PƏ̃Ə ZA ISRAEL 24
24
Mosus ne zaluu Israel tǝ waa Sinai
1Masǝŋ faa nyi Mosus: Mo yee ge wo ɓe Dǝɓlii ne Aron, Nadaɓ tǝkine Abihu, ne zaluu Israel jemma jemma rǝŋ, ka mo keara ge sǝŋ lal pǝɗǝkki. 2Sai amo syak ɓo mo ge gwari ne me to, amma za nyeeki mo gera gwari ka, za mo yeera laŋ ge ne mo ka.
3Mosus ge kee ɓǝ faa Dǝɓlii daŋ nyi za ne ɓǝ lai ah daŋ. Za zyiira zahki daŋ faara: Ɓǝ faa Dǝɓlii mo faa ɓo nyẽe daŋ ru ga joŋ. 4Mosus ŋwǝǝ ɓǝ faa Dǝɓlii daŋ, so ur ne zah'nan pimpim, vuu cok joŋ syiŋ ɓal waare, pea fan cuu syedowal ne tǝsal gŋ jemma tǝ gwa, na ban Israel. 5So pea wee tǝbanna Israel ka ŋgoŋ dǝǝ joŋ syiŋ suŋwii ne joŋ syiŋ ma nyi jam wo Dǝɓlii. 6Mosus ɓaŋ raita syim dǝǝ ah rǝk ge pǝ tahsah, so mee raita syim ah tǝ cok joŋ syiŋrĩ. 7So ɓaŋ ɗerewol gbanzahe, kee, za laa ne sok ɓǝǝ daŋ. So faara: Ɓǝ mai Dǝɓlii mo faa daŋ ru ga joŋ, ru laa zah ah ta. 8Mosus so ɓaŋ syimmi, mee ge tǝ zana, faa: Mai syim gbanzah mǝ Dǝɓlii mo gbǝ ɓo ne we tǝ ɓǝ faa marai daŋ yo.#Mt 26:28; Mk 14:24; Lu 22:20; 1 Kor 11:25; Yahu 9:19-20; 10:29
9Mosus, Aron, Nadaɓ, ne Abihu tǝkine zaluu Israel matǝ jemma jemma rǝŋ yeera ge tǝ waare. 10Kwora Masǝŋ Israel. Cok mor ɓal ah tǝgbana tǝsal kǝrãhmo matǝ wãkwãk, a na coksǝŋ, a sǝsãh ta. 11Zaluu Israel kwora Masǝŋ ne nahnǝn ɓǝǝra, so ik ra pǝ wul a, rera farelle, zwahra fanne.
Mosus yee tǝ waa Sinai
12Dǝɓlii faa nyi Mosus: Mo yee ge wo ɓe tǝ waare, mo kaa gŋ ka me nyi tǝsal ma ne ɓǝ lai tǝkine ɓǝ mai me ŋwǝǝ ɓo ka cuu nyi za Israel nyi mo. 13Mosus ur ne Joswa dǝɓ yeɓ ahe, so yee waa Masǝŋ. 14Faa nyi zaluuri: We byak ru nyee ŋhaa ka ru pii soo ge wo ɓiiri. Aron ne Hur no ne we, dǝɓ mo no ne ɓǝ faa ɓe, mo geko wo ɓǝǝra.
15Mosus yee kal ge tǝ waare, swãh bam rii waa ahe. 16Yǝk Dǝɓlii ge tǝ waa Sinai, swãh bam rii waa ah tǝgǝǝ zah'nan yea, ne zah'nan rǝŋ ah Masǝŋ ɗii Mosus kǝsyil swãh bamme. 17Yǝk Dǝɓlii cuu nǝn za Israel tǝlǝǝ waa tǝgbana wii ma syesyenne. 18Mosus dan ge kǝsyil swãh bamme, so yee waa kalle. Mosus kaa tǝ waa tǝgǝǝ zah'nan jemma nai, suŋ jemma nai ta.#CuuƁ 9:9
Currently Selected:
PƏ̃Ə ZA ISRAEL 24: MUAR
Highlight
Share
Compare
Copy
Want to have your highlights saved across all your devices? Sign up or sign in
Bible Moundang © Alliance Biblique du Tchad, 1996.
