Baroma 11

Limbelimbe le Iziraela

1 # Bafilipi 3:5 Ndobhuzwa ngono kuti, apa Ndzimu wakalamba bathu bawo kene? Ndodwa! Imi nge kwangu ndi N'iziraela, tjizekugwana tja Abhurahama ndili we nsha wa Bhenjamini. 2Ndzimu auzolamba bathu bawo, bawakaziba kuli kale. Apa amutoziba kuti Hwalo dzotini ngekwa Elija, se kwaanokumbila Ndzimu kuti ubone Iziraela nlandu? 3#1 Bomambo 19:10, 14Kati, “She, Baiziraela bakabulaya balebesambeli benyu, bakapkhwanya zwibeso zwenyu zwe zwibhayilo, ndimi ndoga ndasala, ngono banoshaka ku ndibulaya.” 4#1 Bomambo 19:18Koga Ndzimu wakan'dabila uitini kene? Wakati, “Ndakazwibiganyidzila balume bali zwiwulu zwili kutendeka basakatongothigamila Bhaale.” 5Ndizo kwakajalo nangwenu, kuna malimbelimbe Ndzimu awakashalula nge ngoni dzawo. 6Koga ha akashalugwa kwakabigwa mu ngoni dzawo, kodwa kuti kushalula akuzotemelela mu mishingo, ha kwabe kwakajalo, ngoni dzawo dzingabe dzisitji ngoni.

7Ngono kee? Bathu be Iziraela bakakong'wa kuwana tjabakabe beshaka. Bashalugwa bakatjiwana, koga bakasala bose bakakukutala. 8#Matama 29:4; Isaya 29:10Sekwa kwakakwagwa kuyi,

“Ndzimu wakabapa meya ye wope,

kuti mesho asibone

ne zebe dzisihwe,

kuswikila zhuba lino.”

9 # Njimbo 69:22, 23 Ngono Dafite kati,

“Dzene butjilo gwabo gungabe dati ne bhuzhu,

ne tjinobakutha ne kulobgwa kwabo.

10Mesho abo ngaapofupadziwe, kuti ndizo basibone;

bagogonyale nge kusingapele.”

11Ndizo ndobhuzwa, apa bakakuthiwa, kuti ndizo bawe kene? Ndodwa! Koga ngotjinya kwabo, jidzo lakazha kuna Bezwitjaba, kuti ndizo Baiziraela babe ne fupa. 12Ngono ha kutjinya kwabo kufumisa shango, ne kukong'wa kwabo kufumisa Bezwitjaba. Kutjidziwa kwe Baiziraela kowopapha fumwa inopinda iyeyi kanjinji seni!

Ndzimu wakatjidza Bezwitjaba

13Ngwenu ndolebeleka namwi Bezwitjaba. Se ndili ntumwa kuna Bezwitjaba, ndokudza nshingo wangu, 14kuti ndizo Bajuta, ibo be ludzi gwangu babe ne fupa, kuti ndizo bamwe babo batjidziwe. 15Ngobe ha kulambiwa kwabo kudwa kugadzanyiwa kwe shango, kuamutjigwa kwabo kowobeni ha isi kutjila kwe bafi koga?

16Ha ipemu tje tjiwunga tjidusiwa se tjipo tje kutanga, tjakayengemala, tjiwunga tjose tjobe tjakayengemala, ngono ha ndzi we nti wakayengemala ne thabi dzawo dzakayengemala. 17Koga ha thabi dzimwe dze ntoba wakadzwagwa dzakathubugwa, imwi lutabi gwe ntoba we shango mukamedzekiwa muuli, mu magalo abo kuti mube ne gobe mu nti we ntoba, 18musitongo zwikudza se munopinda thabi. Ha muzwikudza, mualakane kuti imwi ate imwi makabhata ndzi koga ndzi ndiwo wakabhata imwi.

19Koga mowoti, “Thabi dzakathubugwa kuti timedzekiwe.” 20Ikoku malebeswa. Bakathubugwa nge kusagalamoyo kwabo, koga imwi musime nge kugalamoyo. Ndizo musizwikudze, koga mube ne kutja. 21Ha Ndzimu usakatjiba thabi dze wakadzwagwa, namwibo autowomutjiba. 22Bonani nzhazho ne bushongola gwe Ndzimu. Una bushongola kuna ibabo bakawa, koga una nzhazho kumuli ha mudwilila mu nzhazho wawo. Koga kuzhe kwa ikoku, namwibo mowothubugwa. 23Ngono ne bamwebo abasadwilila mu kusagalamoyo banowomedzekiwa kakale, ngobe Ndzimu una simba le kubamedzeka kakale. 24Ngono ha imwi makathubugwa mu ntoba we shango nge mbumbiko, mube mu medzekiwa kusingayendidzane ne mbumbiko, mu ntoba wakadzwagwa, ngono kowobe kulelu kungapani kumedzeka kakale thabi idzedzi dzakathubugwa muna mayi badzo kene?

Ndzimu unohwila bathu bose ngoni

25Kuti musizwipe butjenjedu gwa musinago, zwikamu, ndoshaka kuti muhwisise masazibgwe iyawa. Kukukutala kwakangina mu bamwe ba Iziraela, kuswikila Bezwitjaba betjidziwa nge buzhalo. 26#Isaya 59:20, 21Ndizo Iziraela yose inowotjidziwa, sekwa kwakakwagwa kuyi,

“Nsununguli unowodwa ku Ziyoni,

unowodusa bubi gose mu ludzi gwa Jakubo.

27 # Isaya 27:9 Ngono etji nditjo tjinowobe tjidumano tjangu nabo,

ha ndidusa zwibi zwabo.”

28Nge kwe ndebo mbuya Baiziraela zwita zwe Ndzimu nge kwenyu, ngoshalugwa Baiziraela banodiwa ngekwa bobatategulu babo; 29ngobe zwipo zwe Ndzimu ne kudana kwawo azwitoshanduka. 30Sekwa makatongobe musingahwe Ndzimu, ngono ngwenu makahwigwa zogwadza nge kusahwa kwabo, 31ndizo naibo bakashaya kuhwa kuti se kwamakahwigwa zogwadza, na ibobo bahwigwe zogwadza. 32Ndzimu wakathama bathu bose basungwa be kusahwa kwabo, kuti ndizo ubahwile ngoni bose.

Takafanila kuti tikudze Ndzimu

33 # Isaya 55:8 Bathu bedu! Fumwa ye butjenjedu ne luzibo gwe Ndzimu zwikulu seni! Kusumikilisa kwawo akuna ungakutjenesa, ndiani ungalonda zila dzawo kene?

34 # Isaya 40:13 “Ndiani wakaziba nkumbulo wa She?

Ndiani wakabe nkumbuludzi wabo?

35 # Jobe 41:11 Kene ndiani wakatongoupa tjipo

kuti ekotjibuzigwa?”

36 # 1 Bakorinta 8:6 Zwithu zose zwakabumbiwa ndiwo, zwithu zose zwiyapo ndiwo, kakale zwili zwawo. Ndzimu ngaukudziwe nge kusingapele kose! Ngakujalo.

Currently Selected:

Baroma 11: KBTP

Highlight

Compare

Copy