Njimbo 74
74
Ntembezelo we sununguko ye itjaba
1Ndzimu, ini mutilashila tjose kene?
Ini bushongola gwenyu guthungayilila
pkhwizi dze fulo lenyu kene?
2Kumbulani gubungano lenyu lamakazwishaluligwa ntolo,
ilo lamakadzutunula kube itjaba tje lukata gwenyu.
Kumbulani Dombo le Ziyoni, ipo pamakatongo gala.
3Shandukilani ku matongo agelile tjose,
tjita tjakakolomola tjimwe ne tjimwe mu bugalo gwakayengemala.
4Zwita zwenyu zwakabomba mu bugalo gwenyu gwakayengemala
bakabiga zwilakidzo zwabo zwe kukunda.
5Bakazwitola se balume bakabhata mashathu
bepalama ishaka benotema miti ne mashathu.
6Bakapkhwanya kose kwakabezhiwa kukanakisiwa ngokwagwa,
nge mashathu ne zwishakhwana zwabo.
7Bakapisa bugalo gwakayengemala nge moto,
bakatemapadza bugalo gwe zina lenyu,
nge kuguligila pasi.
8Bakazwidwa beti, “Towobakolomodza tjoselele,”
bakapisa mabazhe wose e bushanganilo e Ndzimu mu shango.
9Atitjabona zwilakidzo zwedu,
akutjina balebesambeli, ngono akuna ne nng'ompela
upakati kwedu unoziba kuti kowodza kukabe lini.
10Kowodza kukabe lini Ndzimu, tjita tjimulengudza kene?
Apa tjita tjowotuka zina lenyu nge kusingapele kene?
11Ini mushungata luboko gwenyu,
hwutini mulambisila luboko gwenyu pa ifuba tjenyu kene?
12Koga Ndzimu mambo wangu, kwakadwila ntolo,
muzhisa jidzo mu shango.
13 #
Kufuluka 14:21
Makathubukanya gungwa nge simba lenyu gulu,
makapkhwanya misholo ye bhophona mu vula.
14 #
Jobe 41:1; Njimbo 104:26; Isaya 27:1 Ndimwi makapkhwanya misholo ye zhithu le gungwa linoyi Livatani,
mukalipa zwitjili zwe tjilambanyika kulija.
15Makazhula misenya ne hwobana
makapkhwisa njizi dzagala dziwunga dzisingapinde.
16Masikati nde enyu, busiku na igo nde gwenyu,
makabiga zhuba ne mwedzi mu magalo azo.
17Ndimwi makathama migathu yose ye shango,
makathama tjilimo ne mbaba.
18Kumbulani Yahwe sekwa makalengudziwa nge tjita
ne sekwa bathu be zwilengwe bakatuka zina lenyu.
19Musipe zwibandana meya ye njiba yenyu,
musikangang'wile tjose butjilo gwe bashayi benyu.
20Kumbulani tjidumano tjenyu,
ngobe magalo akatizwi e shango,
azhele magalo e bupanduki.
21Musiletjedze banolingigwa pasi bakabhatisiwa shoni,
dzene bashayi ne basheti bakakudza zina lenyu.
22Milikani imwi Ndzimu, muzwilebelekele,
kumbulani sekwa zwilengwe zwinomulengudza zhuba lose.
23Musikangang'we zhoba ye banyanyayidzi benyu,
dzonga kwe zwita zwenyu komilika kuyendilambeli.
Kalanga Bible © Bible Society of Botswana, 2008, 2018.