KEE ZANA 10
10
Kokõorĩi ma ne vãm solai
1Dǝɓlii faa nyi Mosus: 2Mo coo kokõorĩi gwa ne vãm solai, ka mo ul tai za ne ko, so ka mo ur ɗii za ne ka mo zolra. 3Ne cok mo ulra kokõorĩi ah gwa daŋ ɓe, ka za mo taira ge wo ɓo zahfah tal mbǝro ma taini. 4Amma mo ulra vaŋno to ɓe, ka zaluu ma pel za morsǝ̃ǝ ɓǝǝ camcam ye mo taira ge wo ɓo. 5Ne cok kokõorĩi patǝ vaŋno ah mo ul ne swah ɓe, ka zahban mai mo gbahra jul ɓǝǝ ɓo nǝfah kǝmorcomzah'nan mo urra. 6So mo ulra kokõorĩi patǝ gwa ah ne swah ɓe, ka zahban mai mo gbahra jul ɓǝǝ ɓo nǝfah morkǝsǝŋ mo urra. So we 'yah ka nǝǝ jul ɓii ka zol ɓe, ka we ul kokõorĩi ne swahe. 7Amma we tǝ 'yah ul ka tai za ne ɓe, we ul ne swah ka. 8Wee Aron mai mo tǝ joŋra yeɓ zahsyiŋ ye mo ulra kokõorĩi ah ra. Ɓǝ ah ɓǝ lai ma ga lii ah ye wo ɓii ne wee ɓǝr ɓii ma fahfal ɓiiri. 9Ne cok za syiŋ ɓii mo ge danra pǝ sǝr ɓiiri, we tǝ ruu sal ne ra ɓe, ka we ul kokõorĩi raiko. Ame Dǝɓlii Masǝŋ ɓii me ga gbah jol ɓii me ǝ̃ǝ we jol ɓǝǝra. 10So com mai we tǝ laa pǝ'nyahre, fĩi mafuu mo ciŋ ɓo we tǝ joŋ fĩi ahe, wala mo fĩi ɓǝ iŋ ɓii maki ah ra yo, ka we ul kokõorĩi ne cok we tǝ joŋ syiŋ suŋwii pel ɓe, ne syiŋ ma mor tai za pãare, ame ga gbah jol ɓiiri. Ame ye Dǝɓlii Masǝŋ ɓiiri.
Za Israel urra gin kǝsyicok Sinai
11Ne syii patǝ gwa ahe, ne fĩi patǝ gwa ah ne zah'nan jemma gwa fahfal za Israel mo urra gin sǝr Egiɓ, swãh bam zol gin tǝ tal mbǝro ne ko. 12Za Israel urra gin kǝsyicok Sinai, syeera mor ki ne patǝtǝlli. So swãh bam ge uu kǝsyicok Paran.
13Syel ɓǝǝ mo syeera, ɓǝ ah a tǝgbana mai Dǝɓlii mo faa ɓo ne zah Mosus. 14Ne cok daŋ mo tǝ zolra ka ga ɓe, kul za ma morsǝ̃ǝ ban Yuda yee zolra ne tutowal ɓǝǝ kǝpelle, swah ɓǝǝ ye Naason we Amminadaɓ. 15Netanel we Zuar ye dǝɓlii za ma morsǝ̃ǝ ban Isakar. 16Eliaɓ we Helon ye dǝɓlii za ma morsǝ̃ǝ ban Zebulon.
17Ne cok mo mgbaira tal mbǝro ɓe, morsǝ̃ǝ Gerson ne Merari mai moo ɓaŋra a urra sǝ.
18Fahfal ah kul za Ruben a urra ne tutowal ɓǝǝ ga gŋ, dǝɓlii ɓǝǝ ye Elisur we Sedur. 19Selumiel we Suriskadai ako ye dǝɓlii za ma morsǝ̃ǝ ban Simon. 20Eliasaf we Dǝwel ye dǝɓlii za ma morsǝ̃ǝ ban Gad.
21So morsǝ̃ǝ Kehat mai moo ɓaŋra fan matǝdaŋdaŋ ah ra, a urra ga gŋ. Ne cok moo ga daira pǝ cok mai mo tǝ ga gbahra jul gŋ daŋ, ka lwaara za ma ŋhaa zyeɓra tal mbǝro uu ge sǝŋ ɓe.
22Fahfal ah kul za Efraim a urra ne tutowal ɓǝǝra, Elisama we Ammihud ye dǝɓlii ɓǝǝra. 23Gamaliel we Pedasur ye dǝɓlii za ma morsǝ̃ǝ Manasse. 24Abidan we Gidioni ye dǝɓlii za ma morsǝ̃ǝ ban Benyaamin.
25Fahfal ɓǝǝ lii kul za ma morsǝ̃ǝ ban Dan a urra ne tutowal ɓǝǝra. Ara na za ma byak kul za camcam daŋ, dǝɓlii ɓǝǝ ye Ahizer we Amiskadai. 26Pagiel we Okran ye dǝɓlii za ma morsǝ̃ǝ ban Asǝr. 27Ahira we Enan ye dǝɓlii za ma morsǝ̃ǝ ban Naftali. 28Ne cok za Israel mo urra ɓo ka ganne, wala mo tǝ ga gbahra jul ɓǝǝ pǝ cok maki ahe, kul ɓǝǝ a yea mor ki ne patǝtǝl naiko.
29Mosus faa nyi bǝǝ ah Hobaɓ we Jetro Midianiyo: Aru zyeɓ suu ɓo ka ga cok mai Dǝɓlii mo faa zye ga nyi nyi ru, so faa zye ga yea ne za Israel. Mo ge ne ru, aru laŋ ru ga joŋ ɓǝ 'nyah wo ɓo ta. 30Hobaɓ zyii faa: Me ka ga ne we ya, amma me ga pii soo ga wo zum ɓe pǝ sǝr ɓe. 31Mosus pǝǝ ko faa: Oseni, mo soɓ ru ka, mor amo tǝ cok mai ru tǝ ga gbah jul gŋ kǝsyicok ɓe, mo gak kal pel ɓuu ka cuu fahlii nyi ru. 32Ne cok mo kal ge ne ru, ru dai cok ɓe, ru ga woŋ fan sãh mai Dǝɓlii moo ga nyi nyi ru ne mo.
Za urra ka ganne
33Ne cok za Israel mo urra gin kah waa Sinai Dǝɓlii, syeera zah'nan sai. Sunduku gbanzah Dǝɓlii kal pel ɓǝǝra, mor ka kyeɓ cok mai moo ga ɗǝrra gŋ ka gbah jul ɓǝǝra. 34Ne cok mo urra ka ga ɓe daŋ, ne com ɓe, swãh Dǝɓlii a yea ma tǝtǝl ɓǝǝra.
35Nekẽne daŋ sunduku gbanzah mo ur ɓe, Mosus a faa: Mo ur o Dǝɓlii, ka za syiŋ ɓo mo ɗuura pel ɓo, mo myahra kalle!#Lǝŋ 68:2 36Ne cok fẽene daŋ sunduku mo ge uu ɓe, a so faa: Dǝɓlii, mo pii soo ge wo za Israel matǝ ujenere ujenere ko.
Bible Moundang © Alliance Biblique du Tchad, 1996.