Njimbo 65
65
Kukudza ne kuboka Ndzimu
1Gudzo nge lenyu, Ndzimu, mu Ziyoni;
kugadzabgwe kwedu towokushingikadza.
2Imwi munodabila ntembezelo!
Mmwe ne mmwe unowozha kumuli.
3Ngekwe zwibi zwedu,
ha matjinyo edu eti kulila,
motizwiibhatigwa.
4Bakakombolegwa ibabo bamakashala
mukabazhisa kutjilila mu ng'umba yenyu.
Towogutshiwa nge ndulamo ye ng'umba yenyu,
ng'umba yenyu yakayengemala.
5Nge mishingo inotjisa motidabila nge jidzo,
Ndzimu we jidzo ledu;
ndimwi galabgwe kwe phelelo dzose dze shango
ne gungwa gumwe ne gumwe.
6Nge simba lenyu makathama matombo;
muna masimba makulu.
7Monyaladza zhoba ye makungwa wose,
zhoba ye matuthu e vula dzawo,
kudzongana kwe bathu.
8Ibabo banotjilila mu migathu ikule kule ye shango
banotjisiwa nge zwilakidzo zwenyu;
mothama zila dze mangwanana ne
dze madekwana dzikamimila ngoshatha.
9Mokumba shango mukayidilidzila,
moyifumisa kwazo;
gwizi gwe Ndzimu guzhele vula;
mopa bathu mathunde,
ngobe makayilulwamisila ikoko.
10Modilidzila ngolo dzayo kwazo,
mutambunudza mabundo ayo
munyolodza mavu ayo nge midumbi,
mukombolela kula kwe zwidzwalo.
11Moambadza lubaka gwe gole nge tjiala tje guto;
pa mapinda fumwa inotebukana.
12Mafulo amu tjilambanyika anotebukana nge zojiwa,
matombo anozwiambadza shatho,
13Makula amuhwunde ye gwizi azhele pkhwizi ne mbudzi,
minda izhele mathunde,
zose zomimila zwimba nge shatho.
Kalanga Bible © Bible Society of Botswana, 2008, 2018.