ƁƏ TƏƁOROO 13
13
1We ma ne tǝtǝl pam mo tǝ lai ko ɓe, a ɓaŋ syiŋ ahe. Amma we ma bai tǝtǝl ka laa lai ya. 2Za matǝ njaŋ ah a ga lwaara reba ɓǝ faa sãh ɓǝǝra. Amma za maɓea ah ara ne koŋ joŋ ɓǝɓe'. 3Mo joŋ yella ne ɓǝ faa ɓo, mo byak suu ɓo, dǝɓ mai moo faa ɓǝ bai foo ɓǝ ah a ɓeɓ suu ahe. 4Vǝǝkoi mo 'yah yea ne fan pǝlli ɓe, ka ga lwaa fan ah ya, amma dǝɓ ma joŋ yeɓ lii a ga lwaa fan mai zahzyil ah mo 'yah daŋ. 5Dǝɓ matǝ njaŋ a syiŋ ber syiŋ, amma dǝɓ ɓe' a joŋ fan ma ren swãa ah ne maɓea ahe. 6Njaŋ a byak za ma bai ɓǝɓe', amma ɓǝɓe' a lee za faɓe' leere.
7Dǝɓ ki a joŋ suu ah na pa joŋne, amma ka so yea ne fan ki ya. Dǝɓ ki laŋ a joŋ suu ah na pa syakke, amma a so yea ma ne fan pǝlli. 8Pa joŋ a kyeɓ ka ǝ̃ǝ suu ah ne joŋ ahe, amma za ka foora mor pa syak ya.
9Dǝɓ matǝ njaŋ ah a tǝgbana cokfãi mai moo sǝǝni, amma dǝɓ ɓe' a tǝgbana pitǝrla mai wii ah mo rum ɓo. 10Yii suu ka gin ne fan ki ya sai gaɓɓe, amma za mai moo nyiŋra yella masãhe, a tanra fanne. 11Joŋ mai dǝɓ moo lwaa gwari nai sǝ a vǝr gwari ta, mai dǝɓ moo lwaa ga nje nje a ga pelle.
12Dǝɓ mo byak fan liilii mo lwaa ya ba ɓe, a ɓeɓ zahzyil nyi dǝɓɓi, amma mo lwaa fan mai mo ne 'yah ah ɓe, a nyi swah nyi ko. 13Dǝɓ mo syẽa yella masãh ah mai za mo cuu nyi ɓe, ka tǝ ɗii ɓeɓ gin tǝ suu ah ne ko, mo syee mor yella ah ɓe, mo ga kaa jam. 14Fan cuu za ma ne fatanne, a tǝgbana bii wok ma wuu suu nyi dǝɓɓi. Ne cok mo dan gaɓ ɓe, a ga gbah jol ɓo mo ǝ̃ǝ. 15Dǝɓ mo ne tǝtǝl ɓe, a lwaa sãa, amma za mai ara ye mo ka za tǝ goŋga ya, ɓaŋra fahlii muŋ ɓo. 16Dǝɓ matǝ goŋga ah cẽecẽe a foo ɓǝ ɗǝ ko a joŋ fan ba. Amma dǝɓ ma tǝgwĩi a cuu tǝgwĩi suu ah gin lalle.
17Papee maɓe' ah a kǝǝ za dan pǝ cok gaɓɓe, amma papee masãh ah a gin ne ɓǝ ma nyi jam nyi zana. 18Dǝɓ mai mo ka zyii laa lai ya, a ga yea pǝsyakke, swãa ga re ko. Amma dǝɓ mai moo laa lai, a ga yea pǝyǝkki. 19Dǝɓ mo lwaa fan mai mo tǝ 'yahko ɓe, a wol ah pǝsãh no cam. Za ma tǝgwĩi ah ka zyiira woŋ ki ne faɓe' ya.
20Dǝɓ mo tǝ syee ne za fatan ɓe, a ga tǝ fan ta, dǝɓ mo tai ki ne za ma tǝgwĩi ah ɓe, dǝɓ ah ga laa bone. 21Ɓeɓ a foo mor za faɓe' pǝ cok daŋ. Amma za matǝ njaŋ a ga lwaara reba fan masãhe. 22Dǝɓ sãh a ga soɓ fan nyi wee ɓǝr nan ah fahfalle, amma fan mai za faɓe' mo ne daŋ a ga ciŋ mǝ za matǝ njaŋ. 23'Wah mai pa syak mo pǝǝ kǝnah ɓe, moo gak joŋ fan nyi pǝlli, amma 'wah ah ɓeɓ mor za ma bai goŋga mo cakra pǝǝ ahe.
24Mo ka tǝ loɓ we ɓo ya ɓe, ka mo ka tǝ 'yah ko ya, amma mo tǝ 'yah ko no ɓe, mo gak loɓ ko.
25Za matǝ njaŋ a lwaara farel ren kǝ̃ǝ cẽecẽe, amma za faɓe' ma ɓǝǝ a yeara ma ne koŋ cẽecẽe.
Bible Moundang © Alliance Biblique du Tchad, 1996.