LEWITIEN 4
4
Syiŋ ma mor ɓaŋ faɓe' ga lalle
1Dǝɓlii faa nyi Mosus: 2Mo faa nyi za Israel sye: Dǝɓ mo joŋ faɓe', mo zǝǝ tǝ ɓǝ lai Dǝɓlii, koo mo makẽne ah ye daŋ, sai ka mo joŋko naiko:
3Mo pa ma joŋzahsyiŋ malii ah ye mo joŋ faɓe', so ɓǝɓe' ah mo ge ɓo tǝ za daŋ, sai mo gbǝko ŋgǝǝri malii ah mai suu ah mo ka pǝɓe' ya ge ne ko, ka mo joŋko syiŋ wo Dǝɓlii ne mor faɓe' ahe. 4Ka mo gbǝko ŋgǝǝri ah mo geko zahfah tal mbǝro ma tai ne ko, mo kanko jol ah ge tǝtǝl ahe. Ka mo so ŋgoŋko pel Dǝɓlii gŋ ŋhaako. 5So ka pa ma joŋzahsyiŋ malii mo ɓaŋ syim ŋgǝǝri ah nje ka mo dan ge pǝ tal mbǝro ne ko. 6Ka mo so maako tǝwee jol ah ge pǝ syim ahe, ka mo meeko ge wo godel mai mo rii ɓo zahfah cok matǝdaŋdaŋ zahlǝŋ rǝŋ. 7So ka mo saŋko syim ah biŋ kan ge wo ciŋ ma wo cok joŋ syiŋ ma tǝǝ ɓǝrdi mo pǝ tal mbǝro ma taini, ka mo so sǝǝko tǝcoŋ syim ah ge tǝ sǝr kah cok joŋ syiŋ mai mo zahfah tal mbǝro. 8Sai mo so ɓaŋko nǝm ŋgǝǝri mai mo ŋgoŋra ɓo daŋ, nǝm tǝ ɓǝr ahe, 9ne nyeere, ne nǝm mai mo wol ahe, tǝkine raita zyii ahe. 10So pa joŋzahsyiŋ mo joŋko syiŋ ne nǝm ŋgǝǝri mai mo ŋgoŋra ɓo mor syiŋ ma nyi jam ne ta, mo ɓaŋko nǝm ah mo tǝǝko tǝ cok joŋ syiŋ mai moo tǝǝra syiŋ suŋwii gŋ. 11Amma mo ɓaŋko wak ŋgǝǝri ah ne nǝǝ ah daŋ, ne tǝtǝl ahe, ɓal ah ra, ne ɓǝr ah tǝkine mǝr ah daŋ, 12mo geko fahfal zahjul lal ne pǝ cok mai mo nǝǝra ɓo, moo rǝkra sãh joŋ syiŋ gŋ, ka mo syakko tǝ wii mai mo cokra ɓo gŋ.
13Koo za Israel daŋ ye mo joŋra faɓe' mo zǝǝra tǝ ɓǝ lai Dǝɓlii vaŋno, mo joŋra ɓo ka kee ya ɓe, 14so ɓǝɓe' ah mo joo ge lal gwari ɓe, sai ka za pãa mo gbǝra ŋgǝǝri ge ne mo ŋgoŋra mor ka ɓaŋ faɓe' ga lalle. Mo gera zahfah tal mbǝro ma tai ne ko. 15Zaluu ma pel za pãa mo rǝkra jol ɓǝǝ ge tǝtǝl ŋgǝǝri ahe, so ka mo ŋgoŋra gŋ. 16Pa joŋzahsyiŋ mo 'naako syim ŋgǝǝri ah nje, mo dan ge pǝ tal mbǝro ne ko. 17Ka mo so maako tǝwee jol ah ge pǝ syim ahe, ka mo meeko ge wo godel mai mo rii ɓo zahfah cok matǝdaŋdaŋ zahlǝŋ rǝŋ. 18So ka mo saŋko syim ah biŋ kan ge wo ciŋ ma wo cok joŋ syiŋ ma tǝǝ ɓǝrdi, mo pǝ tal mbǝro ma taini, ka mo so sǝǝko tǝcoŋ syim ah ge tǝ sǝr kah cok joŋ syiŋ mai mo zahfah tal mbǝro. 19So mo ɓaŋko nǝm ŋgǝǝri ah daŋ, ka mo tǝǝko tǝ wii tǝ cok joŋ syiŋrĩ. 20Pa joŋzahsyiŋ mo joŋko ne ŋgǝǝri ah tǝgbana mai mo joŋko ne ŋgǝǝri mai mo ŋgoŋra mor joŋ syiŋ ma ɓaŋ faɓe' ga lalle. Pa joŋzahsyiŋ mo joŋko syiŋ naiko, mor faɓe' zana, faɓe' ɓǝǝ ga rwah ga lalle. 21So ka mo ɓaŋko ŋgǝǝri ah ge fahfal zahjul lal ne ko, ka mo syakko ne wii gŋ, tǝgbana mo syakko ŋgǝǝri ma joŋ syiŋ ne mor faɓe' mǝ ahe, mai ako ye syiŋ ma mor ɓaŋ faɓe' za pãa ga lalle.
22Koo mo dǝɓlii ma pel zan o, mo joŋ faɓe', mo zǝǝ tǝ ɓǝ lai Dǝɓlii vaŋno, so mo joŋ ɓo ka kee ya, 23mo so tǝko ɓǝ faɓe' ah gwari ɓe, wala dǝɓ ki mo ge cuu ɓǝɓe' mai mo joŋko ɓo nyi ko ɓe, sai mo joŋko syiŋ ne kǝdai mai suu ah mo ka pǝɓe' ya. 24Ka mo kanko jol ah ge tǝtǝl ahe, ka mo so ŋgoŋko kah cok joŋ syiŋ nǝ fahkǝsǝŋ ahe, pǝ cok mai moo ŋgoŋra fan ma joŋ syiŋ suŋwii gŋ. Syiŋ ma mor ɓaŋ faɓe' ga lal o. 25Pa joŋzahsyiŋ mo maako tǝwee jol ah ge pǝ syim fan mai mo ŋgoŋra ɓo, ka mo saŋko syim ah biŋ kan ge wo ciŋ mai mo wo cok joŋ syiŋrĩ, ka mo so sǝǝko tǝcoŋ syim ah ge tǝ sǝr kah cok joŋ syiŋrĩ. 26So ka mo syakko nǝm ah daŋ tǝ wii tǝ cok joŋ syiŋrĩ, tǝgbana mai mo joŋko ne nǝm fan mai mo ŋgoŋra mor joŋ syiŋ ma nyi jam ta. Pa joŋzahsyiŋ mo joŋko syiŋ mor ka ɓaŋ faɓe' dǝɓ ma kal pel za ga lal naiko, so faɓe' ah ga rwah ga lalle.
27Koo mo dǝɓ vaŋno kǝsyil za pãa ye mo joŋ faɓe', mo zǝǝ tǝ ɓǝ lai Dǝɓlii vaŋno, so mo joŋko ɓo ka kee ya,#KeeZ 15:27-28 28mo so tǝko ɓǝ faɓe' ah gwari ɓe, wala dǝɓ ki mo ge cuu ɓǝɓe' mai mo joŋko ɓo nyi ko ɓe, sai mo joŋko syiŋ ne kǝdai mai suu ah mo ka pǝɓe' ya. 29Ka mo kanko jol ah ge tǝtǝl ahe, ka mo so ŋgoŋko kah cok joŋ syiŋ nǝfah fahkǝsǝŋ ahe, pǝ cok mai moo ŋgoŋra fan ma joŋ syiŋ gŋ. 30Pa joŋzahsyiŋ mo maako tǝwee jol ah ge pǝ syim fan mai mo ŋgoŋra ɓo, ka mo saŋko syim ah biŋ kan ge wo ciŋ mai mo wo cok joŋ syiŋrĩ, ka mo so sǝǝko tǝcoŋ syim ah ge tǝ sǝr kah cok joŋ syiŋrĩ. 31So mo ɓaŋko nǝm gwii ah daŋ, tǝgbana mai moo ɓaŋko nǝm faɓal mai daŋ moo ŋgoŋra mor joŋ syiŋ ma nyi jam, ka mo tǝǝko tǝ wii tǝ cok joŋ syiŋrĩ. Dǝɓlii laa fuŋ fan nyi ah pǝ'nyahre. Pa joŋzahsyiŋ mo joŋko syiŋ ma ɓaŋ faɓe' ga lalle, faɓe' dǝɓ ah ga rwahe.
32Dǝɓ mo 'yah joŋ syiŋ ne pǝsãhm ka ɓaŋ faɓe' ah ga lal ɓe, sai mo joŋko ne pǝsãhm matamme, mai suu ah mo ka pǝɓe' ya. 33Ka mo kanko jol ah ge tǝtǝl ahe, ka mo so ŋgoŋko kah cok joŋ syiŋ nǝfah fahkǝsǝŋ ahe, pǝ cok mai moo ŋgoŋra fan ma joŋ syiŋ gŋ. 34Pa joŋzahsyiŋ mo maako tǝwee jol ah ge pǝ syim fan mai mo ŋgoŋra ɓo, ka mo saŋko syim ah biŋ kan ge wo ciŋ mai mo wo cok joŋ syiŋrĩ, ka mo so sǝǝko tǝcoŋ syim ah ge tǝ sǝr kah cok joŋ syiŋrĩ. 35So mo ɓaŋko nǝm ah daŋ, tǝgbana mai moo ɓaŋ syim fan mai moo ŋgoŋra joŋ syiŋ ma nyi jam ne ko. Ka mo syakko tǝ wii tǝ cok joŋ syiŋrĩ, tǝkine fan nyi ma farel mai mo nyira ɓo nyi Dǝɓlii. Pa joŋzahsyiŋ mo joŋko syiŋ ma ɓaŋ faɓe' dǝɓ ga lal naiko, so faɓe' dǝɓ ah ga rwah ga lalle.
Bible Moundang © Alliance Biblique du Tchad, 1996.