Zakhariya 12
12
Zwita zwe Jerusalema zowolobesiwa
1Dama la Yahwe ngekwe Iziraela. Yahwe ibo banobambula kudzimu, ibo banoteya thiwa dze shango, ibo banolonga meya mu nthu bakati, 2“Bonani ndowothama Jerusalema bhepe linodzembelekesa ku bathu bakabaka kuipoteleka. Ngono Juda inowokombiwa bo mukukombiwa kwe Jerusalema. 3Mu zhuba ilelo, kowoti zwitjaba zose zwe shango zwa kubunganila Jerusalema, ndowothama Jerusalema ikanga bgwe linolema, bose banowoshaka kuizunguza banowozwikubadza. 4Mu zhuba ilelo ndowoloba mbizi imwe ne imwe nge lutjo ne ntaswi wayo nge bupengo, koleba Yahwe. Ndowobiga zhisho mu ng'umba ye Juda, koga ndowopofupadza mbizi dzose dze zwitjaba. 5Ipapo batungamili be Juda banowoti tja mu moyo yabo, ‘Bagali be Jerusalema bakasima dumbu ngoti Yahwe Ndzimu Masimbawose ba Ndzimu wabo.’
6“Nge zhuba ilelo ndowothama batungamili be Juda kuti bange bhuba le moto we hwuni kene bange bhuba le moto we mashanga. Banowolobesa bathu bose ku luji kene ku lumeshwe bathu bose bakapoteleka koga Jerusalema iyo inowosala ili mile zwayo kusina tjaizunguza mu magalo ayo.
7“Yahwe banowotjidza magalo e Juda kutanga kuti ndizo ntutshi we ng'umba ya Dafite ne we bagali be Jerusalema usipinde we Juda. 8Mu zhuba ilelo Yahwe banowobakilila bose banogala mu Jerusalema, kuti ndizo zwiworoworo zose zwipakati kwabo mu zhuba ilelo zowosima sa Dafite ngono ng'umba ya Dafite inowonga Ndzimu, ikanga batumwa bakudzimu ne ntumwa wa Yahwe unoyenda akabatungamila. 9Mu zhuba ilelo ndowozwimisila kulobesa zwitjaba zose zwinowonginilila Jerusalema.
10 #
Johani 19:37; Zumbunulo 1:7 #
Matewu 24:20; Zumbunulo 1:7 “Ndowolonga meya ye ngoni ne ntembezelo mu bathu be ng'umba ya Dafite, bagali be Jerusalema. Banowolinga kundili, iye wabakabhaya ngono banon'lilila se nthu elilila mwana uwe uyega, bakabe ne shungu se nthu elilila mwana uwe we tjilisana we mbano. 11Mu zhuba ilelo, tjililo mu Jerusalema tjowobe tjili tjikulu kwazo. Tjowobe tjinga tjililo tjekuliligwa Hadadi Rimoni ku lubala gwe Megido. 12Shango inowolila, nsha mmwe ne mmwe nge kwawo ne bakadzi bawo ngekwabo; nsha wa Dafite ne bakadzi bawo, nsha wa Nathani ne bakadzi bawo, 13nsha we ng'umba ya Levi ne bakadzi bawo, nsha wa Shimeyi ne bakadzi bawo 14ne misha yose yakasala ne bakadzi bayo.”
Kalanga Bible © Bible Society of Botswana, 2008, 2018.