ƁƏ TƏƁOROO 12
12
1Dǝɓ mo tǝ 'yah lai ɓe, ka tǝ 'yah fatanne. Tǝgwĩi ye dǝɓ mai mo ka 'yah dǝɓ mo lai zye ya. 2Dǝɓlii a laa pǝ'nyah ne za matǝ goŋga. Amma a ŋgoŋ kitta tǝ za ma foora ɓǝɓe'. 3Ɓǝɓe' ka joŋ dǝɓ kaa jam ya. Amma za matǝ njaŋ ah a ga uura pǝswahe. 4Mawin masãh ah yǝk wor ah ne laa pǝ'nyah ah yo. Amma moo joŋ fan joŋ bai swãa ɓe, ka a wol ah tǝgbana syem ma ɗii ne lwaamolii pǝ woiŋ ahe.
5Za matǝ njaŋ a ga joŋra mo pǝsãhe, mǝ za faɓe' sai a kyeɓra ka joŋ vǝrvǝr ne mo. 6Ɓǝ faa zah za maɓea ah a ik wulli, amma ɓǝ faa zah za matǝ njaŋ a wǝǝ zana. 7Za maɓe' mo wukra ɓe, ka soɓra morsǝ̃ǝ ɓǝǝ fahfal ao, amma yaŋ mǝ za matǝ njaŋ a ga yea fahfal ɓǝǝra. 8Mo ne tǝtǝl ɓe, za ga yiira mo, amma mo ka ne tǝtǝl a ɓe, za ga kwora mo na fan kolle.
9Pǝram yea dǝɓ makol ah mai za mo ka kwan na dǝɓ ya, moo so joŋ yeɓɓe, kal dǝɓ mai moo kwan suu ah pǝyǝk moo so yea ne koŋ ɓe. 10Dǝɓ matǝ njaŋ ah a ẽe faɓal ah ra, amma za maɓea ah ka ɓaŋra syiŋ faɓal ɓǝǝr a. 11Dǝɓ mai moo pǝǝ 'wah ahe, a lwaa farelle, amma dǝɓ mai moo joŋ yeɓ makol ah mai mo ka ne mor a, tǝgwĩi yo. 12Fan mai za faɓe' moo 'yahra, a 'yahra ka rǝ lwaa faɓe' joŋ, amma za matǝ njaŋ a uura pǝswahe. 13Ɓǝ faa zah dǝɓ ɓe' a jin gban sol nyi ko na mǝmmǝǝ, amma dǝɓ matǝ njaŋ ah a ǝ̃ǝ suu ah gin zah ɓǝ gaɓɓe. 14Dǝɓ lwaa reba tǝgba ɓǝ faa zah ah tǝkine fan joŋ ahe, zune daŋ a ga lwaa reba tǝgbana yeɓ ahe.
15Dǝɓ ma tǝgwĩi ah a foo tǝgbana fan joŋ 'min a pǝsãhe. Amma dǝɓ mo cuu yella nyi dǝɓ fatan ɓe, a laani. 16Dǝɓ ma tǝgwĩi mo ɓaŋ kpãh ɓo ɓe, za tan ɓǝ ah gwari, amma dǝɓ ma ne tǝtǝl ka ɓaŋ syiŋ ɓǝ mai za mo faa ɓo kal ah ya. 17Dǝɓ ma faa goŋga, a faa ɓǝ ma ne fahlii, amma pa ma joŋ syedowal ber a faa ɓǝ maɓe' ahe. 18Dǝɓ mai moo faa ɓǝ mo ka foo ɗǝ ya, ɓǝ ah a ŋgoŋ dǝɓ tǝgbana nyahe, amma ɓǝ faa dǝɓ ma ne tǝtǝl a gak ruŋ nwãh ahe. 19Dǝɓ ma gwah berre, syii ah ga yea pǝcõo, amma dǝɓ mai moo faa goŋga, a yea ga lii.
20Za mai moo foora ɓǝɓe' pǝ zahzyilli, a zyakra zana, amma za mai moo gbahra jol zana, a ga laara pǝ'nyahre. 21Ɓeɓ ka lwaa dǝɓ matǝ njaŋ ah ya, amma za maɓe' ka lwaara fan ki ya sai gaɓɓe. 22Dǝɓlii syiŋ pa ma gwah ber ɓo syiŋ, amma a laa pǝ'nyah ne za mai moo byakra zah ɓǝǝra. 23Dǝɓ ma ne tǝtǝl mo tǝ ɓǝ fan laŋ, ka faa ɓǝ ah ya, amma za ma tǝgwĩi ah a cuura tǝgwĩi suu ɓǝǝ gin lalle.
24Dǝɓ moo joŋ yeɓ pǝlli ɓe, a kaa swah tǝ zana, amma dǝɓ mo pǝ vǝǝkoi ɓe, a joŋ ko ciŋ byakke. 25Ɓǝ swaa a nĩi ɓǝ 'nyah wo dǝɓ kalle, amma ɓǝ ma'nyah ah a joŋ suu dǝɓ laa pǝ'nyahre. 26Dǝɓ matǝ njaŋ a lii ɓal syel ah cẽecẽe, amma za maɓea ah fahlii ɓǝǝ a jin ciŋ muŋ ɓǝǝra. 27Dǝɓ matǝtǝ̃ǝ ah ka gak lwaa gban fan mai mo tǝ kyeɓko ya. Amma dǝɓ ma joŋ yeɓ lii a ga lwaa fan masãh ahe. 28Njaŋ sye, fahlii cee yo, tǝgwĩi laŋ#12:28 Tǝgwĩi: wala ɓǝɓe': Tǝgwĩi tǝkine ɓǝɓe' pǝ ɗerewol Ɓǝ tǝ ɓoroo a woki gwari., fahlii wul o.
Bible Moundang © Alliance Biblique du Tchad, 1996.