KEE ZANA 9
9
Fĩi Paska patǝ gwa ahe
1Dǝɓlii faa ɓǝ nyi Mosus kǝsyicok Sinai ne fĩi patǝ vaŋno, ne syii gwa ah fahfal za Israel mo pǝ̃ǝra gin sǝr Egiɓ, faa:#Pǝ̃ǝ 12:1-13 2Sai za Israel mo joŋra fĩi Paska ne cok ahe. 3Ne zah'nan jemma tǝtǝl nai ah pǝzyil fĩi maiko, ne cok com mo tǝ dan o ɓe, ka we joŋ fĩi ah ne ko, tǝgbana fahlii ah ra mo cuu ɓo, tǝkine ɓǝ lai ahe. 4So Mosus faa nyi za Israel ka mo joŋra fĩi Paska. 5Joŋra fĩi ah ne cok tǝ foofoo kǝsyicok Sinai, ne zah'nan jemma tǝtǝl nai pǝ fĩi patǝ vaŋno ahe. Za joŋra fan ah daŋ tǝgbana mai Dǝɓlii mo faa nyi Mosus.
6Amma za ki kǝsyil ɓǝǝ ara ne 'nahm wo Dǝɓlii mor juura wul ɓo, mor ah gak ka joŋra fĩi Paska com ah ya. So kalra ge wo Mosus ne Aron, 7faara: Aru ne 'nahm wo Dǝɓlii, mor ru juu wul ɓo. Ko ru ka gak tai ne za Israel manyeeki ah ra ka joŋ syiŋ wo Dǝɓlii tǝki vaŋno ne ra ya mor fẽene? 8Mosus zyii zah ɓǝǝ faa: We ɗah byak nyeeko, me ga laa ɓǝ mai Dǝɓlii moo ga faa ɗao.
9Dǝɓlii faa nyi Mosus: 10Mo faa nyi za Israel sye: Ne cok dǝɓ ki kǝsyil ɓiiri, wala morsǝ̃ǝ ɓii mo ne 'nahm mor juu wul ɓo ɓe, koo ara mo pǝ cok ki pǝɗǝkki, mo tǝ 'yahra ka joŋ fĩi Paska ɓe, 11ka mo joŋra ne zah'nan jemma tǝtǝl nai ne fĩi patǝ gwa ah ne lil ahe, ka mo rera we pǝsãhm ne tǝwaa ma bai fan mbǝ̃ǝre, tǝkine goo mazwakke. 12Mo soɓra farel ah koo mo mafẽene ah yo dai zah'nan ka, mo dahra woiŋ we pǝsãhm ah koo mafẽene ah ka. Mo joŋra fĩi ah tǝgbana mai fahlii ah mo cuu ɓo.#Pǝ̃ǝ 12:46; Yoh 19:36 13Amma dǝɓ mo ka ne 'nahm ya, mo so kal ge ɓo ka cok ki pǝɗǝk ya, mo joŋko fĩi Paska ya ɓe, tǝɗii ah ka ga yea kǝsyil za ɓe yao, mor zyii ka nyi fan nyi ah nyi me ne cok mai ɓǝ ah mo cuu ɓo ya. Sai a ga lwaa kiita mor faɓe' ahe. 14Koo mo dǝɓ gwǝǝ ye mo kaa ɓo kǝsyil ɓiiri, mo 'yahko ka joŋ fĩi Paska ɓe, sai mo joŋko tǝgbana ɓǝ lai ah ne fahlii ah ra mo cuu ɓo. Ɓǝ lai ah a mor we sǝr ne dǝɓ gwǝǝ daŋ zahki.
Swãh bam rii tal mbǝro ma taini
(Pǝ̃ǝ 40:34-38)
15-16Com mai mo ɓyakra tal mbǝro ge sǝŋ, swãh bam ge rii tǝl ahe. Ne suŋ ahe, a kwan tǝgbana wii yo. 17Ne cok swãh bam mo zol gin tǝ tal mbǝro ɓe, za Israel a syeera ga pelle, ne cok swãh mo so ge tǝl ah ɓe, ka syeera ga pel a. 18Dǝɓlii mo nyi fahlii ɓe, za a nǝǝra jul ɓǝǝra. So Dǝɓlii mo uu ɓe laŋ, a gbahra julli. Ne cok swãh bam mo uu tǝ tal mbǝro liilii ɓe laŋ, za Israel a ɗah kaara pǝ cok mai mo kaara ɓo gŋ. 19Ne cok swãh bam mo uu tǝ tal mbǝro liilii ɓe, a laara zah Dǝɓlii ka urra syee ya. 20Com maki ah swãh bam a uu tǝ tal mbǝro zah'nan nje nai to, so a kaara mor ah nai ta. Ne cok mo urra syel laŋ, a syeera mor ɓǝ faa Dǝɓlii. 21Comki laŋ swãh bam a gin kaa tǝ tal mbǝro ne lilli, a cee zah'nan gŋ to. Ne cok swãh mo zol ɓe, ara laŋ a zolra ta. Koo mo com yo, wala mo suŋ yo, koo ne cok fẽene daŋ swãh mo zol ɓe, ara laŋ a zolra ta. 22Ne cok swãh moo kaa tǝ tal mbǝro, maki a joŋ zah'nan gwa, maki fĩi vaŋno, maki laŋ a joŋ syii, ka za Israel kaara ɓo pǝ cok tǝ vaŋno, ka zolra ya. Amma ne cok swãh mo so zol ɓe, ara laŋ a zolra ta. 23Ɓǝ ah daŋ a joŋra tǝgbana ɓǝ lai mai Dǝɓlii mo faa ɓo ne zah Mosus.
Bible Moundang © Alliance Biblique du Tchad, 1996.