Njimbo 94
94
Ndzimu nsumikilisi wa bose
1Imwi Yahwe, imwi Ndzimu we mbuzuludzo,
imwi Ndzimu we mbuzuludzo, dwililani ngopenya!
2Milikani, imwi nsumikilisi we shango,
ipani banozwikudza tjakabafanila!
3Imwi Yahwe, kowodza kukabe lini babi,
apa kowodza kukabe lini babi bekholisa kene?
4Matama e mazwikudzo anotebuka mu milomo yabo
bose bashingi be bubi banozwikukumadza.
5Banopkhwanya bathu benyu, imwi Yahwe!
Banotshambilidza lukata gwenyu.
6Banobulaya tjilikadzi ne nzhi,
banobulaya siyang'wa.
7Ngono banoti, “Yahwe abatobona,
Ndzimu wa Jakubo autobonesesa.”
8Hwisisa iwe tjilengwe tjinopinda bathu bose,
zwilengwe, apa mowotjenjela lini kene?
9Apa iye wakathama zebe aatohwa kene?
Iye wakabumba zhisho, aatobona kene?
10Iye unolaya zwitjaba,
iye unodiya bathu luzibo,
apa aatotjemela kene?
11 #
1 Bakorinta 3:20
Yahwe banoziba njalakang'wa dze bathu,
kuti iphepo isina tjayakasenga.
12Bakashatha ibabo bamunolaya, imwi Yahwe,
ne mubadiya mu nlayo wenyu.
13Mubanyalulusa kudwa mu mazhuba e kudziyidzika,
kuswikila gomba litshigwa babi.
14Ngobe Yahwe abangalashe bathu babo,
abatowolasha lukata gwabo,
15Ngobe ndulamo inowobgwilila ku balulwami
ndizo bose bakatambunuka mu moyo banowoitobela.
16Apa ndiani unoma nami mu babi kene?
Apa ndiani unondimila mu bashingi be bubi kene?
17Ha Yahwe babe basandibhatsha
meya yangu inobe yalibilidzila kunogala mu shango yakanyalala.
18Ndakati ndialakana kuti, “Gumbo langu lotelela,”
Ludo gwenyu gusingazunguzike, imwi Yahwe, gwakandisimisa.
19Ha njemulo dze moyo wangu dzili njinji,
nyaladzo yenyu inoshathisa meya yangu.
20Apa babusi babi bangashingidzana namwi kene,
ibabo banothama mbipo nge kukombamisa nlayo?
21Banoshangana beluka gwanga ngekwe balulwami,
kakale banosumikilisa bathu lufu basina nlandu.
22Koga Yahwe batjibe dizhilo langu,
kakale Ndzimu wangu shongwe ye dizhilo langu.
23Banowopa babi mbayilo we bubi gwabo,
banowobalashila kutjena nge zila ye bubi gwabo,
Yahwe Ndzimu wedu unowobatshwayila.
Kalanga Bible © Bible Society of Botswana, 2008, 2018.