AMOS 8
8
Kee ma ne lee kpuu
1Dǝɓlii Masǝŋ cuu fakwan nyi me. Pǝ fakwan ah me kwo kee kan ɓo ne lee kpuu. 2Dǝɓlii fii me faa: Amos, mo kwo ɗah fẽe ɓo ne? Me zyii zah ah faa, me kwo kee kan ɓo ne lee kpuu.
So Dǝɓlii faa nyi me: Cok in zah za ɓe Israel ge ɓe, me ka ga fer ɓǝ foo ɓe me foo ɓo ka ŋgoŋ kiita tǝ ɓǝǝ faɗa yao. 3Zah'nan ah mo ge ɓe, lǝŋ mai moo ɗǝǝra yaŋ goŋe, a ga ciŋ lǝŋ yee wulli, wul ga yea pǝ cok daŋ, dǝɓ ka ga laa cii ɓǝ faa dǝfuu gŋ mgbǝɓ ya.
Kiita tǝ za Israel
4Awe za mai wee cuu syak nyi mabaidǝɓɓi, we kyeɓ ka vǝr za syak gin wo sǝrri, we laa ɓǝ maino. 5Awe faa pǝ zahzyil ɓii: Fĩi mafuu ga pǝ̃ǝ kal nekẽe ka na lea fan ne sor man ne? Com 'yak ga vǝr nekẽe ka na tǝŋ lea fan ne fan ne? Na ga lii fan ne tahsah malaŋ ahe, so na ga ɓaa lee fan ga gŋ. 6Na ga joŋ lee sor pǝgaɓɓe, ka na lwaa pa syak mai mo ka gak soo val ma tǝtǝl ah ya, koo sǝɓal laŋ mo ka gak ka soo val ah ya, ka na lwaa lee ko na byakke.
7So Dǝɓlii Masǝŋ Israel haa zah faa: Me ka ga yaŋ yeɓ ɓe' ɓǝǝr a syaŋsyaŋ. 8Mor ahe, sǝr ga coo, koo zune mo pǝ sǝr ah daŋ a ga yeyee, sǝr ah ne lii ah daŋ a ga laŋ geri geri. A ga wii ga sǝŋ, so a ga ɗǝr ga tǝki tǝgbana bii el Nil moo joŋni. 9Zah'nan ah mo ge ɓe, me ga joŋ com dan ne com kǝsyitǝtǝlli, cok ga foo tǝ sǝr piɓpiɓɓa. 10Me ga fer fĩi ɓii wee joŋ ciŋ yee wulli, me ga fer lǝŋ ɓii we tǝ laa pǝ'nyah ne ciŋ ɓǝ swaani, me ga joŋ we sõo tǝtǝl ga lalle, we ɓaa mbǝro dahsuu. We ga yea tǝgbana za wee mai we tǝ vaŋno ɓǝǝ mo ǝ̃ǝ ra wǝ ɓo. Zah'nan ah a ga vǝr ne ɓǝ gaɓ no cam.
11Zah'nan ah no ginni, ne cok ah me ga soɓ koŋ wǝ tǝ sǝrri, koŋ ga i zana, amma koŋ ah koŋ farel ye ka ga yea ya, koŋ bii ga i ra, amma koŋ ah koŋ bii ye ka ga yea 'manna ya ta. Koŋ ah koŋ ɓǝ faa Dǝɓlii ye ga yea. Ame Dǝɓlii Masǝŋ me ye faa ɓo. 12Za ga kyãhra, a ga urra daga fahsǝŋ ga fah morkǝsǝŋ, a ga urra daga fah morcomzah'nan ga fah morcomlilli. A ga kyãhra cok daŋ ka kyeɓ ɓǝ faa Dǝɓlii, amma ka ga lwaara ya. 13Ne zah'nan ah woi masãh ah ra tǝkine wee tǝbanna daŋ a ga wukra koŋ bii. 14Za mai moo haara zah ne tǝɗii masǝŋ ki ra ma yaŋ Samaria moo faara: Pǝ tǝɗii masǝŋ ma yaŋ Dan, wala: Pǝ tǝɗii masǝŋ ma yaŋ Beerseba, zan ah a ga leara ga sǝŋ, ka ga urra sǝŋ faɗa yao.
Bible Moundang © Alliance Biblique du Tchad, 1996.