ƁƏ TƏƁOROO 11
11
1Dǝɓlii syiŋ ɓǝ za mai moo liira fan ne vǝrvǝr ɓo, amma a laa pǝ'nyah ne fan mai moo liira ne fahlii sãhe. 2Za ma yiira suu a ga lwaara swãa gwari, amma za ma wonra suu ɓǝǝ a ga yeara ne fatanne. 3Ɓǝ sãh za matǝ goŋga a zaŋ ra syee ne ko. Amma za mai mo za tǝ goŋga ye ka, fan joŋ ɓea ɓǝǝ a fer ciŋ muŋ ɓǝǝra.
4Com mai mo ga zyaŋ ne wulli, lak ka ga gbah jol ɓo gŋ ya, amma njaŋ a ǝ̃ǝ dǝɓ gin zah wulli. 5Njaŋ dǝɓ matǝ njaŋ a ga zyeɓ fahlii pel ahe, amma dǝɓ ɓe' a ga lee suu ah ne ɓǝɓe' ahe. 6Njaŋ mai za matǝ njaŋ mo ne ko a ga wǝǝ ra, amma za ma joŋra vǝrvǝr ne zana, fan cwaa ɓǝǝ ga gbǝ sol nyi ra. 7Ne cok dǝɓ ɓe' mo wǝ ɓe, byak fan ah a wun ne ki ta. Ɓǝ foo zahzyil ah mai mo kan ɓo tǝ lakre a ciŋ fan kolle. 8Dǝɓlii a byak dǝɓ matǝ njaŋ ah ka mo danko pǝ bone ka, a soɓ dǝɓ ɓe' ɓaŋ cok ahe.
9Ɓǝ faa zah za faɓe' a ɓeɓ kal zana, amma fatan za matǝ njaŋ a zyeɓ zana. 10Za matǝ njaŋ ah mo lwaa fan ɓe, yaŋ moo daŋ a laara pǝ'nyahre. Ne cok za maɓea ah mo wukra gŋ ɓe laŋ, yaŋ ah daŋ a laara pǝ'nyah ta. 11Yaŋ maluu ah a ɓoo ga pel pǝ'man mor za matǝ njaŋ ah ra mo gŋ, amma yaŋ ah a ɓeɓ ne ɓǝ faa zah za maɓea ahe.
12Dǝɓ mai moo faa zah tǝgwĩi nyi za ka ka ne tǝtǝl a, amma dǝɓ ma ne tǝtǝl ka faa ɓǝ ki ga zah ya. 13Dǝɓ ma kyãh ne faa ɓǝ haihai a faa ɓǝ ma tǝsyeɓ ah gin lalle, amma dǝɓ matǝ goŋga ah a muŋ ɓǝ pǝ zahzyil ah zoŋ. 14Sǝr mo ka ne pa kal pel masãh ah ya ɓe, sǝr ah a leere, za ma zyeɓ ɓǝ mo gŋ pǝpãa ɓe, jam a yeani. 15Dǝɓ mo nyiŋ ɓǝ val dǝɓ ki kan ge tǝ suu ah zye ga soo ɓe, a ga laa bone mor ahe. Amma dǝɓ mo dan suu ah ge mor ɓǝ ah ya ɓe, a ga kaa jam. 16Mawin matǝ goŋga ah za yii ko, amma mawin ma bai goŋga a lwaa swãare. Dǝɓ vǝǝkoi ka lwaa fan ki ya. Amma dǝɓ maswah ah a ciŋ pa joŋne.
17Dǝɓ mai moo kwan syakke, ka tǝ joŋ gboŋgboŋ wo suu ahe, amma dǝɓ mai mo pǝ ɓǝr ɓe' laŋ, ka tǝ ɓeɓ suu ahe. 18Za maɓea ah ka lwaara reba matǝ goŋga ah ya, amma mo tǝ joŋ fan matǝ njaŋ ah ɓe, mo tan njaŋ, mo ga lwaa reba ahe. 19Dǝɓ mai moo yea ma ne joŋ fan matǝ njaŋ ah a ga nǝn wo sǝrri. Amma dǝɓ mai moo joŋ faɓe', a ga wǝ gwari. 20Dǝɓlii syiŋ ɓǝ foo za maɓea ah ɓo syiŋ, amma a laa pǝ'nyah ne za mai moo joŋra fan matǝ njaŋ ahe. 21Mo tǝ njaŋ za maɓea ah a ga lwaara kiita, amma za matǝ njaŋ ah a ga ǝ̃ǝra.
22Mawin masãh ah mai mo ka ne swãar a, a zahki ne tǝgaa ma vãm kaŋnyeeri mai mo maa ge ɓo võo billi. 23Za matǝ njaŋ ah a 'yahra fan sãhe, so a lwaara fan sãh cẽecẽe. Amma ne cok za faɓe' mo lwaara fan mai mo tǝ 'yahra ɓe laŋ, zune daŋ a so kal ne kpãhe#11:23 A so kal ne kpãhe: Wala, Masǝŋ a ŋgoŋ kiita tǝ ɓǝǝra.. 24Za ki a joŋra yeɓ ne lak ɓǝǝ pǝlli, so a gara pel ne pǝlli ta, za ki a taira fanne, so a yeara pǝsyak ga pelle, ga pelle. 25Mo nyi fanne, mo ga laa pǝ'nyahre, mo gbah jol za ki, a ga gbahra jol ɓo ta. 26Dǝɓ mai mo ka zyii lee fan ne sor ah ya moo byak ka lee ah mo fer pǝ'man ɗao, za a faara ɓǝɓe' tǝl ahe, amma a sãara dǝɓ mai moo woo lee fan ne sǝ.
27Fan joŋ ɓo mo pǝsãh ɓe, za ga yiira mo, amma mo tǝ kyeɓ ɓǝ gaɓ ɓe, mo ga lwaa ta. 28Za mai moo kanra zahzyil ɓǝǝ tǝ joŋ ma jol ɓǝǝra, a ga leera, amma za matǝ njaŋ a gara pelle. 29Dǝɓ mai moo 'nam gaɓ gin tǝ za yaŋ ah ne ko, in zah dǝɓ ah ka ne fan ki ya, cẽecẽe za ma tǝgwĩi ah a ga ciŋra byak za fatanne. 30Za matǝ njaŋ ara tǝgbana kpuu ma lee syẽm sãh nyi za renne, amma za ma joŋ yeɓ ɓe' yeɓ ɓǝǝ a ik za ga lalle. 31Dǝɓ matǝ njaŋ ah a lwaa reba ah wo sǝr nyeeko, za maɓea ah ne za faɓe' a ga lwaara kiita.#1 Pe 4:18
Bible Moundang © Alliance Biblique du Tchad, 1996.