AMOS 7
7
Tǝzyeere
1Dǝɓlii Masǝŋ cuu fakwan nyi me. Pǝ fakwan ah me kwo ko joŋ tǝzyee ɓo pǝlli. Fan ah joŋ gwari fahfal mai mo saŋra wom goŋ ma zahnahpel ah moo saŋra, so zahwom ah tǝŋ zyee ɓe. 2Pǝ fakwan ɓe me kwo tǝzyee re fan mapǝ̃ǝ mo tǝ sǝr ah daŋ. So me faa: Oseni Dǝɓlii, mo rõm faɓe' za ɓo. A gak yeara wo sǝr ɗǝne? Ara pǝnyeere, so ara pǝtǝtǝ̃ǝre.
3Dǝɓlii so fer ɓǝ foo ah mo foo kǝnah ɓo ka joŋ faa: Fan mai mo kwo ka ga joŋ yao.
Wii
4Dǝɓlii Masǝŋ cuu fakwan nyi me. Pǝ fakwan ah me kwo ko tǝ zyeɓ wii ka ŋgoŋ kiita tǝ zan ah ne ko. Wii tǝŋ syen mabii malii daga mor fil ah sǝŋ ŋhaako, so ge tǝŋ ka syen sǝrri. 5So me faa: Oseni Masǝŋ Dǝɓlii, mo soɓɓe, za ɓo gak yeara wo sǝr ɗǝne? Ara pǝnyeere, so ara pǝtǝtǝ̃ǝre. 6Dǝɓlii so fer ɓǝ foo ah mo foo kǝnah ɓo ka joŋ faa: Fan ah ka ga joŋ yao.
Suu lii fanne
7Dǝɓlii cuu fakwan nyi me. Pǝ fakwan ah me kwo ko uu ɓo ne suu lii fan jol kah yaŋ mai mo vuura ɓo mo liira ɓǝrak yaŋ ah ɓo ne suu lii fanne. 8So fii me faa: Amos, mo kwo ɗah fẽe ɓo ne? Me zyii zah ah faa: Me kwo suu lii fan ɓo.
So faa: Ame tǝ joŋ nai mor ka cuu, za ɓe ara tǝgbana yaŋ mai mo vuu ɓo mo ka ɓǝrak ya. Ame ka ga fer ɓǝ foo ɓe me foo ɓo ka ŋgoŋ kiita tǝ ɓǝǝ faɗa yao. 9Cok mai morsǝ̃ǝ Isak moo juura pel gŋ me ga ɓeɓɓe, cok za Israel matǝdaŋdaŋ ah ra daŋ a ga ciŋ gboŋni, me ga mgboo morsǝ̃ǝ goŋ Jeroboam.
Amos ne Amazia
10Amazia pa joŋzahsyiŋ ma yaŋ Betel pepee ge wo goŋ Jeroboam, faa: Amos a kǝǝ zah za ka ur ɓǝ tǝ ɓo. Ɓǝ faa ah mo tǝ faa a ga ɓeɓ sǝrri. 11Ɓǝ mai moo faako nyi za a naiko. A faa: Jeroboam ga wǝ zah salle, a ga woora za Israel pǝ sǝr ɓǝǝ kal ga pǝ byak ne ko.
12So Amazia faa nyi Amos: Kii ɓe profeto Masǝŋ! Mo pii soo ge sǝr Yuda ka mo cuu ɓǝ ɓo gŋ ka mo soora mo ne lak tǝ ɓǝ ah gŋ ŋhaako. 13Mo cuu ɓǝ ɓo yaŋ Betel nyee kao, mai cok juupel goŋ yo, tǝkine yaŋ juupel zana.
14Amos zyii zah ah faa: Ame ye ka profeto Masǝŋ mai moo faa ɓǝ Masǝŋ mor ka za mo soo ne lak ya. Ame ye pakǝpii fanne, me zyeɓ mor kpuu wuuri. 15Amma Dǝɓlii ge ɗii me gin pǝ cok pii fan ɓe me tǝ piini, faa nyi me, me ge faa ɓǝ Masǝŋ nyi zan ah Israel. 16Zǝzǝ̃ǝ mo laa ɓǝ faa Dǝɓlii mo faa ɓo. Mo faa me soɓ faa ɓǝ Masǝŋ me tǝ faani, me soɓ faa ɓǝ maɓe' ah tǝtǝl za Israel. 17Mor mo faa naiko Amazia, Dǝɓlii tǝ faa zǝzǝ̃ǝ nyi mo: Mawin ɓo ga ciŋ matǝkoi tǝgǝǝ yaŋ, a ga ikra wee ɓo zah sal ga lalle, 'wah ɓo mo ne ko a ga ciŋ mǝ za ki. Amo ne suu ɓo mo ga wǝ pǝ sǝr za gwǝǝre. A ga woora za Israel pǝ sǝr ɓǝǝ na byak kal ga sǝr ki ne ko.
Bible Moundang © Alliance Biblique du Tchad, 1996.