Njimbo 57
57
Kukudza ne kugadzabgwe mu kudziyidzika
1Ibeni nge ngoni mundili Ndzimu,
mundihwile ngoni,
ngobe mu muli meya yangu inowana dizhilo,
mu ntutshi we mapapilo enyu ndowana dizhilo,
kuswikila matutu e golomodzo epinda.
2Ndolilila ku Ndzimu Upezhugwi zhugwi,
ku Ndzimu iwo unozhadzisa
kuda kwawo, uthamila imi.
3Unowotumila uli kudzimu ukanditjidza,
unowobhatisa shoni ibabo
banonditshamba nge makumbo.
Ndzimu unowotumila ludo gwawo
gusingazunguzike nenge kugalikabgwe kwawo.
4Ndilele pasi pakati kwe shumba
dzino zandabula bathu kwe bugovu;
meno adzo mathumo ne misebe,
ndimi dzabo mipanga ye ngwa inopitsha.
5Kudziwani Ndzimu kupinda mazhuzhugwi.
Gudzo lenyu ngalibe mu shango yose.
6Bakateya nge dati pandinotshamba
meya yangu yakabe yakashoba kwazo.
Bakatsha gomba mu zila yangu,
koga bakawila mulili ibo.
7Moyo wangu wakadzikama, imwi Ndzimu,
moyo wangu wakadzikama.
Ndowomba lumbo athama nlidzo unozipa.
8Muka meya yangu!
Muka tjilidzo tje dende ne tje laya,
ndowobinduka mazhokuyedza.
9Ndowoyisa mboko yangu kumuli, She
pakati pe bathu;
ndowomba njimbo dzinomukudza pakati pe zwitjaba.
10Ngobe ludo gwenyu gusingazunguzike bukulukulu
goswika pezhugwizhugwi;
kugalikabgwe kwenyu koswika ku makole.
11Kudziwani, Ndzimu, kupoteleka makole ndiyeno
gudzo lenyu ngalibe mu shango yose.
Kalanga Bible © Bible Society of Botswana, 2008, 2018.