Baroma 12

Butjilo guno kudza Ndzimu

1Ndizoke, zwikamu, ngekwe ngoni dze Ndzimu ndomukumbila kuti mupe Ndzimu mibili yenyu ili tjibhayilo tjinotjila, tjakayengemala tjinoamutjilika ku Ndzimu, kuli iko kunamata kwenyu kwe Tjimeya. 2Musizwifananye ne shango ino, koga shandugwani ngobumbiwa butshwa, ngobumbiwa butshwa kwe mikumbulo yenyu, kuti ndizo mulakidze tjingabe tjili kuda kwe Ndzimu ne tjakalulwama tjingaamutjilika kakale ne tjakapelela.

3Ngono nge ngoni dzandapiwa ndoti ku mmwe ne mmwe wenyu, asizwikumbule kupinda sekwa akafanila kuzwikumbula. Koga azwikumbule kulizana nge kugalamoyo kwawakapiwa nge Ndzimu. 4#1 Bakorinta 12:12Koga se mu mbili nng'ompela tina ndungululo njinji ngono ndungululo idzedzi dzose dzina mishingo yakasiyana. 5Ndizo nenguba tili banjinji, ti mbili nng'ompela muna Kirisiti, koga mmwe ne mmwe i ndungululo ye mmwe. 6#1 Bakorinta 12:4-11Setina zwipo zwakakasiyana kuyendidzana ne ngoni dzatakapiwa ngatizwishingeseni. Ha tjipo tje nthu ili kulebesambeli ngaakushingise kulizana nge kugalamoyo kukwe, 7ha kuli kushinga, ngaashinge; ha kuli kudiya, ngaadiye; 8ha kuli kukulumbidza bamwe, ngaakulumbidze; ha kuli kupa ngaape akasununguka; iye unobhatsha, ngaabhatshe akalonga meya; ha kuli mahwilozogwadza ngaakushinge nge kushatha.

9Ludo ngagube gwakwako. Bengani tjakabipa, mubhate makasimisa muna tjakalulwama. 10Danani nge ludo gwe zwikamu, pindanani mu kukudzana. 11Shingani kwazo musibe simbe. Meya ngaimulonge nyota, shingayililani She. 12Shathani mu kugalabgwe kwenyu, ibeni ne moyonlefu mu kudziyidziwa, mutembezele misi yose. 13Ipani bagalimoyo zwabanosheta, muzwiwolobedze kuamutjila bezi mu mizi yenyu.

14 # Matewu 5:44; Luke 6:28 Kombolelani banomudziyidza, mubakombolele musibalonge bhiso. 15Shathani ne bakashatha, lilani ne banolila. 16#Makungulupeswa 3:7Gadzanani; musizwikudze, koga muzwishanganye ne be tjimo tjipasi mu butjilo, musitongo zwitola kuti makatjenjela moga.

17Musibgwilizile nge tjakabipa. Ibeni ne njele kushinga tjakafanila mu mesho e mmwe ne mmwe. 18Ha kutubuka muna sekwa munobona, tjilani nge kunyalala ne mmwe ne mmwe. 19#Matama 32:35Badiyiwa bangu musitongo bgwilizila, koga letjani bushongola gwe Ndzimu gushinge; ngobe kwakakwagwa kuyi, “Kubgwilizila nge kwangu, ndowobgwilizila, kojalo She.” 20#Makungulupeswa 25:21, 22Kwakakwagwa muhwalo kuti, “Tjita tjitjo ha tjina zhala, utjipe zojiwa; ha tjina nyota, utjipe vula tjing'we; ngobe ngothama ikoku unowobe ubutitika masimbe anothuta mu nsholo uwe.” 21Musikuligwe nge bubi, koga kundani bubi nge ndulamo.

Currently Selected:

Baroma 12: KBTP

Highlight

Compare

Copy