Njimbo 63
63
Ludo gwe Ndzimu
1Imwi Ndzimu, mu Ndzimu wangu, ndomushaka,
meya yangu ina nyota nge kwenyu;
moyo wangu unotshwigwa nge kwenyu,
ndonga shango yakawomelela kakale yakashakala isina vula.
2Ndizo ndakamushaka mu bugalo gwenyu gwakayengemala,
ndibona simba lenyu ne bukulu gwenyu.
3Ngoti ludo gwenyu gusingazunguzeke goyita pa butjilo,
ndizo ndowomukudza.
4Ndizo ndowomukudza butjilo gwangu gose;
ndowomilidza maboko angu adana zina lenyu.
5Meya yangu igedzikane se imu nzano nkulu,
ndizo ndomukudza nge kushatha
6andimukumbula ndililele mubulalo gwangu,
kakale ndodana zina lenyu mu moyo wangu busiku gose,
7ngoti ndimwi magala muli bhatsho yangu,
ndizo ndomba ngoshatha ndili mu ntutshi we mapapilo enyu.
8Meya yangu yakamunamatila,
luboko gwenyu gwe luji gwakandisimisa.
9Koga ibabo banoshaka kukolomola butjilo gwangu
banowongina mu gomba lakangina le lufu kwazo,
10banowolongwa thumo,
banowobe zojiwa zwa bophungubgwe.
11Koga mambo unowoshatha mu Ndzimu;
bose banotuna ndiwo banowokudziwa,
ngobe milomo ye banyepi inowonyaladziwa.
Kalanga Bible © Bible Society of Botswana, 2008, 2018.