LEWITIEN 1
1
Syiŋ suŋwii#1:0 Siŋ suŋwii ne zah Yahuduen tǝgba faa: syak ne wii tǝɗe'.
1Dǝɓlii ɗii Mosus daga pǝ tal mbǝro ma taini, faa nyi ko: 2Mo faa nyi za Israel sye: Ne cok dǝɓ mo tǝ 'yah nyi fan joŋ syiŋ nyi Dǝɓlii ɓe, sai mo ɓaŋko gin pǝzyil dǝǝ ahe, wala pǝzyil pǝsǝ̃ǝ ah ne sǝgwii ah ra.
3Mo tǝ ga nyi dǝǝ ah vaŋno ka joŋ syiŋ suŋwii ne ɓe, sai mo ɓaŋko ŋgǝǝri mai suu ah mo ka pǝɓe' ya. Ka mo ge nyiko nyi Dǝɓlii zahfah tal mbǝro ma taini, Dǝɓlii ga nyiŋ jol ah gŋ. 4Ka mo kanko jol ah ge tǝtǝl ŋgǝǝri ahe, Dǝɓlii ga nyiŋ ŋgǝǝri ah tǝgbana syiŋ ma ɓaŋ faɓe' dǝɓ ah ga lalle. 5Ka mo ŋgoŋko ŋgǝǝri ah pel Dǝɓlii gŋ ŋhaako, so ka za ma joŋzahsyiŋ ma morsǝ̃ǝ Aron mo ɓaŋra syim ah ge pel Dǝɓlii ne ko, ka mo meera ge tǝ cok joŋ syiŋ mai mo zahfah tal mbǝro ma taini, mo meera ge wo nyah ah nai daŋ. 6So ka dǝɓ ah mo swaako wak ah ge lalle, mo so ŋgomko nǝǝ ahe. 7Ka za ma joŋzahsyiŋ ma morsǝ̃ǝ Aron mo lǝǝra zahwii ge tǝ cok joŋ syiŋrĩ, ka mo so ɓoora wii nyi. 8Ka mo so woora nǝǝ dǝǝ mai mo ŋgom ɓo, ne tǝtǝl ah ne nǝm ah daŋ, mo rǝkra ge tǝ wii. 9Ka dǝɓ ah mo vãhko fan ɓǝr ah ra, ne ɓal kǝfal ah ra ne bii, ka pa joŋzahzyiŋ mo syakko fan ah daŋ tǝ wii tǝ cok joŋ syiŋrĩ mai ako ye syiŋ ma syak tǝ wii. Dǝɓlii laa fuŋ fan nyi ah pǝ'nyahre.
10Dǝɓ mo 'yah ka nyi pǝsãhm ah wala sǝgwii ah vaŋno mor joŋ syiŋ suŋwii ne ɓe, ka fan ah mo yea pǝworre, suu ah mo yea pǝɓe' ka. 11Ka dǝɓ ah mo ŋgoŋko kah cok joŋ syiŋ nǝfah kǝzagǝwǝǝ ahe, so ka za ma joŋzahsyiŋ ma morsǝ̃ǝ Aron mo meera syim ah ge tǝ cok joŋ syiŋ wo nyah ah nai daŋ. 12Dǝɓ ah mo ŋgomko nǝǝ ahe, ka pa joŋzahsyiŋ mo woo nǝǝ mai mo ŋgoŋko ɓo, ne tǝtǝl ah ne nǝm ah daŋ, mo rǝk ge tǝ wii tǝ cok joŋ syiŋrĩ. 13Ka dǝɓ ah mo vãhko fan ɓǝr ah ra, ne ɓal kǝfal ah ra, so ka pa joŋzahsyiŋ mo ge pel Dǝɓlii ne fan joŋ syiŋ ahe, ka mo syak fan ah daŋ tǝ wii tǝ cok joŋ syiŋrĩ. Dǝɓlii laa fuŋ fan nyi ah pǝ'nyahre.
14Dǝɓ mo tǝ 'yah ka nyi juu ka joŋ syiŋ suŋwii ne ɓe, sai mo nyiko matǝvaawandala, wala matǝvaakolle. 15Ka pa joŋzahsyiŋ mo ɓaŋ ge wo cok joŋ syiŋ ne ko, ka mo golko tǝtǝl ah ge lalle, ka mo syakko tǝ wii tǝ cok joŋ syiŋrĩ. So ka mo ɓyakko juu ah kah cok joŋ syiŋrĩ, mor ka syim ah mo ɗuu ge lalle. 16So ka mo nǝǝko sol ahe, ne fan ɓǝr ah daŋ, ka mo ɓoo ge pǝ cok mai moo taira sãh gŋ, kah cok joŋ syiŋ nǝfah kǝmorcomzah'nan ahe. 17Ka mo ɓǝlko juu ah kǝsyil gwa, amma mo pahlko yee ah ge lal ka. So ka mo syakko tǝ wii tǝ cok joŋ syiŋrĩ. Dǝɓlii laa fuŋ fan nyi ah pǝ'nyahre.
Bible Moundang © Alliance Biblique du Tchad, 1996.