Zakhariya 11
11
1Zhula mikoba iyo iwe Lebanoni,
kuti ndizo moto uje miti yenyu ye misida!
2Lilani mubumbuluke imwi miti ye misipuri ngobe misida yawa,
miti yakasima yakolomogwa!
Lilani imwi miti ye mioko ye Bhashani,
ishaka tjikulu tjatemiwa!
3Ihwani tjililo tje balisi,
mafulo abo mabuya akolomogwa!
Ihwani bomba kwe shumba,
ishaka tjakamandana tje Jorodani tjakolomogwa!
Balisi babili
4Yetji nditjo tjinolebgwa ndi Yahwe Ndzimu wangu beti, “Fudza mbudzi ne pkhwizi dzakabigigwa ntome kuti dzibulawe. 5Batengi badzo banodzibulaya ngono banobhuda koga basalobgwa shamu. Ibo banodzitenga banoti, ‘Kudzani Yahwe, ndakafuma!’ Balisi abana ngoni mu bali. 6Ngobe anditjowobe ne ngoni mu bagali be shango iyeyi, kojalo Yahwe. Bonani, ndowolonga nthu mmwe ne mmwe mu luboko gwe mmwe naye ne mu luboko gwa mambo uwe, ngono banowotshambilidza bathu mu shango ngono imi anditowobadzutunula mu maboko abo.”
7Ndizo ndakalisa pkhwizi ne mbudzi dzakabigigwa ntome kuti dzibhayiwe, kwazo kwazo idzo dzakatshambilidziwa. Kudwapo ndakatola swimbo mbili ngono adana imwe nditi, “Ngoni” imwe aidana nditi, “Bhatana.” Ndakafudza pkhwizi ne mbudzi. 8Mu mwedzi uli nng'ompela ndakalobesa balisi batatu. Ndakabe ndipela meya nge kwabo ngono naibo bakabe basingatjandishake. 9Ngono ndakati, “Anditjowobe nlisi wenyu. Tjinofa ngatjife, tjinokolomoka ngatjikolomoke. Ibabo basala ngabaje nyama ye bamwe.”
10Kudwapo ndakatola swimbo yangu inodang'wa Ngoni aivuna nditjinyulula tjidumano tjandakabe ndathama ne bathu bose. 11Ndizo tjidumano tjakatjinyulugwa mu zhuba ilelo. Ibabo bakabe batenga be betengesa pkhwizi ne mbudzi bakabe bakandilingilila ngono bakaziba kuti lakabe lili dama la Yahwe. 12#Matewu 27:9, 10#Matewu 26:15Ipapo ndakababudza nditi, “Ha mubona ili itjo tjakalulwama, mu ndipe ntengo wangu koga ha kusakajalo muzwibigile iwo.” Ndizo bakandilipa shekele dze siliva dzili makumi ali matatu (30).
13Ngono Yahwe bakandidwa bakati, “Udziposele mbumbi we hali,” themba iyeyi hwulu yabandiyela ndiyo! Ndizo bakatola shekele dze siliva dzili makumi matatu (30) bakadziposela mu Ng'umba ya Yahwe ku mbumbi we hali.
14Kudwapo ndakavuna swimbo yangu ye bubili inodang'wa Bhatana, ndivuna bukamu pakati kwa Juda na Iziraela.
15Ipapo Yahwe bakandidwa bakati, “Tola kakale zwithu zwe nlisi we tjilengwe. 16Ngoti bona, imi ndowobiga nlisi mu shango usina hanya ne dzinoloba kene kushaka dzakalashika kene kupodza dzakakubala kene kufudza mbuyanana koga unowoja nyama ye dzakakola ebuya epalulanya thozo dzadzo.
17“Yee mme wee! Wapalala iwe nlisi usi watjimwe,
iwe unofupatila mbudzi ne pkhwizi!
Atshene thumo linga nloba luboko ne zhisho lile le luji!
Atshene luboko gugwe gungaswaba,
zhisho le luji lipofupalile tjatjose!”
Kalanga Bible © Bible Society of Botswana, 2008, 2018.