Njimbo 75
75
Ndzimu nsumikilisi
1Toboka imwi, imwi Ndzimu tomuboka.
Toboka, zina lenyu li pejo pejo.
Bathu banoleba ngekwe makaabadzo enyu.
2“Mu lubaka gwandakabiga,
ndowosumikilisa kwakatambunuka.”
3Ha shango itengenyeka ne bagali bayo bose,
ndimi ndinosimisa phanda dzayo.
4Ndoti kuna banozwikudza, “Musizwikudze,”
ku babi ndoti, “Musizwikukumadze.
5Musitongo yita manyimwe,
kene kuli lebeleka makawomeledza mitshibha.”
6Ngobe kumilidzigwa pezhugwi akutodwa ku bhezhuba
kene golombedzo kene kuli ku tjilambanyika.
7Koga Ndzimu ndiwo unosumikilisa,
udelusila mmwe pasi, umilidzila mmwe pezhugwi.
8Ngobe mu luboko gwa Yahwe kuna bhepe,
lina nkumbi we nzhambi unotutuma, wakavubegwa zubuyanana,
banowoutebulila pasi,
ngono babi bose be shango
banowoung'wa bakakunika kose ne matshikidi.
9Koga ndowoshatha nge kusingapele,
ndowomba ndikudza Ndzimu wa Jakubo.
10Ndowopedza simba le babi bose,
koga nyanga dze bayengemali dzowomilidziwa.
Kalanga Bible © Bible Society of Botswana, 2008, 2018.