Baroma 7

Tjilakidzo tje ndobolo

1Apa amutoziba kene zwikamu kuti nlayo unolaula nthu ha atjatjila koga? Ndolebeleka ne bathu banoziba nlayo. 2Kongasawoku nkadzi wakalobogwa wakasungwa nge nlayo ku nlume uwe ha nlume atjatjila, koga ha nlume uwe atjifa nkadzi wasununguka mu nlayo we ndobolo. 3Ndizo ha elobogwa nge mmwe nlume koga nlume uwe atjatjila, unowodang'wa phombgwekadzi. Koga ha nlume uwe afa, wasununguka mu nlayo iwoyu, ndizo ha elobogwa nge mmwe ate ali phombgwekadzi. 4Saikoko zwikamu zwangu makafa ku nlayo, ndi Kirisiti, kuti ndizo ngwenu mube be upoga ba iye wakamusiwa mu bafi, kuti ndizo mube nge zwizwalo mu Ndzimu. 5Takati titjatjilila tjinyama njemulo dzedu mbi dzinosasayidzigwa nge nlayo dzakabe dzishinga mu mibili yedu, dzakasima kuti dzizwale mitjelo ye lufu. 6Koga ngwenu takasunungugwa mu nlayo, ngoti takafa kuna itjo tjakatongobe tjakatisunga. Ndizo atitoshinga tili pasi kwe nlayo nkulukugwi wakabe wakakwagwa, timu butjilo butshwa gwe Meya.

Nlayo ne tjibi

7 # Kufuluka 20:17; Matama 5:21 Towotini ngono? Towoti nlayo tjibi kene? Ndodwa! Koga ha nlayo wakabe usipo ndobe ndisakaziba tjibi. Ha nlayo wakabe usati, “Usitjibe” ndobe ndisakaziba kuti tjiba ini. 8Koga ngekwe nlayo tjibi tjakawana tjibaka tje kuthama zila dzose dze tjiba mundili. Kuzhe kwe nlayo tjibi tjakafa. 9Ndakatongobe ndili mpenyu kuzhe kwe nlayo, koga nlayo wakati uzha, tjibi tjikamuka, ngono afa. 10Ngono nlayo iwo wakabe wakafanila kuzhisa butjilo, ku ndili wakazhisa lufu. 11#Kutangisa 3:13Ngobe tjibi ngowana tjibaka tjakatubula mu nlayo tjikanditjebela, nge kwawo tjikandibulaya.

12Ndizo nlayo wakayengemala ne ndayo yakayengemala kakale yakalulwama imbuya. 13Apa ikoku kodwa kuti tjakalulwama tjakandizhisila lufu kene? Ndodwa! Tjibi nditjo tjakazhisa lufu ngoshingisa tjakalulwama, kuti ndizo tjibi tjiboneke kuti tjibi. Ngono ndizo nge nlayo tjibi tjolakidziwa tjakabipa kupindisa.

Ngwa imu nthu

14Toziba kuti nlayo u tjimeya, koga imi ndi tjinyama, ndakatengesiwa kube nlanda we tjibi. 15#Bagalatiya 5:17Anditohwisisa mishingo yangu, ngobe anditoshinga tjandinoda koga ndoshinga itjo tjandisingashake. 16Ndizo ha ndishinga tjandisingashake ndoduma kuti nlayo wakalulwama. 17Ndizo akutji imi ndinotjithama koga i tjibi tjigele mundili. 18Ngobe ndoziba kuti akuna tjakalulwama tjinogala mundili, ndodwa kuti mu mbumbiko yangu ye tjinyama. Ndingayemula kushinga tjakalulwama koga asitubule kutjishinga; 19ngobe tjandinoshinga ate tjakanaka tjandinoshaka shinga, koga, mbipo yandisingashake shinga ndiyo yandinoshinga. 20Koga ngwenu andishinga tjandisingashake shinga, akutji imi ndinotjishinga koga tjibi tjinogala mundili.

21Ndizo ndotjiwana kwabe nlayo kuti ha ndishaka kushinga tjakalulwama, mbipo ipejo nami. 22Ngobe mukati kwangu ndoshathila nlayo we Ndzimu, 23koga ndobona nlayo upoga ushinga mu ndungululo dze mbili wangu, ugwa ne nlayo we nkumbulo wangu, ngono undithama nsungwa we nlayo we tjibi unogala mu ndungululo dze mbili wangu. 24Ndodziyila seni! Apa ndiani unowondiangulila mu mbili iwoyu we lufu kene? 25Ngakubokiwe Ndzimu, iwo unoshinga ikoku ndi She wedu Jesu Kirisiti!

Ndizo ngwenu imi nge kwangu mu nkumbulo wangu ndolondolodza nlayo we Ndzimu, koga mu tjinyama ndolondolodza nlayo we tjibi.

Currently Selected:

Baroma 7: KBTP

Highlight

Compare

Copy