Njimbo 84
84
Kushuba bugalo gwe Ndzimu
1Bugalo gwenyu gwakanaka sene,
imwi Yahwe we Mibunga!
2Meya yangu yakamushuba kwazo,
inotshwigwa kubona magalo a Yahwe,
moyo wangu ne meya yangu zombila Ndzimu nge shatho.
3Ne zhazho ina nzi,
ne nyenganyenga inozwibakila shaka,
paingagadza majindana ayo,
pa zwibeso zwenyu, imwi Yahwe Masimbawose,
Mambo wangu ne Ndzimu wangu.
4Bakakombolegwa ibabo banogala mu ng'umba yenyu,
bemba bemukudza misi yose.
5Bakakombolegwa balume be simba labo limumuli,
ibo bakazwimisila mu mimoyo yabo kutathila ku Ziyoni,
6sekwa kwabanopalama guku le Bhakha
banolithama pathu pe misenya,
vula dze nseulo na idzobo dzopafukidza nge madziba.
7Banodwilila besima,
Ndzimu we midzimu unowobong'wa mu Ziyoni.
8Imwi Yahwe Ndzimu we mibunga, ihwani ntembezelo wangu,
bhulutanani, imwi Ndzimu wa Jakubo!
9Bonani tjivikili tjedu, imwi Ndzimu,
lingani mu buso gwe nzhodziwa wenyu.
10Ngobe zhuba ling'ompela mu ng'umba yenyu loyita,
pa tjiwulu (1 000) pamwe pathu.
Ndingabe ntjengeti we nkoba mu ng'umba ye Ndzimu wangu,
pana kuti ndigale mu mishasha ye bubi.
11Ngobe Yahwe Ndzimu i zhuba ne tjivikili,
banokupa kuzwalana ne kuteta.
Akuna tjakanaka Yahwe tjabanonyima
ibabo banoyenda mu lebeswa.
12Imwi Yahwe Ndzimu Masimbawose,
bakakombolegwa ibabo banogalabgwe mu muli.
Kalanga Bible © Bible Society of Botswana, 2008, 2018.