PƏ̃Ə ZA ISRAEL 25

Ɓǝ nyi fan wo Masǝŋ

1Dǝɓlii faa nyi Mosus:#Pǝ̃ǝ 35:4-9 2Mo faa nyi za Israel ka mo gera nyi me ne fan nyini, we nyiŋ fan nyi ah jol za daŋ mai mo nyira ne zahzyilli. 3Fan nyi mai we ga nyiŋ jol ɓǝǝ a naiko: vãm kaŋnyeeri, vãm solai ne vãm syẽ, 4zyim kǝrãhmo, zyim syẽ, zyim masyẽ tǝ nyaknyak, zyim manik tǝkine zyim ma kaŋ ne syiŋ sǝgwiiri, 5ne wak kǝbǝr ma syesyiŋ, ne wak syiŋ malii tǝkine kpuu maswah ma ɗii ne akasia, 6nǝm wii, fan gbãh ma mor nǝm syee tǝtǝlli, so ne fan gbãh mor ɓǝrdi ma fuŋ 'nyahre, 7tǝsal mafãi ma ɗii ne onikis, ne tǝsal ma rẽa wo ɗaŋsikki ne ma mor fan saa zahbii. 8Mo zyeɓra cok kal masãh ah nyi me ka me kaa kǝsyil ɓǝǝra. 9Mo joŋ tal mbǝro ne fan yeɓ ah ra daŋ tǝgbana mai me cuu joŋ ah nyi mo.

Sunduku gbanzahe

10Mo faa nyi za yeɓ ah mo ɓaara sunduku ne kpuu akasia, wah ah mo i jol gwa ne raita, 'ah ah mo i jol vaŋno ne raita, giŋ ah mo i jol vaŋno ne raita.#Pǝ̃ǝ 27:1-9 11Mo syee vãm kaŋnyeeri masãh ah ge wo sunduku ah nǝkǝlal tǝkine ɓǝr ah daŋ. Mo so zyeɓ tǝkee ah kiŋ daŋ ne vãm kaŋnyeeri. 12Mo ɓaŋ tǝgaa ma vãm kaŋnyeeri nai mor ahe, mo mgbãa ge wo kah nyah ah nai daŋ, nǝkǝi gwa nǝkǝi gwa. 13Mo zyeɓ kpuu zǝǝ akasia gwa, mo syee vãm kaŋnyeeri ge wol ah daŋ. 14Mo maa kpuu zǝǝ akasia nyẽe ge fah tǝgaa ma kah nyah sunduku, mor ka ɓaŋ ne ko. 15Ka kpuu zǝǝ ah ra laŋ mo yeara fah tǝgaa sunduku ah nooko, mo so nǝǝra ge lal kpee ka. 16Mo rǝk tǝsal ɓǝ lai mai mee ga nyi nyi mo ɓǝr ahe.

17Mo zyeɓ cok rwah faɓe' ne vãm kaŋnyeeri masãhe, wah ah mo i jol gwa ne raita, 'ah ah mo i jol vaŋno ne raita.#Yahu 9:5 18Mo coo cerubim gwa ne vãm kaŋnyeeri. 19Mo kan cerubim vaŋno zahker cok rwah faɓe' nǝkǝki ahe, vaŋno zahker ah maki ta, mo yeara tǝki vaŋno ne cok kal rwah faɓe'. 20Cerubim mo gbahra yee ɓǝǝ ge wo ki ka mo gbǝra cee tǝ cok rwah faɓe' ne yee ɓǝǝra, mo rǝkra nahnǝn nyi ki, mo ɗǝmra zahpel ɓǝǝ ge tǝ cok rwah faɓe'. 21Mo kan cok rwah faɓe' tǝ sunduku, mo so rǝk tǝsal ma ne ɓǝ lai mai mee ga nyi mo ɓǝr ahe. 22Me ga zyaŋ ne mo, ka faa ɓǝ tǝ ɓǝ mai mee ga faa nyi za Israel daŋ gŋ, tǝ cok rwah faɓe' kǝsyil cerubim gwa mai ara mo tǝ sunduku ahe.

Taabǝl ma mor farel ma nyi mor Masǝŋ

23Mo joŋ taabǝl ne kpuu akasia, wah ah mo i jol gwa, 'ah ah mo i jol vaŋno, giŋ ah mo i jol vaŋno ne raita.#Pǝ̃ǝ 37:10-16 24Mo syee vãm kaŋnyeeri ge wol ahe, mo zyeɓ tǝkee ah kiŋ daŋ ne vãm kaŋnyeeri. 25Mo ge zyeɓ tǝker taabǝl ah ne kpuu, 'ah ah mo lii ne 'ah jolle, mo zyeɓ tǝkee ah ne vãm kaŋnyeeri. 26Mo joŋ tǝgaa ma ne vãm kaŋnyeeri nai mor ahe, mo mgbãa ge wo kah nyah ah nai, tǝ tǝɓal ah nai daŋ. 27Tǝgaa ah ra mo yeara kah tǝker ah gwari, mor ka gban kpuu zǝǝ ka ɓaŋ taabǝl ne ko. 28Mo zyeɓ kpuu zǝǝ ah ra ne kpuu akasia, mo syee vãm kaŋnyeeri ge wol ahe, ka ɓaŋ taabǝl ne ko. 29Mo joŋ tahsah ah ra, kǝɗaa ah ra, tǝkpelzaŋraŋ ah ra tǝkine tahsah ah ra ma joŋ syiŋ ne ko ne vãm kaŋnyeeri masãhe. 30Mo rǝk farel ma nyi mor Masǝŋ tǝ taabǝl pel ɓe cẽecẽe.#Lew 24:5-8

Kpuu pitǝrla

31Mo coo kpuu pitǝrla ne vãm kaŋnyeeri masãhe, mo coo ɓal ah ne sol ah ne vãm kaŋnyeeri, kpuu pitǝrla ah mo zyeɓ fan na jii fan ne fãi fanne, jii fan ah tǝkine fan marai daŋ mo yeara wo ki vaŋno.#Pǝ̃ǝ 37:17-24 32Jol yea mo urra gin kah ah ra, jol sai mo urra gin kǝki ahe, jol sai mai mo urra gin kǝki ah ta. 33Jol kpuu pitǝrla yea daŋ mo yea ne fan ma jur ne fãi kpuu amand vaŋno ne jii fan tǝkine fãi fanne. 34Ka kpuu pitǝrla mo yea ne fan ma na fãi kpuu amand nai tǝkine jii ah ne fãi ahe. 35Jii fan vaŋno mo yea mor kǝsǝŋ jol ah ra matǝ gwa ma kǝpelle, mo yea mor kǝsǝŋ jol ah ra matǝ gwa patǝ gwa ahe, so mo yea mor kǝsǝŋ jol ah ra matǝ gwa patǝ sai ah ta. 36Jii fan ah ra ne jol ah ra mo mgbãara ki na fan tǝ vaŋno ne kpuu pitǝrla, mo joŋra ne vãm kaŋnyeeri masãh ah daŋ. 37Mo so zyeɓ pitǝrla ah ra rǝŋ ka mo rǝk tǝl ah ka sǝǝ cok pel ahe. 38Mo joŋ fan rum wii tǝkine tahsah ma woo sãh ah ne vãm kaŋnyeeri masãhe. 39Kpuu pitǝrla ah tǝkine fan yeɓ ah ra daŋ mo joŋ ne vãm kaŋnyeeri masãh nǝn yǝk kilo tǝgbana jemma sai. 40Mo joŋ yella ka mo joŋ fan ah ra daŋ ne fahlii ah na mai me cuu nyi mo tǝ waare.#Yeɓ 7:44; Yahu 8:5

Currently Selected:

PƏ̃Ə ZA ISRAEL 25: MUAR

Highlight

Compare

Copy