Njimbo 66
66
Lumbo gwe gudzo ne kuboka Ndzimu
1Thamilani Ndzimu zhoba ye shatho, imwi shango yose.
2Imbani ngekwe bukulu gwe zina lawo;
muwupeni gudzo gulugulu.
3Idwani Ndzimu muti, “Mishingo yenyu inotjisa seni!
Nge zila ye simba lenyu gulu,
zwita zwenyu zoshushubala mbeli kwenyu.
4Shango yose inomunamata;
banomumbila njimbo dzinomukudza
banomba njimbo dzinokudza zina lenyu.”
5Izhani mubone mishingo ya thamwa nge Ndzimu.
Mishingo yawo mikulu seni yaunothamila bathu!
6 #
Kufuluka 14:21;
Joshuwa 3:14-17
Wakashandula gungwa gukabe shango yakawomelela;
bakatjuluka gwizi nge makumbo.
Ipapo takashatha muwuli,
7iwo unobusa nge simba lawo gulu nge kusingapele,
zhisho lawo lakalinga zwitjaba zose,
bapanduki ngabasizwikudze.
8Kudzani Ndzimu wedu, imwi bathu,
zhoba ye kukudziwa kwawo ngayihwike,
9iwo wakatilisa pakati pe batjili
kakale awuzoletja makumbo edu katelela.
10Imwi Ndzimu, makatilika;
makatilika se siliva ilikiwa.
11Makatibhatshila nge gwanga;
makabiga mitolo inolema kushule kwedu;
12makaletja bathu bakatatha pezhugwi kwe misholo yedu;
takapalama moto kakale
tikapalama vula;
koga makatizhisa pathu pakashaladuka.
13Ndowozha mu ng'umba yenyu ne zwipo zwinopisiwa;
ndowoshingikadza tuna kwangu,
14iko kwandakaleba nge nlomo wangu kakale
agadzabgwe nge wangu nlomo ndili mu kudziyidzika.
15Ndowomudusila zwipo zwinopisiwa zwakakola,
zwili mu busi gwe tjibhayilo tje nyundo;
ndowothama tjibhayilo tje mikono ne mbudzi.
16Izhani muhwe, imwi mose munotja Ndzimu,
ngono ndowoleba tjawakandithamila.
17Ndakalilila pezhugwi ndililila iwo,
ngono wakakudziwa nge ndebo yangu.
18Ha ndakabe ndashathila jinyo mu moyo wangu,
She banobe basakanditeedza;
19koga malebeswa Ndzimu wakateedza
bakateedza matama e ntembezelo wangu.
20Ndzimu ngaukudziwe,
ngobe awuzolamba ntembezelo wangu
kene kuli kusandipa ludo gwawo gusingazunguzike.
Kalanga Bible © Bible Society of Botswana, 2008, 2018.