KEE ZANA 8
8
Rǝk pitǝrla
1Dǝɓlii faa nyi Mosus:#Pǝ̃ǝ 25:31-40; 37:17-24 2Mo faa nyi Aron sye, ne cok mo tǝ rǝkko pitǝrla matǝ rǝŋ ga tǝ cok kan pitǝrla ɓe, mo rǝk pitǝrla ah ra ka mo sǝǝra cok pel cok kan pitǝrla ahe. 3Aron joŋ nooko, rǝk pitǝrla ah ra pǝ cok rǝk pitǝrla, mor ka mo sǝǝko cok pel cok rǝk pitǝrla ah ra. 4Coora cok kan pitǝrla ah ne vãm kaŋnyeeri, tǝŋ daga tǝtǝl ah ŋhaa ge dai mor ah sǝŋ ne ko, joŋra tǝgbana mai Dǝɓlii mo cuu fahlii ah nyi Mosus.
Rǝkra Lewitien tǝ yeɓɓe
5Dǝɓlii faa nyi Mosus: 6Mo woŋ Lewitien ne tǝcoŋ za Israel mapãa ahe, ka mo vãh ra. 7So ka mo sah bii ma ɓaŋ faɓe' ga lal ge tǝtǝl ɓǝǝra, mo sõora syiŋ wo suu ɓǝǝ ge lal daŋ, mo vãhra fan wo suu ɓǝǝ ta. Nai ɓe, a ga yeara pǝsãhe. 8Ka Lewitien mo so ɓaŋra ŋgǝǝri ne fan nyi ma farel mai mo ne fahlii ahe, sum ma suuki ne nǝmmi, ka mo so ɓaŋ ŋgǝǝri patǝ gwa ah ma mor joŋ syiŋ ma ɓaŋ faɓe' ga lalle. 9So ka mo tai za Israel ne pãa ɓǝǝ daŋ, ka mo woo Lewitien mo uura pel tal mbǝro ma taini. 10Ka za Israel mo rǝkra jol ɓǝǝ ge tǝtǝl Lewitien. 11Ka Aron mo nǝǝ Lewitien nyi me tǝgbana fan nyi mai za Israel mo nyira ɓo me, mor ka mo joŋra yeɓ ɓe. 12So ka Lewitien mo rǝkra jol ɓǝǝ ge tǝ ŋgǝǝri matǝ gwa ko. Maki ah vaŋno ka mo joŋra syiŋ ma mor ɓaŋ faɓe' ga lal ne ko, maki ah vaŋno mor ka joŋ syiŋ suŋwii ne ko, mor ka soo faɓe' Lewitien ne daŋ.
13We nǝǝ Lewitien ka mo yeara wo ɓe na fan nyi matǝ goŋga ahe, mor ka mo joŋra yeɓ mor Aron ne wee ahe. 14Mo woŋ Lewitien ne tǝcoŋ za Israel manyeeki ah naiko, mor ka mo yeara zah fan ma ɓe sǝ. 15Fahfal mo vãh Lewitien mo so nǝǝ ra kpik rǝk ɓe, a gak joŋra yeɓ pǝ tal mbǝro ma taini. 16Ame nyiŋ ra ɓo tǝgbana fan nyi ma zahwaa welii za Israel daŋ, ara ye ma ka syak ɓe sǝ. 17Ne cok me ik welii pǝ sǝr Egiɓ daŋ pǝ wulli, me nǝǝ welii za Israel ne mǝ faɓal ɓǝǝ daŋ mor suu ɓe.#Pǝ̃ǝ 13:2 18Zǝzǝ̃ǝko, me nyiŋ Lewitien ɓo pǝ cok welii za Israel. 19So me nyi ra ɓo nyi Aron ne wee ahe, tǝgbana fan nyi mai za Israel mo nyi ɓo, ka mo joŋra yeɓ mor za Israel pǝ tal mbǝro ma taini, so ka mo byakra za Israel kah ɓeɓ mai moo ga ge tǝ ɓǝǝ ne fahlii dǝɓ ki vaŋno kǝsyil ɓǝǝ mo ge kah cok matǝdaŋdaŋ gwari ɓe ko.
20Mosus ne Aron ne za Israel daŋ nǝǝra Lewitien rǝk na mai Dǝɓlii mo faa nyi Mosus. 21Lewitien vãhra suu ɓǝǝra, vãhra fan wo suu ɓǝǝ ta. So Aron nǝǝ ra nyi mor Dǝɓlii tǝgbana fan nyi matǝ goŋga ahe, so joŋ syiŋ mor ɓǝǝ vãh ra ne ko. 22Fahfal ah Lewitien a gak joŋra yeɓ pǝ tal mbǝro ma tai mor Aron ne wee ahe. Za joŋra fan mai daŋ Dǝɓlii mo faa nyi Mosus ka joŋ wo Lewitien.
23Dǝɓlii faa nyi Mosus: 24Ɓǝ lai mor Lewitien a naiko: Dǝɓ morsǝ̃ǝ Lewi mo joŋ syii jemma gwa tǝtǝl dappe ɓe, ka mo tǝŋko joŋ yeɓ pǝ tal mbǝro ma taini. 25Mo so joŋ syii jemma dappe ɓe, ka mo soɓko yeɓɓe. 26Fahfal ah laŋ a gak gbah jol wee pah ah manyeeki ah ra ne yeɓ pǝ tal mbǝro ma taini, amma mo joŋko yeɓ ah syak ah kpik kao. Sai mo ŋgoŋ zahsyee yeɓ Lewitien uu naiko.
Bible Moundang © Alliance Biblique du Tchad, 1996.