AMOS 5
5
Dǝɓlii ɗii za Israel ka mo toora bii
1Awe za Israel, we syii sok we laa lǝŋ wul mai me ɗǝǝ ɓo tǝ ɓii ɗao. 2Israel lee ɓe, ka ur sǝŋ faɗa yao. Ɓoo ɓo tǝ sǝr bǝraŋ nooko, pa ma gbah jol ah ka ɓaŋ ko ur sǝŋ kǝka.
3Dǝɓlii Masǝŋ faa: Yaŋ Israel pee sooje ujenere, amma sai temere vaŋno ye pii soo ge yaŋ to.
4Dǝɓlii faa nyi za Israel: We ge wo ɓe, we ga kaa jam. 5We ge yaŋ Beerseba ka juupel gŋ ka. We kyeɓ ka we lwaa me Betel ka - Betel ga ciŋ fan kolle. We ge Gilgal ka - zan ah kiita ŋgoŋ ɓo tǝtǝl ɓǝǝ a yah gara zah sǝr za ki. 6We ge wo Dǝɓlii, we ga kaa jam. We zyii joŋ nai ya ɓe, a ga ɗǝr gin tǝ za Israel tǝgbana wii, wii ga sye za yaŋ Betel, dǝɓ ma gak rum ah ka yea ya, mor kiita ŋgoŋ ɓo tǝ ɓiiri, 7awe fer goŋga ciŋ ɓǝ kolle, awe ɓeɓ ɓǝ kiita zana.
8Dǝɓlii ye joŋ ŋwǝǝmǝŋgai ma ɗii ne Maŋwǝǝceltǝgyaŋne, ne mai moo ɗii ne Makãhneweere tǝkine ŋwǝǝmǝŋgai mapãa daŋ. A fer cokfuu ciŋ cokfãi, a fer com ciŋ suŋni, a ɗii bii mabii mo ge, a so soɓ rah tǝ sǝrri, a ɗiiko ne Dǝɓlii.#Joɓ 9:9; 38:31 9A muŋ za maswah ah tǝkine yaŋ ma ne fan sal ah ra.
10Awe dǝfuu we syiŋ dǝɓ ma lai we tǝ ɓǝɓe', we ka 'yah pa ma faa goŋga nyi we wat pǝ cok kiita ya. 11Awe cuu syak nyi za syakke, awe sǝǝ sor jol ɓǝǝra. Mor ah we ka ga hai pǝ yaŋ masãh ah mai we vuu ɓo ne tǝsal ko ya, wala we ka ga zwah bii lee kpuu vin ɓii masãh ah ra mai we pea ɓo pǝ 'wah ɓii ya. 12Me tǝ faɓe' ɓii ɓe, a pǝlli, me tǝ ɓǝɓe' lii ɓii camcam we joŋ ɓe ta. Awe foo mor za matǝ njaŋ, we nyiŋ lak tǝ ɓǝ kiita ka ɓeɓ kiita ne ko, we cak za syak ka kiita ɓǝǝ mo lwaa ŋgoŋ pǝsãh ka. 13Mor ahe, ne cok mai we tǝ joŋ faɓe' ma morãiko, dǝɓ mai mo lǝŋ azye ne tǝtǝl no ka faa ɓǝ ki ga zah ya.
14We kyeɓ fan maɓe' ah ka, amma we kyeɓ fan masãh ahe, mor ka we kaa jam. Dǝɓlii Masǝŋ ma ne swah daŋ a ga yea ne we tǝgbana we faa ɓo. 15We syiŋ ɓǝɓe', we 'yah ɓǝ sãhe. We joŋ ka goŋga mo yea pǝ cok kiita. Ɗah maki Dǝɓlii ga kwo syak tǝ zahban mai mo coŋ ɓo no ne?
16Dǝɓlii Masǝŋ ma ne swah daŋ faa: Dahgor tǝkine yee wul a ga yee tǝ fahlii tǝgǝǝ yaŋ, a ga ɗiira za pǝǝ 'wah ka mo ge yera yee wul ne za mai mo soora ra ɓo ne lak mor ka yeyee wulli. 17Yee ga yee pǝ 'wah kpuu vin ne lii ah daŋ. Fan mai daŋ a ga joŋ nai mor ka me ge ɓo ka ŋgoŋ kiita tǝ ɓiiri. Ame Dǝɓlii me ye faa ɓo.
18Awe za mai we ne koŋ zah'nan gin Dǝɓlii daŋ, we ga laa bone ne pǝ'manne! We ga lwaa fan sãh fẽe ne zah'nan ah ne? Zah'nan ah zah'nan cokfuu yo, mǝ cokfãi ye ka. 19Zah'nan ah a ga yea tǝgbana dǝɓ moo ɗuu gin wo ɓol kal ga zyaŋ ne kpiŋ! Wala a tǝgbana dǝɓ mai mo kal ge ɓǝr yaŋ ah mo ɓoo jol ge wo suu yaŋ, soo mo loŋ ko gŋ! 20Zah'nan Dǝɓlii a ga yea pǝfuu kurum kurum, cokfãi ka ga yea ya, zah'nan ah a ga yea pǝfuu, cok ka sǝǝ biŋ ya.
21So Dǝɓlii faa: Ame syiŋ fĩi ɓii wee joŋ daŋ ɓo syiŋ, me 'yah ya.#Esa 1:11-14 22Ne cok we ɓaŋ fan ge tǝ joŋ syiŋ suŋwii ne wo ɓe tǝkine nyi farel ɓii nyi me ɓe, me ka ga 'yah ya. Me ka 'yah faɓal ɓii maŋwoo ah ra mai we ga ŋgom ka joŋ syiŋ ne wo ɓe ya ta. 23We soɓ lǝŋ ɓii we tǝ ŋwaa lukluk ko, me ka tǝ 'yah laa tǝnjuŋ ɓii we tǝ woŋ ya. 24Fan mai me tǝ 'yahe, me 'yah kiita matǝ goŋga mo yea cẽecẽe tǝgbana bii moo ɗuu pǝ elle, joŋ fan matǝ njaŋ ah mo yea tǝgbana bii mai mo ka ǝŋ kpee ya.
25Za Israel, ne cok mai we joŋ syii jemma nai kǝsyicokki, we ŋgoŋ fan joŋ syiŋ wo ɓe ne tǝkine nyi fan nyi me ɗǝ ya.#Yeɓ 7:42-43 26Zǝzǝ̃ǝko we tǝ ga syee mor masǝŋ ŋwǝǝmǝŋgai ɓii ra mai we zyeɓ ne jol ɓiiri we ɗii ra ne Sakkut ne Kaiwan. 27Mor ahe, me ga woo we ga pǝ byak ne nǝn Damaskus nǝkǝŋhaa. Ame Dǝɓlii mai tǝɗii ah ye mo Masǝŋ ma ne swah daŋ faa naiko.
Bible Moundang © Alliance Biblique du Tchad, 1996.