Baroma 8

Butjilo mu Tjimeya

1Ndizo ngwenu akutjina unowobong'wa nlandu muna ibabo banotjilila muna Kirisiti Jesu, 2ngobe nlayo we Meya ye butjilo muna Kirisiti Jesu wakandisunungula mu nlayo we tjibi ne lufu. 3Ngoti Ndzimu wakathama tjakakona nlayo wakabe walelusiwa nge mbumbiko mbi ye tjinyama, ngotumila Nkololo wawo ezha ali mu mbumbiko mbi ye nthu ali tjibhayilo tjinodusa tjibi. 4Ndzimu wakathama ikoku, kuti ndizo ndulamo inoshakwa nge nlayo ishinge mutili, iswi banotjila kuyendidzana nge Meya, kusi kuyendidzana nge tjinyama. 5Ibabo banotjila tjinyama, mikumbulo yabo imu tjinyama, koga ibabo banotjilila mu Meya, mikumbulo yabo imu zwithu zwe Meya. 6Kutjilila mu mikumbulo ye zwe tjinyama kozhisa lufu, kutjilila mu mikumbulo ye zwe Meya kozhisa butjilo ne kunyalala. 7Nge kuti nkumbulo we tjinyama tjita ku Ndzimu, autohwilila nlayo we Ndzimu, ngobe dumbu usingatubule. 8Ibabo bamu tjinyama abangashathise Ndzimu.

9Koga imwi amute muli mu tjinyama, mumu Tjimeya ha kuli kuti dumbu Meya ye Ndzimu igele mu muli. Iye usina Meya ya Kirisiti ate ali nthu wa Kirisiti. 10Koga ha Kirisiti ali mu muli, nenguba mibili yenyu yakabulawa nge tjibi, meya yenyu inotjila ngekwe ndulamo. 11#1 Bakorinta 3:16Ha Meya ya iye wakamusa Jesu mu bafi igala mu muli, iye wakamusa Kirisiti Jesu mu bafi unowopabo mibili yenyu bupenyu, nge Meya iye inogala mu muli.

12Ndizo wali zwikamu akutotikombeledza kulaugwa nge tjinyama kene kuli kutjila tjinyama, 13ngobe ha mutjila kunoyendidzana nge tjinyama, mowofa. Koga ha mubulaya mishingo isakalulwama ye mbili nge Meya, mowotjila. 14Ngobe bose bakatungamigwa nge Meya ye Ndzimu, bana be Ndzimu. 15#Bagalatiya 4:5-7#Mako 14:36; Bagalatiya 4:6Ngobe amuzoamutjila meya ye bulanda kumubgwiliza mu lutjo, koga makaamutjila Meya inomuthama bana be Ndzimu, yatinoti ndiyo tikalila titi “Abha, Tate.” 16Meya nge kwayo inopa butendeki ne meya yedubo inopa butendeki kuti ti bana be Ndzimu. 17Ha tili bana bawo, tibagalithaka be bushe gwe Ndzimu, ti bagalithaka be Ndzimu tose na Kirisiti; ha kuli kuti todziyila naye, kuti ndizo tikudziwe naye.

Tjedza tje Ndzimu tjawobe tjedu

18Ndobona kuti kudziyila kwe misi ino akuzolizana kufanidzanyiwa nge gudzo latinowozumbunuligwa. 19Ngekuti lubumbo gwakalindila nge kushuba kukulu kuzumbunugwa kwe bana be Ndzimu. 20#Kutangisa 3:17-19Ngobe lubumbo gwakalashisiwa mazwimisilo ago, kusi nge kuda kwago, koga kuli nge kuda kwa iye wakagulashisa ne kugalabgwe kuti gowosunungugwa. 21Lubumbo nge kwago gowosunungugwa mu busungwa gwago gwe kubola, gukazhisiwa mu gudzo le kusununguka kwe bana be Ndzimu. 22Toziba kuti lubumbo gose gwagala guli mubuyendasi ngothumbgwa kuswikila ngwenu. 23#2 Bakorinta 5:2-4Ngono ate lubumbo goga gumubuyendasi, naswibo iswi tina mitjelo ye kutanga ye Meya timubuyendasibo tje mukati setakalindila kuti tithamiwe bana, nge kudzutunugwa kwe mibili yedu. 24Ngobe mukugalabgwe ikoku takatjidziwa. Koga kugalabgwe muna tjinoboneka ate kugalabgwe. Ndiani ungagalabgwe tjaanobona kene? 25Koga ha tigalabgwe tjatisingabone, totjilindila nge moyo nlefu.

26Saikokobo Meya inotibhatsha, mu kusasima kwedu, ngobe atitoziba kutembezela sekwa takafanila; koga Meya nge kwayo inotilebelekela nge kugomela kusingake kukatjenesiwa nge matama. 27Ngono Ndzimu iwo unoshakisisa mimoyo ye bathu, unoziba nkumbulo we Meya, ngobe Meya inolebelekela bayengamali kuyendidzana ne kuda kwe Ndzimu.

28Toziba kuti mu zwithu zose Ndzimu unoshingila bubuya ibabo banouda, ibabo bakadang'wa kuyendidzana nge ndongoloso yawo. 29Ibabo Ndzimu bawakaziba kale wakababigila ntomebo kuti bashandugwe bafanane ne Nkololo wawo, kuti abe mbano pakati kwe thobeledzani njinji. 30Ngono ibabo Ndzimu bawakabigila ntome, wakabadana, ibabo bakadang'wa wakabalulwamisa, ngono ibabo bawakalulwamisa wakabakudza.

Jesu unotilakidza kuti Ndzimu unotida kungapani

31Towotini ngono ngekwa ikoku? Ha Ndzimu uli mile naswi, ndiani unganyanyayidzana naswi? 32Apa iwo usakatjiba Nkololo wawo koga wakanthama tjibhayilo nge kwedu tose, apa autowotipa bo zwithu zose naye kene? 33Ndiani unowobona bashalugwa be Ndzimu nlandu kene? Ndzimu ndiwo unolulwamisa bathu. 34Ndiani ngono unowobona nlandu? Apa ndi Kirisiti Jesu, iye wakafa, ee, iye wakamusiwa mu bafi uku luboko gwe luji gwe Ndzimu unotilebelekela kene? 35Ndiani ungatithubukanya ne ludo gwa Kirisiti? Apa i manikano, kene kuhwazogwadza kukulukulu, kene kudziyidziwa, kene zhala, kene kuyenda mbujo, kene mbatsha, kene thumo linobulaya? 36#Njimbo 44:22Sekwa kwakakwagwa kuyi,

“Nge kwenyu tobulawa zhuba lose,

tobhakhwa se pkhwizi dzinonobhayiwa.”

37Aa, mu zwithu zose izwezwi topinda bakundi munli iye wakatida. 38Ndina malebeswa ekuti akuna tjingatithubukanya ne ludo gugwe, lufu kene butjilo, batumwa be kudzimu kene meya mibi kene zwithu zwiyapo, kene zwithu zwinozha, kene masimba e babi, 39kene pezhugwi, kene pasi akuna tjimwe mu lubumbo gose tjingatubula kutithubukanya ne ludo gwe Ndzimu igo gwatinowana ndi Kirisiti Jesu She wedu.

Currently Selected:

Baroma 8: KBTP

Highlight

Compare

Copy