Njimbo 85
85
Ntembezelo we mamuko e itjaba
1Yahwe, makama ne shango yenyu,
makabgwilizila Jakubo makombolelo.
2Makazwiibhatigwa bathu benyu milandu,
makabazwiibhatigwa zwibi zwabo zose.
3Makashandukila bushongola gwenyu gose,
mukashandukila kugwadzamoyo kwenyu kwakabe kupisa.
4Mutibake, imwi Ndzimu we jidzo ledu,
muletjedze kusatishathila kwenyu.
5Apa mogwadzila moyo tjatjose kene?
Apa bushongola gwenyu gowodwilila
kunoti ku zwizekugwana zose kene?
6Apa amutowomusa kakale kene?
Kuti ndizo bathu benyu bamushathile kene?
7Muti lakidze mahwilongoni enyu, imwi Yahwe,
kakale mutipe jidzo lenyu.
8Ngandihwe kuti Ndzimu Yahwe banowolebani,
ngobe banowoleba kunyalala mu bathu babo,
ku bayengemali babo, kuna banoshandukila ku bali.
9Malebeswa jidzo lawo libe pejopejo na ibabo banoutja,
kuti gudzo lawo ligale mu shango yedu.
10Ludo gusingazunguzike ne kugalikabgwe zwishangane,
ndulamo ne kunyalala zwidziyisane.
11Kugalikabgwe kowomela gudwa pasi,
ngono ndulamo inowolinga pasi kudwa zhuzhugwi.
12Ee, Yahwe banowopa tjakanaka,
ngono shango yedu inowowana zwizwalo zwakawanda.
13Ndulamo inowobatungamila,
ibuya ibathamila mwazha pabanotshamba.
Kalanga Bible © Bible Society of Botswana, 2008, 2018.