AMOS 6
6
Ɓǝ gaɓ mai moo ga ge tǝ za Israel
1Ɓǝ gaɓ ga ge tǝ ɓii za mai we kaa ɓo Sion jam, ne za mai we tǝ laa suu ɓii pǝ'nyah yaŋ Samaria! Awe za mai we lǝŋ we pǝyǝk kǝsyil zahban Israel, za a ginra wo ɓii ka fii ka we gbah jol ɓǝǝra! 2We ge yaŋ Kalne, ka we ẽe yaŋ ahe. Ka we so ge yaŋ malii ma ɗii ne Hamat, ka fahfal ah we ge sǝr Filistien we ge ẽe yaŋ ma ɗii ne Gat. Yaŋ rai kal sǝr goŋ Yuda ne mǝ goŋ Israel ya ne? Sǝr ɓǝǝ pǝluu kal ma ɓii ɓe. 3Awe lǝŋ zah'nan bone a pǝɗǝk ba, so awe gbah jol ɓǝɓe' ka mo ge pelle! 4Ɓǝ pǝgaɓ ga ge tǝ ɓii za ma swah tǝ faswul masãh ahe, we 'nam suu pǝ cok swul ɓiiri, we joŋ fĩi, we ŋgom wee dǝǝ ne wee pǝsǝ̃ǝ ren gŋ. 5We 'yah ka gea lǝŋ na David mo joŋni ka daa tǝnjuŋ ne ko. 6Awe daŋ we zwah yim ne daŋne! We tah nǝm ma fuŋ 'nyah ahe, amma we ka swaa ɓǝ yaŋ Israel mo ciŋ gboŋ ɓo ya. 7Mor ahe, awe yee ga pǝ byak kǝpelle. Fĩi ɓii wee joŋ tǝkine farel lii wee tai ki gŋ renne, a ga i zahe.
8Dǝɓlii Masǝŋ ma ne swah daŋ lai za Israel faa: Ame syiŋ yii suu za Israel tǝkine yaŋ masãh ah mai mo vuura ɓo syiŋ. Me ga soɓ yaŋ goŋ ɓǝǝ malii tǝkine fan mai mo no gŋ daŋ ga jol za syiŋ ɓǝǝra.
9Koo za mo coŋ ɓo piicel tǝ vaŋno jemma laŋ, a ga wukra daŋ. 10Ne cok zum dǝɓ ma wul mo ge ka ɓaŋ wul zum ah ka ga cii ɓe, a ga ɗii dǝɓ mai mo ɓǝr yaŋ a so faa: Wul maki ah no ŋhoo ne? Dǝɓ ah ga zyii ɓǝ gin zah ah faa: Kǝka. So a ga faa: Mo yea zahe, na joŋ yella ka na ɗii tǝɗii Dǝɓlii ge zah ka.
11Ne cok Dǝɓlii mo faa ɓǝ ka fan mo joŋ ɓe, yaŋ maluu ah mo vuura ɓo ne manyee ah daŋ a ga dah ra ga sǝŋ tǝɗe' tǝɗe'. 12Pǝr gak ɗuura tǝwaa no ne? Za gak woo dǝǝ ga pǝpǝǝ ne pǝ bii no ne? Kǝka. So ne daŋ laŋ, we fer kiita matǝ goŋga ah ciŋ fan ma in dǝɓ pǝ wulli! Awe so joŋ goŋga ɓo tǝgbana fan maɓe' ahe! 13Ne cok we re yaŋ Lodebar, we yii suu ɓii ne ɓǝ ah we faa awe pǝswah nǝn gak ren Karnaim.
14Dǝɓlii Masǝŋ ma ne swah daŋ zyii zah za Israel faa: Awe za Israel, me ga pee za sal ma sǝr ki gin re sǝr ɓiiri, a ga gaɓra we, a ga pǝ̃ǝra tǝ fahlii ma pǝzyil waa Hamat nǝfah kǝsǝŋ ahe, ŋhaa ka ga dai mabii Wul nǝfah morkǝsǝŋ ahe.
Bible Moundang © Alliance Biblique du Tchad, 1996.