Njimbo 9
9
Simba le Ndzimu ne ndulamo yawo
1Ndowokudza Yahwe nge moyo wangu wose
ndowoleba ngekwe mishingo
yenyu yose inotjenamisa!
2Ndowoshatha apembela nge kwenyu,
Ndowomba njimbo dzinokudza
zina lenyu imwi mu Pezhugwi zhugwi.
3Zwita zwangu zowoti zwishanduka,
zwikakuthiwa zwikaloba mbeli kwenyu.
4Ngoti malakidza kutambunuka kwangu,
mukagala tjigalo tjenyu tje bushe
mukasumikilisa nge ndulamo.
5Makatjemela zwitjaba,
mukalobesa babi,
mukabukusha mazina abo tjose.
6Zwita azwitjipo,
makakolomodza mizi yazo yabe matongo,
abatowotjaalakang'wa kakale.
7Koga Yahwe banobusa nge kusingapele,
bakalulwamisila tjigalo tjabo
tje bushe kusumikilisa.
8Banosumikilisa shango nge ndulamo,
banolaula njudzi nge ndulamo.
9Yahwe i dizhilo le bakatshambilidziwa,
i dizhilo lakasima mu misi ye manikano.
10Ibabo banoziba zina lenyu
banogalabgwe mu muli.
Ngobe Yahwe,
amutolasha banomushaka!
11Mbilani Yahwe njimbo dzinokudza,
ibo banobusa mu Ziyoni,
budzani njudzi mishingo yabo.
12Ngoti Ndzimu unobgwilizila lopa
latebugwa unobakumbula,
abatokangang'wa tjililo tje banodziyidziwa.
13Ibeni nge ngoni mu ndili Yahwe!
Bonani sekwandinodziyidziwa nge bakandibenga,
imwi munondimilidza kudwa mu mikoba ye lufu,
14kuti ndizo ndilebe ngekwe gudzo lenyu
pa mikoba ye Nkololokadzi we Ziyoni,
ndishathe mu jidzo lenyu.
15Zwitjaba zwakawila mu gomba lazwakatsha.
Makumbo abo akabhakhwa nge gwanga
gwabakateya ibo zwabo!
16Yahwe banozibika
nge kusumikilisa kwabo nge ndulamo.
Babi bakabhatshigwa
nge mishingo ye maboko abo.
17Bhelelo le babi bugalo gwe bafi,
zose zwitjaba zwinokangang'wa Ndzimu.
18Basheti abatowokanganika misi yose,
ne kugalabgwe kwe bashayi
akungabalashikile tjose.
19Milikani Yahwe!
Musiletje bathu bakamukunda,
zwitjaba ngazwisumikilisiwe mbeli kwenyu!
20Mubatjise Yahwe,
zibisani zwitjaba kuti zwibathu koga!
Kalanga Bible © Bible Society of Botswana, 2008, 2018.