Njimbo 50
50
Tjibhayilo tjinoamutjilika
1Ibo nkulukulu, Ndzimu Yahwe,
banolebeleka kakale banodana shango
kudwa mu kubhuda kwe zhuba kunoti kungina kwalo.
2Kudwa mu Ziyoni, igo bubuya nge kwago,
Ndzimu unopenyelela.
3Ndzimu wedu unozha kakale awutonyalala koga
wakatungamidza moto unonyeledza,
ne vula inona nge dutu yakabapoteleka.
4Unodana kudzimu, kadana mu shango kuti
ndizo usumikilise bathu bawo;
5“Mundikubunganyile bagalimoyo, ibabo bakathama
tjidumano nami nge kudusa tjibhayilo!”
6Kudzimu koleba ngekwe bululwami gwawo,
ngobe Ndzimu ngekwawo nsumikilisi.
7“Hwililani, bathu bangu, ngono ndowolebeleka,
iwe Iziraela ndowotendeka ngekwe bubi gugo.
Ndimi Ndzimu, Ndzimu uwo.
8Anditokutjemelela zwibhayilo zwizo;
zwibhayilo zwizo zwakapisiwa zwipa mesho
angu tjibaka nge tjibaka.
9Anditowoamutjila nkono unodwa ku nzi uwo
kene dzili mbudzi mu danga lilo.
10Ngobe phuka imwe ne imwe ye shango nge yangu
na idzo ng'ombe dzimu matombo ali tjiwulu.
11Ndoziba nyuni dzose mu shango,
ne tjimwe ne tjimwe tjinoyenda mu shango nge tjangu.
12“Ha ndabe ndina zhala, ndabe ndisingawomubudza,
ngobe shango na kose kumu ili nge kwangu.
13Apa ndoja nyama ye mikono kene,
na iwo malopa e mbudzi apa ndoang'wa kene?
14Ipa Ndzimu tjipo tje kuboka,
ulipe tuna kuko kuna iye Upezhugwi zhugwi.
15Undidane mu nsi wekudziyidzika;
ndowokutjidza, ngono unowondikudza.”
16Koga ku babi Ndzimu ukati,
“Unotola ngayi kuleba ndaulo dzangu
kene kuli kuleba ngekwe tjidumano tjangu nge nlomo uwo?”
17Unobenga tjemegwa,
kakale unoposela matama angu kutjena nawe.
18Ha ubona mbava unozwihwananya nayo,
kakale unogala ntutshi ne phombgwe.
19“Unoletjedza nlomo uwo ukalaugwa nge bubi,
ne lulimi gugo goleba bupitipiti.
20Unogala pasi ukaleba kusakalulwama ngekwe
wakanyi kuko.
Unobulaya mwana wa mmeyabo.
21Zwithu izwezwi wakazwithama ngono ndagala ndilinyelele;
wakabe ukumbula kuti ndimmwebo unofanana nawe.
Koga ngwenu ndokutjemela ndakasimisila
kakale ndikutilika nlandu.
22“Zibani woku, imwi munokangang'wa Ndzimu,
kusijalo ndowomupalula na pakati,
ngono akuna unowomutjidza.
23Ibabo banozhisa zwibhayilo zwe kuboka banondikudza;
kuna ibabo banoyenda mu zila ye malebeswa,
ndowobalakidza jidzo le Ndzimu.”
Kalanga Bible © Bible Society of Botswana, 2008, 2018.