PƏ̃Ə ZA ISRAEL 26

Fahlii joŋ tal mbǝro ma taini

1Mo zyeɓ ɓǝr tal mbǝro ma tai ne zyim manik ma kaŋ ne syiŋ pǝsǝ̃ǝre, mo yea camcam jemma: zyim kǝrãhmo, zyim syẽ ne masyẽ tǝ nyaknyakke. Mo kaŋ foto cerubim tǝ zyim ahe. 2Wah zyim ah ra daŋ mo i jol jemma gwa tǝtǝl nama nama, 'ah ah ra mo i jol nai nai, zyim ah daŋ mo yeara zahki zahki. 3Mo sãa zyim ah dappe ge wo ki, matǝ dappe maki ah ra laŋ mo sãara ge wo ki ta. 4Mo joŋ tǝgaa ne zyim kǝrãhmo kah zah godel kǝtǝ vaŋno ahe, mo joŋ kah zah godel kǝki ah vaŋno, patǝ gwa ah nai ta, ka mo jur ki. 5Mo sãa tǝgaa zyim jemma dappe ge kah zah godel vaŋno kǝtǝ vaŋno ahe, mo so sãa tǝgaa jemma ge kah zah godel gwa ah kǝtǝ vaŋno ah ta, tǝgaa ah ra mo sãa ɓyaŋ ki. 6Mo joŋ kǝṽǝl gban zyim ma vãm kaŋnyeeri jemma dappe, ka gbah godel ga wo ki ne ko.

7Mo kaŋ zyim ma ne syiŋ sǝgwii jemma tǝ vaŋno ka rii tǝ tal mbǝro. 8Wah zyim ah ra mo i jol jemma sai jemma sai, 'ah ah ra mo i jol nai nai. Mo lii zyim ah ra jemma tǝl vaŋno zahki daŋ. 9Mo sãa zyim matǝ dappe wo ki cam, matǝ yea mai laŋ mo yea cam ta. Mo soɓ zyim patǝ yea ah ɓoo ge zahpel tal mbǝro. 10Mo sãa tǝgaa jemma dappe ge kah zah godel vaŋno ah nǝn kǝtǝ vaŋno ahe, mo so sãa tǝgaa jemma dappe ge kah zah godel patǝ gwa ah kǝtǝ vaŋno ah ta.

11Mo joŋ kǝṽǝl gban zyim ma vãm syẽ jemma dappe, mo maa kǝṽǝl gban zyim ah ge fah tǝgaa ahe, ka tai tal mbǝro ga wo ki ne ko. 12Tǝcoŋ zah godel jul mbǝro mai mo ɓoo ge ɓo sǝŋ tǝndaŋ, raita ah mo coŋ ɓo, mo ɓoo zah ah lee ge kǝfal tal mbǝro. 13Tǝcoŋ wah zyim jul mbǝro ah in jol ah mo yea nǝkǝki vaŋno, yea nǝkǝki ah vaŋno ta, mo yeara kahlaa tal mbǝro gwa daŋ tǝndaŋ tǝndaŋ ka kiŋ tal mbǝro daŋ.

14Mo joŋ fan rii tǝ jul mbǝro ne wak kǝbǝr ma syesyiŋ mo rii tǝ wak kǝbǝr ah ne wak syiŋ malii.

15Mo joŋ plaŋ tal mbǝro ma pea sǝŋ ne kpuu akasia. 16Wah plaŋ ah ra mo i jol jemma, 'ah ah ra mo i jol vaŋno ne raita. 17Plaŋ ah ra vaŋno vaŋno daŋ fan gban ah mo yea gwa gwa mo mgbãara ki ne plaŋ ahe. Mo joŋ nai ne plaŋ tal mbǝro daŋ. 18Mo joŋ plaŋ tal mbǝro naiko, plaŋ jemma gwa nǝfah morkǝsǝŋ tal mbǝro. 19Mo zyeɓ ɓal plaŋ ma vãm solai jemma nai, mor kǝsǝŋ plaŋ jemma gwa, ɓal gwa mor kǝsǝŋ plaŋ ah vaŋno vaŋno daŋ mo yea ne fan gban ah gwa wol ahe. 20Mo joŋ plaŋ jemma gwa nǝfah kǝsǝŋ tal mbǝro, 21tǝkine ɓal plaŋ vãm solai jemma nai, ɓal gwa mor kǝsǝŋ plaŋ ah vaŋno vaŋno daŋ. 22Zah kǝndaŋ in zah tal mbǝro kǝmorcomlil mo joŋ plaŋ gŋ yea. 23Mo joŋ plaŋ gwa mor nyah tal mbǝro. 24Mo mgbãa plaŋ ah ge wo ki gwa gwa, wah ah mo dai sǝŋ wo tǝgaa patǝ vaŋno ahe. Mo joŋ nai gwa daŋ mor kah nyah tal mbǝro matǝ gwa ko. 25Plaŋ ah mo yea nama, ɓal ah ra ma ne vãm solai mo yea jemma tǝ yea, mor kǝsǝŋ plaŋ vaŋno vaŋno daŋ ɓal ah mo yea gŋ gwa gwa.

26Mo zyeɓ kpuu yil plaŋ ah ra dappe ne kpuu akasia mor plaŋ ma laa tal mbǝro nǝkǝki, 27so kpuu yil plaŋ dappe mor plaŋ patǝ gwa laa tal mbǝro nǝkǝki, so kpuu yil plaŋ dappe mor plaŋ ma fah zah kǝndaŋ kǝmorcomlil ahe. 28Kpuu yil plaŋ ma kǝsyil tal mbǝro, mo ur gin kǝki ŋhaa mo dai kǝki ahe. 29Mo syee vãm kaŋnyeeri ge wo plaŋ ahe, mo joŋ tǝgaa ma gban kpuu yil plaŋ ne vãm kaŋnyeeri. Mo syee vãm kaŋnyeeri ge wo kpuu yil plaŋ ta. 30Mo zyeɓ tal mbǝro tǝgbana mai me cuu nyi mo tǝ waare.

31Mo zyeɓ zyim rii cok ne zyim manik ma kaŋ ne syiŋ pǝsǝ̃ǝre: ma kǝrãhmo, masyẽ ne masyẽ tǝ nyaknyakke. Mo kaŋ foto cerubim wo zyim ahe. 32Mo rao zyim ah tǝ kǝṽǝl gban zyim ma ne vãm kaŋnyeeri mai mo ɓaa ge ɓo wo wǝǝdǝǝ ma kpuu akasia mai vãm kaŋnyeeri mo syee ge ɓo wol ahe, mai mo uura ɓo tǝ ɓal vãm solai matǝ nai. 33Mo rao zyim ah tǝ kǝṽǝl gban zyimmi, mo ɓaŋ sunduku gbanzah mai tǝsal ma ne ɓǝ lai mo ɓǝr ah ge nǝn zyim ne ko, zyim ah ga woŋ tǝgǝǝ cok matǝdaŋdaŋ ne cok matǝdaŋdaŋ tǝɗe'.#Yahu 6:19; 9:3-5 34Mo kan cok rwah faɓe' tǝ sunduku gbanzah ahe. 35Mo kan taabǝl nǝfah kǝlal cok matǝdaŋdaŋ tǝɗe', mo so kan pitǝrla jaŋjaŋ ne taabǝl fah morkǝsǝŋ tal mbǝro, mo kan taabǝl ah nǝfah kǝsǝŋ.

36Mo zyeɓ zyim ɓoo zahfah tal mbǝro ne zyim manik ma kaŋ ne syiŋ pǝsǝ̃ǝre, makǝrãhmo, masyẽ ne masyẽ tǝ nyaknyakke, mo kaŋ ŋwǝŋwǝǝre. 37Mo joŋ wǝǝdǝǝ zahfah ne kpuu akasia dappe, mo syee vãm kaŋnyeeri ge wo ɓǝǝra, kǝṽǝl gban zyim ɓǝǝ mo yea ne vãm kaŋnyeeri, mo ɓaŋ tǝ ɓal wǝǝdǝǝ ah ra ne vãm syẽ dappe.

Currently Selected:

PƏ̃Ə ZA ISRAEL 26: MUAR

Highlight

Compare

Copy