ƁƏ TƏƁOROO 14
14
1Mawin mai mo ne tǝtǝl a gban yaŋ ah pǝsãhe, amma mawin mai mo ka ne tǝtǝl a ka ɓaŋ syiŋ yaŋ ah ya. 2Mo tǝ syee njaŋ ɓe, ne mai mo ga cuu mo tǝ ɗuu Dǝɓlii. Mo tǝ syee vǝrvǝr ɓe laŋ, a ga cuu mo ka tǝ ɗuu ko ya. 3Dǝɓ ma tǝgwĩi ah yii suu kǝǝ ko faa ɓǝ pǝlli, amma dǝɓ ma ne tǝtǝl ɓǝ faa zah ah a byak ko. 4Mo ka ne dǝǝ pǝpǝǝ ya ɓe, ka mo ka ne fakpãhpǝǝ ya ta. Amma mo ne ɓe, mo gak lwaa fakpãhpǝǝ pǝlli.
5Pa syedowal matǝ goŋga ka gwah ber a, amma pa syedowal ma bai goŋga, yeɓ ah ye berre. 6Dǝɓ ma yii suu ka tan fan ki ya, amma dǝɓ ma ne tǝtǝl ka fee fan pǝgaɓ ya. 7Mo woŋ ki ne za ma tǝgwĩi ah pǝɗǝkki, mor ara ka ne fan ki ka cuu nyi mo ya. 8Dǝɓ ma ne tǝtǝl a tan fan mor fẽene? Mor a tan fahlii fan mai ka zye joŋ. Dǝɓ ma tǝgwĩi a yea pǝ tǝgwĩi mor fẽene? Mor a lǝŋ zye tǝ fan ɓo. 9Za ma tǝgwĩi ah mo joŋra faɓe' ɓe, ka ɓaŋra syiŋ ɓǝ ah ya, amma za matǝ goŋga ah a 'yahra Masǝŋ mo rõm ra tǝ ɓǝ ahe.
10Mo lwaa ɓǝ ma'nyah ah ɓe, ka mo lwaa ɓo ka syak ɓo, mo lwaa ɓǝ maɓe' ah laŋ, ka mo lwaa ɓo ka syak ɓo ta. Mor dǝɓ ma laa 'nyah ah koo gaɓ ah ne mo kǝka.
11Yaŋ za faɓe' a ga vǝrri, amma Masǝŋ ga ẽe yaŋ za matǝ njaŋ. 12Fahlii mai mo lǝŋ ɓo fahlii masãh ah yo, in zah ah wul o.#ƁǝT 16:25 13Dǝɓ gak muŋ ɓǝ swaa ne syesyakke, amma ne cok ɓǝ 'nyah mo zol kal ɓe, ɓǝ swaa gin dai gŋ. 14Dǝɓ ɓe' a ga re reba ɓǝɓe' ahe, amma dǝɓ sãh a ga lwaa soo yeɓ sãh ah mo joŋko. 15Dǝɓ ma tǝgwĩi ah a nyiŋ ɓǝ ne lii ah daŋ, amma dǝɓ ma ne tǝtǝl a ẽe ɓal syel suu ah moo syeeni. 16Dǝɓ ma ne tǝtǝl a joŋ yella ka zye dan pǝ ɓǝ magaɓ ah ka, amma dǝɓ ma tǝgwĩi ah ka byak suu ah ya, a dan pǝ ɓǝ haihai.
17Dǝɓ mai mo ne kpak ma ɓaŋ kpãh a joŋ fan joŋ tǝgwĩi, amma dǝɓ mai mo ne tǝtǝl a yea 'wa. 18Za ma bai tan fan a ga rera reba fan joŋ tǝgwĩi ɓǝǝra, amma za ma ne tǝtǝl a ga lwaara ɓǝǝ fatanne. 19Za faɓe' a ga ɗǝmra ga sǝŋ pel za matǝ njaŋ, a ga syeara fan jol ɓǝǝra. 20Dǝɓ masyakke, koo pa jǝk ah laŋ ka laa pǝ'nyah ne ɓǝ ah ya, amma pa joŋ a lwaa bai pǝpãare. 21Mo 'yah ka laa pǝ'nyah ɓe, mo kwo syak tǝ pa syakke, mor dǝɓ mo tǝ syẽa za ki ɓe, ka tǝ joŋ faɓe'.
22Mo tǝ joŋ fan masãh ah ɓe, za ga syiira sok tǝ ɓǝ faa zah ɓo, a ga yiira mo. Amma mo tǝ joŋ faɓe' ɓe, ka mo tǝ zyak suu ɓo. 23Mo joŋ yeɓɓe, mo ga lwaa reba ahe. Moo kaa jak ɓǝ ne za to ɓe, mo ga yea pǝsyakke. 24Reba za fatan ye lwaa fanne, amma tǝgwĩi, za tanra ko ne fan joŋ ahe. 25Ne cok pa syedowal mo faa goŋga tǝ ɓǝ ɓe, a wǝǝ dǝɓɓi. Mo gwah ber ɓe, a gin ne ɓǝɓe' tǝ dǝɓɓi.
26Ɗul Dǝɓlii a nyi swah zahzyil tǝkine jam nyi dǝɓ ne za yaŋ ah daŋ. 27Ɗul Dǝɓlii a nyi cee nyi dǝɓɓi, mor ka cak ɗul gal mawulli.
28Goŋ a yea pǝyǝk mor dǝfuu sǝr ah mo pǝpãare, dǝfuu ah mo ka pǝlli ya ɓe, ka yǝk ah kǝka. 29Dǝɓ mai mo ka ɓaŋ kpãh gwari ya a ne tǝtǝlli, amma dǝɓ mai mo ne kpak ma ɓaŋ kpãh gwari, a cuu tǝgwĩi suu ah gin lalle. 30Zahzyil mo kaa sǝŋ ɓe, a joŋ suu dǝɓ yea jam, amma tǝwon a tǝgbana syem ma ɗii ne lwaamoliiɓe.
31Dǝɓ mo tǝ joŋ ɓe' wo pa syak ɓe, ka mo tǝ tǝǝ Masǝŋ mai mo joŋ ko ɓo. Amma dǝɓ mo tǝ joŋ gboŋgboŋ wo pa syak ɓe, ka mo tǝ ɗuu Masǝŋ. 32Fan joŋ dǝɓ ɓe' a ciŋ lee ahe, amma ɓǝ sãh dǝɓ matǝ njaŋ a byak ko.
33Dǝɓ ma ne tǝtǝlli, fatan a yea pǝ ɓǝ foo ah daŋ, amma tǝgwĩi tǝ fan ma ɗii ne fatan a. 34Za matǝ njaŋ a joŋ sǝr yea pǝyǝkki, amma za faɓe' a ɓeɓ sǝrri. 35Za goŋ a laara pǝ'nyah ne zaluu yeɓ ɓǝǝ mai mo ne tǝtǝlli, amma a ŋgoŋra kiita tǝ za mai mo tǝ kyeɓra ka ɓeɓ sǝrri.
Bible Moundang © Alliance Biblique du Tchad, 1996.