Njimbo 7
7
Ntembezelo we ndingisanyo
1Yahwe Ndzimu wangu,
ndotizhila kumuli.
Munditjidze mundigwile
muna bakandisala shule,
2kusajalo banowondipalulanya
se shumba, bendikwebakwebanya,
kusina unondigwila.
3Yahwe Ndzimu wangu,
ha kuli kuti ndakathama ikoku,
ha kuli kuti kuna nlandu mu ndili,
4ha kuli kuti ndakabgwilizila
una mbakiso nami nge mbipo,
kene kuli kuti ndakatapila tjita
tjangu ndisayi tjimwe,
5ha kwakajalo, tjita tjangu ngatjitatane nami,
tjindibhate tjitshambile butjilo gwangu
pasi nge makumbo tjindiladzike mu hwuluba.
6Milikani Yahwe,
mu kugwadzamoyo kwenyu!
Milikani mugwe ne bushongola
gwe zwita zwangu!
Milikani, Ndzimu wangu,
ngobe makabiga zhuba le sumikiliso.
7Gubungano le bathu bose,
ngalikubungane kumupoteleka;
Mubalaule muli mu tjigalo tjenyu.
8Yahwe ndibo nsumikilisi we bathu bose,
mundisumikilise kunoyendidzana
ne ndulamo yangu Yahwe
nenge kuyendidzana
ne kusheta nlandu kwangu!
9 #
Zumbunulo 2:23
Thamani kuti bubi gwe babi gupele,
koga musimise balulwami,
imwi munoshakisisa mikumbulo ne mimoyo,
imwi Ndzimu wakalulwama.
10Ndzimu ndiwo tjivikili tjangu
iwo unotjidza bana mimoyo
yakatambunuka.
11Ndzimu nsumikilisi wakalulwama,
Ndzimu unolakidza bushongola
gwawo mazhuba wose.
12Ha nthu asingashanduke,
Ndzimu unowokuswa thumo lawo,
ukapeta dati le misebe.
13Wakalulwamisa mathumo
awo anobulaya,
unolulwamisa misebe ikanga moto.
14Bonani njalakang'wa dze bathu babi
sekwa dzizhele mbipo,
Bakazwisenga bubi,
bakazwala manyepkhwa,
15banotsha gomba bakalivukula,
ngono bakawila mu gomba labatsha ibo.
16Sahwa kwabo kohwisa ibo zogwadza,
da gwa kwabo kowodelukila mu misholo yabo.
17Ndowoboka Yahwe ngekwe ndulamo yabo,
ndowomba ndikudza zina la Yahwe,
ibo bapezhugwi zhugwi.
Kalanga Bible © Bible Society of Botswana, 2008, 2018.