LEWITIEN 2
2
Fan nyi ma farelle
1Ne cok dǝɓ mo 'yah nyi fan nyi ma farel ma na sor nyi Dǝɓlii ɓe, sai sum ye mo yea, so ka mo syeeko nǝm ge tǝl ahe, ka mo syeeko ɓǝrdi ge gŋ ta. 2Mo so ɓaŋko ge wo za ma joŋzahsyiŋ ma morsǝ̃ǝ Aron ne ko, ka pa joŋzahsyiŋ mo fõoko sum ah pǝ cok nǝm ne ɓǝrdi mo rǝk ɓo gŋ baa jolle, ka mo tǝǝko tǝ cok joŋ syiŋrĩ, ka cuu, fan ah daŋ nyi ɓo mor Dǝɓlii. Dǝɓlii laa fuŋ fan nyi ah pǝ'nyahre. 3Tǝcoŋ fan nyi ma farel ah mǝ za ma joŋzahsyiŋ yo. Fan ah a daŋdaŋ, mor ɓaŋ ɓo gin pǝzyil farel ma nyi nyi Dǝɓlii.
4Mo 'yah ka nyi fan nyi ma farel ma na paŋgasso ma kǝǝ pǝ syea ɓe, mo joŋ ne sum ma suuki ne nǝmmi, mo yea pǝnyiŋ pǝnyiŋ, fan mbǝ̃ǝ mo yea gŋ ka, tǝkine paŋgasso matǝ gǝrlǝŋ gǝrlǝŋ mo bai fan mbǝ̃ǝre, mo sah nǝm ge tǝl ahe.
5So mo 'yah ka nyi farel ma kǝǝ pǝ tahsah ɓe, ka mo joŋ ne sum mai mo suuki ɓo ne nǝmmi, amma fan mbǝ̃ǝ mo yea gŋ ka. 6Ne cok mo tǝ ga nyi fan nyi ah ɓe, mo jak pǝnyeere, ka mo so rǝk nǝm ge tǝl ahe.
7So mo 'yah ka nyi fan nyi ma kǝǝ tǝ wii pǝ cii ye ɓe, sai mo joŋ ne sum ma suuki ne nǝm ta. 8Ka mo ɓaŋ fan nyi ma farel ah ge pel Dǝɓlii ne ko, mo nyi nyi pa joŋzahsyiŋrĩ, so ka pa joŋzahsyiŋ mo ɓaŋko ge wo cok joŋ syiŋ ne ko. 9Pa joŋzahsyiŋ mo ɓaŋko raita fan nyi ah gin gŋ ka mo tǝǝko syiŋ ne tǝ cok joŋ syiŋrĩ, ka cuu, fan ah daŋ nyi ɓo mor Dǝɓlii. Dǝɓlii laa fuŋ fan nyi ah pǝ'nyahre. 10Tǝcoŋ fan nyi ma farel ah mǝ za ma joŋzahsyiŋ yo. Fan ah a daŋdaŋ, mor ɓaŋ ɓo gin pǝzyil farel ma nyi nyi Dǝɓlii.
11Fan nyi ma farel mai wee nyi nyi Dǝɓlii daŋ, we joŋ ne fan mbǝ̃ǝ ka. We joŋ fan mbǝ̃ǝ wala manǝm tǝnjwǝǝ ge pǝ fan nyi ma farel mai wee nyi nyi Dǝɓlii ka. 12We ge nyi Dǝɓlii ne fakpãhpǝǝ ɓii ma joŋ kǝpel ah pǝzyil syii daŋ, amma we tǝǝ syiŋ ne tǝ cok joŋ syiŋ ka. 13Fan nyi ma farel daŋ#2:13 Fan mbǝ̃ǝ ne tǝnjwǝǝ mai za gwǝǝ moo joŋra syiŋ ne ko ka 'nyah suu Masǝŋ ya, a ɓeɓ fanne, mor a zyen na yimmi. Amma mǝ tǝm a 'nyah suu Masǝŋ, a zyeɓ fan ka yea daŋdaŋ (2 Za Goŋ 2:19-22), mor ka ɓǝ gbanzah mo yea ge lii., we ɓoo tǝm ge gŋ, mor tǝm ah a no na fan ma cuu ɓǝ gbanzah kǝsyil ɓii ne Masǝŋ. We ɓoo tǝm ge pǝ fan nyi ma farel daŋ. 14Ne cok we 'yah ka nyi sor ɓii ma joŋ kǝpel ah nyi Dǝɓlii ɓe, we nyi sor ma rǝraa ah wala ma lǝlaŋ ah nyi ko. 15We rǝk nǝm ge tǝ fan nyi ahe, we ɓoo ɓǝrdi ge gŋ ta. 16Pa joŋzahsyiŋ mo ɓaŋko sor ma lǝlaŋ ah ne nǝm tǝkine ɓǝrdi ah daŋ, mo joŋko syiŋ ne ko, mor ka cuu, fan ah daŋ nyi ɓo mor Dǝɓlii.
Bible Moundang © Alliance Biblique du Tchad, 1996.