Baroma 14

Usisumikilise Ikamu tjitjo

1 # Bakolosa 2:16 Amutjilani nthu usakasima mu kugalamoyo, koga musikakabadzane naye ngekwe mikumbulo iye. 2Nthu mmwe ungabe ne kugalamoyo kukulu kulu kwaanotubula kuja tjimwe ne tjimwe, koga nthu usakasima mu kugalamoyo unoja milibo koga. 3Nthu unoja tjimwe ne tjimwe ngaasilingile pasi usingaje, usingaje asibone nlandu unoja tjimwe ne tjimwe, ngobe Ndzimu wakan'amutjila. 4Uani iwe kubona nlandu nlanda we mmwe? Tetshi uwe ndiye unowobona kuti kene unopundula kene unokong'wa. Ngono unowopundula, ngobe Ndzimu uwe unotubula kunthama kuti apundule.

5Nthu unotola limwe zhuba se lakayengemala kupinda limwe, koga mmwe etola kuti mazhuba wose anofanana. Mmwe ne mmwe wakafanila kube ne malebeswa azhele mu nkumbulo uwe. 6Iye unokudza zhuba limwe unoshinga eijalo kukudza She, iye unoja tjimwe ne tjimwe unokushinga kukudza Ndzimu, ngobe unobokela Ndzimu zojiwa. Iye usingaje zwimwe zwithu unokushinga kukudza She, ngono unoboka Ndzimu. 7Akuna wedu unozwitjilila, akuna wedu unozwifila. 8Ha titjila totjilila She, ha tifa tofila She. Ndizo kene titjila kene tifa, ti ba She. 9Ngobe nangwenu Kirisiti wakafa, ngono kabgwilila mu butjilo kuti abe She we banotjila ne bakafa. 10#2 Bakorinta 5:10Ini usumikilisa ikamu tjitjo kene? Kene ini ulingila ikamu tjitjo pasi kene? Tose towoma mbeli kwe Ndzimu kusumikilisiwa ndiwo. 11#Isaya 45:23Ngobe kwakakwagwa kukayi,

“Nge malebeswa ha nditjila, kojalo She,

mmwe ne mmwe unowondithigamila,

ne mmwe ne mmwe unowoleba kuti ndi Ndzimu.” 12Mmwe ne mmwe wedu unowozwidabiligwa ku Ndzimu.

Musithamise bagalimoyo bamwe tjibi

13Ndizo ngatimiseni kusumikilisa, koga tisitongo zwimisila kubiga mu zila ye ikamu tjedu tjimwe tjingatjikutha kene tjingandzinganyidza. 14Ndoziba nge buzhalo muna She Jesu kuti akuna zojiwa zwakatemapala nge kwazo, koga zwakatemapalila nthu unobe ekumbula kuti zwakatemapala. 15Ha uhwisa zogwadza ikamu tjitjo nge tjaunoja, ipapo autjashingila mu ludo. Usiti nge kuja kuko ukabulaya ikamu tjitjo itjo Kirisiti tjaakafila. 16Usiletje kululwama kuko kukalebgwa bubi, 17ngobe bushe gwe Ndzimu ate guli kuja ne kung'wa, koga nge gwe ndulamo ne kunyalala ne kushatha mu Meya yakayengemala. 18Ndizo iye unoshingila Kirisiti nge zila yakajali, unoshathisa Ndzimu kakale unokudziwa nge bathu.

19Ngatitjisalani shule tjimwe ne tjimwe tjinothama kunyalala ne kubhatshana mu kusimisana. 20Musikolomodze nshingo we Ndzimu nge zila ye zojiwa. Zojiwa zose zwibuyanana, koga kwakabipa kuja tjimwe tjinowothama mmwe kawila mu tjibi. 21Akuzolulwama kuti uje nyama kene ung'we nkumbi kene uthame tjimwe koga tjingaliga ikamu tjitjo, kugalamoyo. 22Kugalamoyo kwaunako ngakube pakati kuko ne Ndzimu. Kowoshatha iye usingazwisumikilise muna tjaanothama. 23Koga ha edudumwa ngekwe tjaanoja, Ndzimu unombona nlandu ha etjija, ngobe tjaanothama atjizodwa mu kugalamoyo, ngono tjimwe ne tjimwe tjisingadwe mu kugalamoyo tjibi.

Currently Selected:

Baroma 14: KBTP

Highlight

Compare

Copy