Njimbo 10
10
Ntembezelo wekukumbila bhatsho
1Ini mulimilile kule Yahwe?
Ini muzwisumbika mu misi ye manikano?
2Nge kuzwikudza babi banodziyidza bashayi,
ngababhakhwe nge matati abakateya ibo.
3Babi banozwikudza ngekwe
yemula dzabo dzakabipa.
Magovu anotuka akabuya
akazwilandula Yahwe.
4Mu kuzwida kwabo,
babi abatoshaka Ndzimu.
Mikumbulo yabo inoti “Akuna Ndzimu.”
5Mishingo yabo inodwilila misi yose.
Kusumikilisa kwenyu kupezhugwi,
abatokubona zwita zwabo banozwidadila.
6Banozwidwa mu mimoyo yabo beti,
“Akuna tjingatizunguza.”
Mu zwizekugwana zose zwinowozha
akuna tjingatiwila tjibibi.
7 #
Baroma 3:14
Milomo yabo izhele bhiso
ne bupitipiti ne kutshambilidza,
ndimi dzabo dzizhele kutjinya ne bubi.
8Unolalila bathu mu zwikotjo zwe mizi;
Mu magalo akasumbikala
unobulaya bathu basina nlandu.
9Unobgwatilila se shumba.
Unobgwatilila kubhata bashayi.
Unobhata bashayi
ebakweba nge gwanga gugwe.
10Unokotama kazwilulwamisila kumadzuka,
basina masimba banoligwa nge masimba awe.
11Unozwidwa eti, “Ndzimu wakangang'wa,
wazwimba buso gwawo awungandibone.”
12Milikani Yahwe!
Milidzani luboko gwenyu Ndzimu.
Musikangang'we bamukuhwisiwa zogwadza.
13Ini mbi eleba kusakalulwama ngekwe Ndzimu,
ebe ezwidwa eti mu moyo uwe,
“Amungandiyitile nlandu.”
14Koga mobona! Nge malebeswa wose
moyela njele, bakamanikana
bedziyidzika, kuti mubhatshe.
Badziyili banogalabgwe mu muli.
Mobhatsha siyang'wa.
15Pedzani masimba e mbi
ne nshingi we mbipo.
Thamani kuti kutjinya kukwe kupele.
16Yahwe ndibo mambo nge kusingapele,
tjaba dzowoloba mu shango yabo.
17Yahwe, imwi mohwa yemula
dze bana moyo minyolo,
mowobasimisa, mukahwilila tjililo tjabo,
18kushingila ndulamo siyang'wa
bakatshambilidziwa.
Kuti ndizo nthu we shango ino
asitjazhise kutjisa kakale!
Kalanga Bible © Bible Society of Botswana, 2008, 2018.