsal ɓǝr garviŋ ne suu ka so 'nǝǝni.
9Ɓǝ tǝɓoroo mai tǝgwĩi moo faani, a tǝgbana waa mai mo cuŋ jol ɓo nyi pa zwan yimmi. 10Dǝɓ mai moo syea tǝgwĩi ka mo joŋ yeɓ nyi ko, ɓǝ ah tǝgbana gao moo 'nǝǝ za ma pǝ̃ǝ fahlii ne guu. 11Tǝgwĩi mo so jin ɓo tǝ joŋ fan joŋ ah ɓe, a tǝgbana goo mai mo zwǝǝ zah ɓe moo so jin lahni. 12Pǝram tǝgwĩi gin tǝ dǝɓ mai mo lǝŋ zye tǝ fan ɓo, so tǝ fan ki laŋ ya.
13Vǝǝkoi ka zyii pǝ̃ǝ ɓǝr yaŋ ga lal a, a ɗuu gal a faa: Ɓol ga gbǝ zye. 14Tǝgbana zahfah bab moo jin pǝ cok dǝ̃ǝ tãa, vǝǝkoi laŋ a fer tǝ faswul ah ṽǝlaa ṽǝlaa bai ga cok ki nai ta. 15Za ki ara pǝ vǝǝkoi ne bǝǝ wol maa ga zah ka syak ɓǝǝra. 16Vǝǝkoi ga lǝŋ azye tǝ fan kal za camcam rǝŋ moo gak cuura ɓǝ foo sãh ɓǝǝ gin lal ɓe.
17Dǝɓ mai moo dan kǝsyil bal mai ɓǝ ah mo saaŋ ko ya, a tǝgbana dǝɓ mai moo gban sok nyi goo ne jolle. 18-19Dǝɓ mai moo kǝǝ za zyak moo kwan tǝgbana zye tǝ joŋ ɓǝ syakke, a tǝgbana tǝgwĩi moo joŋ kyẽm ne fan mai moo in dǝɓ pǝ wulli.
20Zahwii mo ka tǝ wii ya ɓe, wii a rummi. Nai ta, pa ryak suu mo kǝka ɓe, bal ga vǝrri. 21Zahwii a joŋ ka wii mo sye, yak laŋ a joŋ ka yakwii mo yea goroo, pa ma kyeɓ bal laŋ a joŋ ka bal mo ge pelle. 22Ɓǝ faa ɓǝɓe' dǝɓ ki a tǝgbana farel ma'nyah ah dǝɓ moo sǝ̃ǝ ga ɓǝrri.
23Dǝɓ ma zah 'nyah mai so zahzyil ah mo pǝɓe', a tǝgbana cii vuu mai mo ɓaŋra vãm solai ge ɓo wol ah moo sǝsãhe. 24Dǝɓ matǝ vǝrvǝr ah a lal muŋ syiŋ mai mo pǝ zahzyil ah nǝn ɓǝ faa zah 'nyah ahe. 25Ɓǝ faa ah a yea pǝ'nyahre, amma mo nyiŋ ɓǝ ah ka, mor syiŋ baa ɓo pǝ zahzyil ah gǝɓ. 26A ga muŋ syiŋ ah mo ne ko ne vǝrvǝr ahe, amma za daŋ a ga kwora fan maɓe' ah mai moo joŋko. 27Za mai moo saara mǝmmǝǝ pel za ki, a ga jinra gbah suu ɓǝǝ ne ko. Za mai moo ciira lak pel za ki, a ga jinra lea ga gŋ ne suu ɓǝǝra. 28Dǝɓ mai moo gwah berre, a syiŋ goŋga syiŋ. Ɓǝ faa zah 'nyah ma ne vǝrvǝr ka gin ne fan ki ya, sai ɓeɓɓe.
Bible Moundang © Alliance Biblique du Tchad, 1996.