Zakhariya 13
13
Tjenapadziwa mu tjibi
1“Mu zhuba ilelo tshime lisinga pkhwe lowopubukila ng'umba ya Dafite ne bathu be Jerusalema kubatjenapadza mu tjibi ne mukutemapala.
2“Mu zhuba ilelo ndowomisa mazina e midzimu yakabezhiwa mu shango, akuna unowofa aikumbula kakale, koleba Yahwe Masimbawose. Ndowodusila kutjena balebesambeli ne meya dze butemapali mu shango. 3Ngono ha kutjina utjalebesambeli, tate babe na mmeyabe ibo bakanzwala banowoti kunli, ‘Wakafanila fa, ngoti wakaleba manyepkhwa mu zina la Yahwe.’ Ngono ha elebesambeli bazwadzi babe banowombulaya.
4“Mu zhuba ilelo nlebesambeli mmwe ne mmwe unowobhakhwa nge shoni ngekwe mbono ye bulebesambeli gugwe. Aatoambala zwiambalo zwizwe zwe bulebesambeli zwina bukuse kuti ndizo atjebele bathu. 5Unowoti, ‘Andite ndili nlebesambeli, ndi nlimi, shango yagala ili butjilo gwangu kudwa tjose mu butukununu gwangu.’ 6Ha mmwe embhuzwa eti, ‘Mabanga iyahwa amu mbili uwo ndeeni?’ Unowodabila eti, ‘Ndakakubala ku ng'umba ye bakwinya bangu.’
Ndaulo ye kubulaya nlisi
7 #
Matewu 26:31; Mako 14:27 “Vondomoka kaa iwe thumo, vondomokela nlisi wangu,
vondomokela nlume unami,” koleba Yahwe Masimbawose.
“Bulaya nlisi,
kuti pkhwizi ne mbudzi dzipalale,
ndowoshandusila luboko gwangu ku pkhwizana.
8Mu shango yose, koleba Yahwe,
babili muna batatu banowobulawa bakaloba,
ne kwakajalo nng'ompela unowosala.
9Ngono kwe butatu ndowokulonga mu moto,
ndowobasuka se siliva abalika se golide.
Banowodana zina langu
ngono ndowobadabila,
Ndowoti, ‘Bathu bangu,’
ibo banowodabila beti, ‘Yahwe ba Ndzimu wedu.’ ”
Kalanga Bible © Bible Society of Botswana, 2008, 2018.