LEWITIEN 3
3
Syiŋ ma nyi jam#3:0 Syiŋ ma nyi jam wala ma taiki.
1Dǝɓ mo 'yah ka nyi dǝǝ ah vaŋno ka joŋ syiŋ ma nyi jam ne pel Dǝɓlii ɓe, sai mo ɓaŋko ŋgǝǝri, wala dǝǝ matam ah mai suu ah mo ka pǝɓe' ya. 2Ka mo kanko jol ah ge tǝtǝl dǝǝ ahe, ka mo so ŋgoŋko dǝǝ ah zahfah tal mbǝro ma taini, ka za ma joŋzahsyiŋ ma morsǝ̃ǝ Aron mo meera syim ah ge tǝ cok joŋ syiŋ wo nyah ah nai daŋ. 3Ne cok mo tǝ joŋra syiŋ ma syak tǝ wii wo Dǝɓlii ne nǝǝ dǝǝ mai mo ŋgoŋra ɓo ɓe, ka mo zyiŋra nǝm tǝ ɓǝr ah daŋ, 4ne nyee ah gwa daŋ ne nǝm mai mo wol ahe, tǝkine raita zyii ahe.#Pǝ̃ǝ 29:13 5Ka za ma joŋzahsyiŋ mo syakra fan marai daŋ ne syiŋ suŋwii tǝ cok joŋ syiŋrĩ. Dǝɓlii laa fuŋ fan nyi ah pǝ'nyahre.
6Dǝɓ mo 'yah nyi fan joŋ syiŋ ma nyi jam pel Dǝɓlii ɓe, fan ah mo pǝsãhm yo, wala mo sǝgwii yo, mo pǝworre, wala mo pǝtamme, suu ah mo yea pǝɓe' ka. 7Dǝɓ mo nyi pǝsãhm ɓo ɓe, 8ka mo kanko jol ah ge tǝtǝl ahe, so ka mo ŋgoŋko pel zahfah tal mbǝro ma taini, ka za ma joŋzahsyiŋ mo meera syim ah ge tǝ cok joŋ syiŋ wo nyah ah nai daŋ. 9So ka mo joŋra syiŋ suŋwii wo Dǝɓlii ne nǝǝ ah tǝgbana fan nyi ma farelle, tǝgba faa: nǝm ahe, sǝ̃ǝ ahe, ne nǝm tǝ ɓǝr ahe, 10ne nyeere, ne nǝm mai mo wol ahe, tǝkine raita zyii ah daŋ. 11Ka pa joŋzahsyiŋ mo syak fan marai daŋ tǝ wii tǝ cok joŋ syiŋrĩ. Syiŋ farel ma tǝǝ pel Dǝɓlii yo.#Lew 21:8
12Dǝɓ mo nyi sǝgwii ɓo ɓe, ka mo kan jol ah ge tǝtǝl ahe, ka mo so ŋgoŋko pel zahfah tal mbǝro ma taini. 13Ka za ma joŋzahsyiŋ mo meera syim ah ge tǝ cok joŋ syiŋ wo nyah ah nai daŋ. 14So ka mo joŋra syiŋ pel Dǝɓlii ne nǝǝ ahe, ne nǝm tǝ ɓǝr ah daŋ, 15ne nyeere, ne nǝm mai mo wol ahe, tǝkine raita zyii ahe. 16Pa joŋzahsyiŋ mo joŋ syiŋ suŋwii ne tǝ cok joŋ syiŋrĩ. Dǝɓlii laa fuŋ fan nyi ah pǝ'nyahre. Nǝm ah daŋ mǝ Dǝɓlii yo. 17Dǝɓ Israel mo reko nǝmmi, wala syim ka. We syee mor ɓǝ lai mai ne wee ɓǝr ɓii ma fahfal ɓii ra daŋ ga lii ga lii, koo mo ge kaara ɓo kẽne daŋ.
Bible Moundang © Alliance Biblique du Tchad, 1996.