Njimbo 56
56
Galabgwe mu Ndzimu auli mu kudziyidzika
1Ibeni ne ngoni kundili Ndzimu, ngobe bathu
banonditshamba nge makumbo;
zhuba lose zwita zonditshambilidza;
2Zwita zwangu zonditshamba
nge makumbo zhuba lose,
ngobe bunji gogwa nami nge mazwikudzo.
3Ha nditja,
ndogalabgwe mu muli.
4Mu Ndzimu, iwo wandinokudza dama lawo,
ndogalabgwe mu Ndzimu ndisina lutjo;
nthu koga ungandishingani wali?
5Zhuba lose banoshaka kundihwisa zogwadza
mikumbulo yabo ndeye kushaka kundithamila bubi.
6Banozwikubunganya bakandilalila,
bakalingisisa mayendilo angu,
bezwidwa beti bangapedza butjilo gwangu,
7ndizo buzuludzani jinyo labo;
mu bushongola gwenyu,
lashilani bathu ibabo pasi, imwi Ndzimu!
8Makabala kuti ndakaposegwa
yeno na yeno kangana;
longani mishodzi yangu mu butili.
Apa azwizokwagwa mu hwalo
dzenyu dze kusumikilisa kene?
9Ndizo zwita zwangu zowotizha
mu zhuba landinowodana.
Etji ndoziba kuti malebeswa,
kuti Ndzimu umile nami.
10Mu Ndzimu, iwo wandinokudza dama lawo,
muna Yahwe, iye wandinokudza dama lile,
11ndogalabgwe mu Ndzimu ndisina lutjo.
Nthu koga ungandithamani wali?
12Gadzabgwe kwandakamuthamila ngotuna
ndakafanila kukulondolodza, Ndzimu;
13Makatjidza meya yangu mu lufu,
ne makumbo angu mu kuwa,
kuti ndizo ndiyende mu mesho e Ndzimu
mu tjedza tje butjilo.
Kalanga Bible © Bible Society of Botswana, 2008, 2018.